Предыдущая публикация
АКАФИСТ СВЯТИТЕЛЮ ИОАННУ, АРХИЕПИСКОПУ ШАНХАЙСКОМУ И САН -ФРАНЦИССКОМУ, ЧУДОТВОРЦУ.
Текст утвержден Священным Синодом Русской Православной Церкви 25 декабря 2012 года (журнал № 131)
Кондак 1
Избра́нный чудотво́рче и изря́дный уго́дниче Христо́в, всему́ ми́ру источа́яй оби́льныя струи́ духо́внаго наставле́ния и ди́вных чуде́с мно́жество, восхваля́ем тя с любо́вию и зове́м ти:
Ра́дуйся, святи́телю о́тче Иоа́нне, в беда́х ско́рый помо́щниче.
Икос 1
А́нгела о́бразом яви́ тебе́ в после́дняя времена́ всея́ тва́ри Созда́тель, да с ми́лостию Бо́жиею пече́шися о лю́дех земны́х. Взира́юще же на доброде́тели твоя́, преблаже́нне Иоа́нне, вопие́м ти си́це:
Ра́дуйся, с ра́нняго де́тства благоче́стием украше́нный;
ра́дуйся, со стра́хом и тре́петом во́лю Бо́жию испо́лнивый.
Ра́дуйся, яви́вый благода́ть Бо́жию в та́йных благодея́ниих;
ра́дуйся, бы́строе дале́че су́щих стра́ждущих услы́шание.
Ра́дуйся, любвеоби́льное поспеше́ние бли́жним свои́м во спасе́ние;
ра́дуйся, ра́дование всем с ве́рою к тебе́ припа́дающим.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 2
Ви́дяще оби́льное доброде́телей твои́х излия́ние, святи́телю сла́вный Иоа́нне, просвеща́емся ду́хом, я́ко бо живоно́сный исто́чник чуде́с Бо́жиих, напоя́еши нас, ве́рно вопию́щих к Бо́гу: Аллилу́ия.
Икос 2
Ра́зум име́яй преиспо́лненный любве́, ку́пно и богосло́вия, богому́дре Иоа́нне, и богопозна́нием умудре́нный, и к стра́ждущим лю́дем любо́вию украше́нный, познава́ти и́стиннаго Бо́га нас научи́, да и мы во умиле́нии вопие́м ти:
Ра́дуйся, непоколеби́мая тверды́не и́стины Правосла́вия;
ра́дуйся, драгоце́нный сосу́де Ду́ха Свята́го.
Ра́дуйся, честны́й обличи́телю неве́рия и лжеуче́ния;
ра́дуйся, ре́вностный исполни́телю за́поведей Бо́жиих.
Ра́дуйся, подви́жниче, не дая́й на ло́жи себе́ отдохнове́ния;
ра́дуйся, возлю́бленный па́стырю ста́да Христо́ва.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 3
Си́лою благода́ти Бо́жия благи́й сиропита́тель и наста́вник ю́ношам яви́лся еси́, воспиту́я в стра́се Бо́жием и приуготовля́я их к служе́нию Бо́гови. Сего́ ра́ди ча́да твоя́ взира́ют на тя и, благодаря́ще, вопию́т Бо́гу: Аллилу́ия.
Икос 3
Име́яше вои́стину, о́тче Иоа́нне, с небесе́ тебе́ песнь воспева́ема бы́ти, а не от земли́: ка́ко бо кто от челове́к возмо́гл бы твои́х дел вели́чие пропове́дати? Мы же, принося́ще Бо́гу, я́же и́мамы, вопие́м ти си́це:
Ра́дуйся, непреста́нною моли́твою покрыва́яй ча́да твоя́;
ра́дуйся, охрани́телю ста́да твоего́ кре́стным зна́мением.
Ра́дуйся, любве́ вели́кия вмести́лище, не взира́яй на язы́ков разли́чие;
ра́дуйся, свети́льниче всесве́тлый и вселюби́мый.
