Любовь АХМАТОВА - великое лирическое дарование. Халкъыбызны закий назмучу къызы Ахматланы Люба. Бу назмуда не кюрешиб да, бир "илинир" джер табмадым - асры сейирсиннгенден былайгъа да салама. Бир окъугъаным бла эсимде къалыб, эсимден алыб салама.
Чууутлулада-затда дегенча, бир башха халкъда болса, Любаны къол аязларында джюрютюр эдиле, башха тиллеге да кёчюрюб-кёчюртюб, дуниягъа белгили этер эдиле. Мен, экили болмай, айтыргъа боллукъма: Любовь Ахматованы назмулары Анна Ахматоваланыкъыладан кем тюлдюле. Кесигиз тенглешдиригиз да къарагъыз.
Мен а, Любаны башха назмуларын да сала-сала турлукъма. Аны ызындан джетиб келген джаш шайырларыбыз да бардыла: Айшат, Диана, Лаура... "Поэзия - женского рода" деб, бошуна айта болмазла... Огъай, поэзиябызгъа къоркъуу джокъду бизни. Ана тилибизде джазгъан иги поэтле кёбюрек болсала, тилибизге да къоркъуу азыракъ боллугъуна не сёз.
КЪАР ДЖАУАДЫ ТАУЛАДА
Къар джауады таулада, агъарта тёгерекни.
Кёл эте, умут эте, джашадым бир бёлекни.
Энди джокъду мадарым, джашасанг да эсимде,
Джокъду, джаным, терслигинг, бар терслик да - кесимде...
Къар джауады таулада, хапула - джулдузчукъла.
Мен сакъларма эртденни, сен а, джангызым, джукъла...
Тюшча, бары да кетди, таб салыб эсибизге,
Ой, бир бек зарландыла адамла экибизге...
Къар джауады таулада, сагъышымча, чал чачы.
Сау дуньяда Сен эдинг джашаууму къууанчы.
Ким хорлады къадарны? - джазыуум джардан атды.
Ол кюн, кюнюм тутулуб, терен тенгизге батды.
Къар джауады таулада, тигиую - джибек, окъа.
Чегетде наратлагъа кюмюш чепкенле согъа !
Ай, ийиб мутхуз нюрюн, тёгюлюр таугъа, тюзге,-
Тюбешиу буюрулур бир кюн бир экибизге...
Комментарии 1