Предыдущая публикация
Թռչունների ժանտախտ ու հավերի անկում Շիրակի մարզի Մարմաշեն գյուղում
ՀԱՅԱՍՏԱՆ
16:02 18.12.20182875
Վերջին մեկ շաբաթում Մարմաշեն գյուղում հավերի անկման դեպքեր են գրանցվում: Ընտանի թռչուններ են սատկել գյուղի տնտեսությունների մեծ մասում։ Թե ինչ հիվանդություն է տարածված թռչունների մոտ, որևէ մասնագիտական խումբ չի եկել գյուղ, հետազոտություններ չեն արվել։ Մարմաշենցիները պատմել են, որ վիրուսը ծայր է առել մեկ ամիս առաջ, սակայն վարակվածության դեպքերն ավելացել են վերջին մեկ շաբաթում: Գյուղացիներն արտաքին նշաններից ելնելով են միայն ենթադրում, որ հավերի մոտ ժանտախտ հիվանդություն է տարածվել:
Մարմաշենցի տիկին Ալվարդի տնտեսությունում 3 օրում թռչնանոցի գրեթե բոլոր հավերը սատկել են: 35 հավից մնացել է 7-ը: Դրանք էլ չեն մնալու, համոզված է տիկինը: 7-ն էլ խեղճացել են ու հրաժարվել կերից:
«Ըսպես բերաններից ջուրը կերթա, կռռան գը ու սատկին գը»,- նկարագրել է Ալվարդ Բաղդասարյանը։
«100 թև հավ ունեինք, օրական 3-4 հատ սատկում են, առավոտ ելնում ենք՝ արդեն պառկած են գետնին, հիմի մնացել է մի 40 հատ»,- նշել է մարմաշենցի Լյովա Հարությունյանը։
Հարևան մյուս տնտեսություններում նույն վիճակն է: Գյուղի տարբեր ծայրերում եղած թռչնանոցներում օրական 5-6 հավ է սատկում: Գյուղացիներն էլ, առանց անասնաբույժին ու մասնագետներին տեղյակ պահելու, վարակի տարածումը թույլ չտալու համար սատկած թռչուններին հավաքել են մի տեղ ու այրել։
Թե ինչո՞ւ տեղյակ չեն պահել գյուղի անասնաբույժին՝ պատասխանեցին, թե գնալու ու հատուկ տեղյակ պահելու իմաստը ո՞րն էր, երբ անասնաբույժը հենց գյուղում է ապրում, և նրա անասնագոմում էլ են հավեր սատկել: Անասնաբույժն էլ հայտնել է, թե ոչնչից էլ տեղյակ չէ։
«Տեղյակ չեմ, լսել եմ մի թեթև, ինձ գյուղացիները տեղյակ չեն պահել»,- արդարացել է Մարմաշենի անասնաբույժ Հարություն Խաչատրյանը։
Անասնաբույժը հայտնել է, որ ժանտախտի դեմ անհրաժեշտ քանակի պատվաստանյութ չի ստացել և պատվաստել է այնքան թռչնի, որքանին պատվաստանյութը բավականացրել է:
«Տվել են 3600 թռչնի համար դոզա, գյուղն էլ ունի 8000 թև հավ, ինչքան որ տվել են, ես էդքան էլ պատվաստել եմ, կարող եք գնալ հարցնել գյուղում»,- պատճառաբանել է անասնաբույժը։
Թե ինչու է պահանջվածից երեք անգամ պակաս քանակի պատվաստանյութ ստացել, սա էլ իր գործը չի համարել, փոխարենը նշել է, թե մեղավորը հաշվառում կատարողներն են, ովքեր սխալ տվյալներ են ներկայացրել Սննդի անվտանգության պետական ծառայության մարզային կառույցին, որտեղ ևս տեղյակ չէին գյուղում հավերի անկումից:
Մեկ շաբաթից ավելի է՝ անկումները շարունակվում են, բայց սատկած թռչունները լաբորատոր հետազոտության չեն ենթարկվել, և չկա մասնագիտական եզրակացություն, թե ինչ վարակ է տարածված հավերի շրջանում: Միայն արտաքին ախտանշաններով են գյուղացիները ենթադրում, որ հավերի մոտ թռչունների ժանտախտ է:
Ալեքս Սարգսյան Ալեքս Սարգսյան
Բաժանորդագրվեք SHANTNEWS.am-ին Telegram-ում
Следующая публикация
Нет комментариев