Ра́дуйся, о́бразе моли́твы непреста́нныя и милосе́рдия;
ра́дуйся, утеше́ний духо́вных пода́телю тре́бующим.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 4
Бу́рею напа́стей одолева́еми: ка́ко досто́йно возмо́жем восхвали́ти чудеса́ твоя́, блаже́нне Иоа́нне? Я́ко проше́л еси́ до коне́ц вселе́нныя, спасе́ния ра́ди па́ствы твоея́ и благовествова́ния Ева́нгелия су́щим во тьме. Благодаря́ще же Бо́га за апо́стольския труды́ твоя́, воспева́ем Ему́: Аллилу́ия.
Икос 4
Слы́шаша бли́жнии и да́льнии вели́чие чуде́с твои́х, Бо́жиею ми́лостию да́же до на́шего вре́мене явля́емых, те́мже, в тебе́ Бо́гу прославля́ющемуся дивя́щеся, в стра́се вопия́ху:
Ра́дуйся, просвети́телю су́щих во тьме неве́рия;
ра́дуйся, приведы́й люде́й твои́х с восто́ка да́льняго до за́пада.
Ра́дуйся, исто́чниче чуде́с, излива́емых Бо́гом;
ра́дуйся, с любо́вию вразумля́яй заблу́ждших.
Ра́дуйся, ско́рый уте́шителю ка́ющихся о гресе́х свои́х;
ра́дуйся, путевождю́ гряду́щих путе́м пра́вым.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 5
Богодарова́нный свет яви́лся еси́, бу́ри всех лю́тых разгоня́яй, су́щих на о́строве от ви́хрей смертоно́сных моли́твами твои́ми охраня́яй, святи́телю Иоа́нне, и кре́стным зна́мением огражда́яй. Научи́ и нас, призыва́ющих тя в по́мощь, чудотво́рче святы́й, к Бо́гу с дерзнове́нием взыва́ти: Аллилу́ия.
Икос 5
Ви́дим мно́гую по́мощь твою́ в напа́стех и обстоя́ниях, преблаже́нне о́тче Иоа́нне, дерзнове́нный бо хода́тай пред Престо́лом Бо́жиим и ско́рый в беда́х помо́щник еси́. Того́ ра́ди и мы на твое́ предста́тельство пред Бо́гом упова́ем и вопие́м ти:
Ра́дуйся, стихи́й опа́сных прогони́телю;
ра́дуйся, моли́твою твое́ю от нужд избавля́яй.
Ра́дуйся, а́лчущим хле́ба при́сный пода́телю;
ра́дуйся, приуготовля́яй прося́щим изоби́лие.
Ра́дуйся, уте́шителю в ско́рбех су́щих;
ра́дуйся, мно́гих па́дших от поги́бели исхи́тивый.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 6
Пропове́дуя спасе́ние, я́ко но́вый Моисе́й гугни́вый, яви́лся еси́, изводя́ лю́ди твоя́ из пле́на безбо́жных, преблаже́нне Иоа́нне. Изба́ви и нас от рабо́ты грехо́вныя и враго́в неви́димых, да, ра́дующеся, вопие́м к Бо́гу: Аллилу́ия.
Икос 6
Возсия́в пра́ведностию твое́ю, соверши́л еси́ неисполни́мое, о до́брый па́стырю: преклони́л бо еси́ вла́сти мирски́я сострада́ти о лю́дех твои́х. Того́ ра́ди с ни́ми ку́пно и мы благода́рственно вопие́м ти:
Ра́дуйся, па́стырю до́брый, па́стве твое́й, пресе́льником, ти́хое приста́нище угото́вавый;
ра́дуйся, о де́тех и боля́щих наипа́че попече́ние име́вый.
Ра́дуйся, усе́рдно тя призыва́ющим ве́рно помога́яй;
ра́дуйся, я́ко в немощне́м телеси́ твое́м си́ла Бо́жия незави́стно соверша́шеся.
Ра́дуйся, отрази́телю нападе́ния нечести́вых;
ра́дуйся, помрачи́телю лжи и прояви́телю и́стины.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 7
Хотя́ досто́йно просла́вити дре́вних святы́х за́пада, отпа́дшаго от и́стины, возстанови́л еси́ почита́ние их в Це́ркви Правосла́вной, о люби́телю святы́х восто́ка и за́пада. Днесь с ни́ми на небеси́ моли́ о нас, пою́щих на земли́: Аллилу́ия.
Икос 7
Но́ваго ви́дим тя избра́нника Бо́жия, и́же вку́пе со святи́тели дре́вния Га́ллии яви́лся еси́ в после́дняя времена́, я́ко еди́н от сих, вдохновля́я па́ству твою́ соблюда́ти правосла́вную ве́ру, я́коже си́и на за́паде испове́даху. Сохрани́ и нас в ве́ре сей пребыва́ти, вопию́щих ти:
Ра́дуйся, но́вый Марти́не в воздержа́нии, по́двизех и чудесе́х твои́х;
ра́дуйся, но́вый Ге́рмане во испове́дании твое́м правосла́вныя ве́ры.
Ра́дуйся, но́вый Ила́рие в боже́ственном богосло́вии;
ра́дуйся, но́вый Григо́рие в почита́нии и прославле́нии уго́дников Бо́жиих.
Ра́дуйся, но́вый Фа́всте и́ноческим усе́рдием;
ра́дуйся, но́вый Кеса́рие в тве́рдой любви́ ко пра́вилом Це́ркве Бо́жии.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 8
Стра́нное виде́ние предста́ ти: в земли́ но́вей встре́тил еси́ па́ству твою́ бы́вшую, смуща́ему скорбьми́ мно́гими, но я́ко ди́вный па́стырь наста́вил еси́ ю́ поуче́нием, терпе́нием и пра́ведностию твое́ю, и це́рковь Бо́жия Ма́тере, я́же всех скорбя́щих Ра́дость есть, воздви́гл еси́: мы же, удивля́ющеся терпе́нию и смире́нию твоему́, благода́рно вопие́м к Бо́гу: Аллилу́ия.
Икос 8
Всего́ себе́ преда́в Христу́, был еси́ де́латель виногра́да Его́, богоно́сне о́тче, не ве́дал бо еси́ поко́я до конца́ многострада́льнаго живота́ твоего́. Помози́ и нам, недосто́йным, в де́ланиих на́ших и в на́шем прилежа́нии в ве́рности Христу́, да, сла́вяще, вопие́м ти:
Ра́дуйся, претерпе́вый до конца́ и дости́гший спасе́ния;
ра́дуйся, пред ико́ною Богома́тере умре́ти сподо́бивыйся.
Ра́дуйся, посреде́ гоне́ния непра́веднаго му́жественный пра́вды храни́телю;
ра́дуйся, соверши́вый служе́ние свое́ до конца́ и кончи́ну прие́мый седя́, я́ко иера́рх.
Ра́дуйся, по сме́рти уте́шивый па́ству чуде́сным свои́м возвраще́нием;
ра́дуйся, мно́гих чуде́с пода́телю к ра́це твое́й с ве́рою и любо́вию притека́ющим.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 9
Все естество́ а́нгельское восхожде́нием твоея́ души́ в небе́сныя оби́тели возра́довася, мы же, удивля́ющеся твои́м чудесе́м на земли́, де́йством Свята́го Ду́ха явля́емым, воспева́ем Бо́гу: Аллилу́ия.
Икос 9
Вити́и многовеща́ннии не возмо́гут изобрази́ти по достоя́нию свя́тости жития́ твоего́, о пра́ведне о́тче Иоа́нне, поне́же дом благода́ти неизрече́ннаго Бо́га был еси́, мы же не мо́жем умолча́ти, чудеси́, явле́ну на́шему малове́рному ве́ку, дивя́щеся, и прославля́ем тя си́це:
Ра́дуйся, боже́ственных наставле́ний пала́то;
ра́дуйся, смире́нным де́ланием а́нгелы сослужи́тели себе́ сотвори́вый.
Ра́дуйся, обреты́й ве́чное и нерукотво́рное жили́ще на небесе́х;
ра́дуйся, враче́бнице, в не́йже всяк неду́г от Бо́га врачу́ется.
Ра́дуйся, моли́твеннаго по́двига храни́лище;
ра́дуйся, освяще́нный хра́ме Ду́ха Свята́го.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 10
Спасти́ хотя́ мир, и́же всех Спаси́тель, но́ваго свята́го посла́ нам и чрез него́ из те́мных глуби́н грехо́вных воззва́ ны. Слы́шаще же его́, нас призыва́юща, мы, недосто́йнии, взыва́ем к Бо́гу: Аллилу́ия.
Икос 10
Стена́ еси́ всем прибега́ющим к твоему́ небе́сному заступле́нию, о́тче Иоа́нне, те́мже и нас от де́монских нападе́ний огражда́й, в беда́х и ну́ждах, стужа́ющих нам на земли́, помога́й, да с ве́рою тебе́ взыва́ем:
Ра́дуйся, осле́пших прозре́ние;
ра́дуйся, си́лою моли́твы жизнь на сме́ртном одре́ су́щим подава́яй.
Ра́дуйся, богооткрове́нное вразумле́ние в смяте́нии и сомне́ниих су́щим;
ра́дуйся, спаси́тельная вла́го, ороша́ющая в зно́йной печа́ли погиба́ющих.
Ра́дуйся, си́рым и оста́вленным оте́ческое заступле́ние;
ра́дуйся, святы́й учи́телю и́щущих и́стины.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 11
Пе́ние непреста́нное ко Пресвяте́й Тро́ице, преблаже́нне о́тче Иоа́нне, мы́слию, сло́вом и доброде́ланием прине́сл еси́: мно́гим разуме́нием и́стинныя ве́ры Бо́жия повеле́ния уясни́л еси́, ве́рою, наде́ждою и любо́вию наставля́я нас в Тро́ице Еди́ному Бо́гу воспева́ти: Аллилу́ия.
Икос 11
Светода́тельна свети́льника Правосла́вия су́щим во мра́це неве́дения зрим тя, ста́да Христо́ва до́брый па́стырю. Та́ко и по успе́нии твое́м явля́еши и́стину не ве́дущим ея, просвеща́я ду́ши ве́рных, вопию́щих ти такова́я:
Ра́дуйся, просвеще́ние му́дростию Бо́жиею су́щих в неве́рии;
ра́дуйся, ра́дуго ти́хия ра́дости кро́тких.
Ра́дуйся, гро́ме, устраша́яй во гресе́ упо́рствующих;
ра́дуйся, мо́лние, е́реси пожига́ющая.
Ра́дуйся, одожде́ние догма́тов Правосла́вия;
ра́дуйся, ороше́ние богомы́слия.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 12
Благода́ть, да́нную ти от Бо́га, ве́дуще сию́ с благогове́нием и благода́рностию прие́млем, к заступле́нию твоему́ чу́дному притека́юще, о всехва́льне о́тче Иоа́нне, твоя́ же чудеса́ прославля́юще, взыва́ем к Бо́гу: Аллилу́ия.
Икос 12
Пою́ще хвалу́ Бо́гу, небе́сный сонм святы́х ра́дуется, я́ко не оста́ви Госпо́дь па́дший и безве́рный мир, но яви́л есть всемогу́щую си́лу Свою́ на тебе́, кро́тком и смире́нном служи́тели, о блаже́нне о́тче Иоа́нне, и мы, со все́ми святы́ми ра́дующеся, чтим тя си́це:
Ра́дуйся, но́вая звездо́ пра́ведности, на небеси́ возсия́вшая;
ра́дуйся, но́вый проро́че, по́сланный пред коне́чным воцаре́нием зла.
Ра́дуйся, я́коже Ио́на о возме́здии за грехи́ предреки́й;
ра́дуйся, я́коже Крести́тель всех к моли́тве и покая́нию призыва́вый.
Ра́дуйся, я́коже Па́вел мно́го терпе́вый ра́ди Ева́нгелия и пропове́дания ве́ры;
ра́дуйся, апо́столе но́вый, свои́ми чудесы́ вселя́яй в нас благогове́йный тре́пет и ве́ру.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 13
О пресве́тлый и преди́вный уго́дниче Бо́жий, святи́телю о́тче наш Иоа́нне, утеше́ние всем, в ско́рбех су́щим, ны́нешнее на́ше моли́твенное приими́ приноше́ние, да моли́твами твои́ми от гее́нны о́гненныя изба́вимся и богоприя́тным твои́м хода́тайством сподо́бимся во ве́ки воспева́ти: Аллилу́ия.
Этот кондак читается трижды, затем икос 1 и кондак 1
Икос 1
А́нгела о́бразом яви́ тебе́ в после́дняя времена́ всея́ тва́ри Созда́тель, да с ми́лостию Бо́жиею пече́шися о лю́дех земны́х. Взира́юще же на доброде́тели твоя́, преблаже́нне Иоа́нне, вопие́м ти си́це:
Ра́дуйся, с ра́нняго де́тства благоче́стием украше́нный;
ра́дуйся, со стра́хом и тре́петом во́лю Бо́жию испо́лнивый.
Ра́дуйся, яви́вый благода́ть Бо́жию в та́йных благодея́ниих;
ра́дуйся, бы́строе дале́че су́щих стра́ждущих услы́шание.
Ра́дуйся, любвеоби́льное поспеше́ние бли́жним свои́м во спасе́ние;
ра́дуйся, ра́дование всем с ве́рою к тебе́ припа́дающим.
Ра́дуйся, святи́телю о́тче Иоа́нне, в беда́х ско́рый помо́щниче.
Кондак 1
Избра́нный чудотво́рче и изря́дный уго́дниче Христо́в, всему́ ми́ру источа́яй оби́льныя струи́ духо́внаго наставле́ния и ди́вных чуде́с мно́жество, восхваля́ем тя с любо́вию и зове́м ти:
Ра́дуйся, святи́телю о́тче Иоа́нне, в беда́х ско́рый помо́щниче.
МОЛИТВА ПЕРВАЯ СВЯТИТЕЛЮ ИОАННУ, АРХИЕПИСКОПУ ШАНХАЙСКОМУ И САН -ФРАНЦИССКОМУ, ЧУДОТВОРЦУ.
О святи́телю о́тче наш Иоа́нне, па́стырю до́брый и тайнови́дче душ челове́ческих! Ны́не у Престо́ла Бо́жия за нас мо́лишися, я́коже и сам посме́ртне изре́кл еси́: «А́ще и умро́х, но жив есмь». Умоли́ всеще́драго Бо́га проще́ние нам во гресе́х дарова́ти, да бо́дренно воспря́нем, и Бо́гу возопие́м о дарова́нии нам ду́ха смире́ния, стра́ха Бо́жия и благоче́стия во вся́ческих путе́х жи́зни на́шея, я́ко ми́лостивый сиропита́тель и иску́сный наста́вник на земли́ быв, ны́не бу́ди нам путеводи́тель и в сму́тах церко́вных Христо́во вразумле́ние. Услы́ши стена́ние смяте́нных ю́ношей на́шего лихоле́тия, обурева́емых беснова́нием вселука́вым, и при́зри на уны́ние изнемога́ющих па́стырей от утесне́ния тлетво́рнаго ду́ха ми́ра сего́ и томя́щихся в нераде́нии пра́здном и ускори́ на моли́тву, сле́зно вопие́м ти, о те́плый моли́твенниче; посети́ нас си́рых, по всему́ лицу́ вселе́нныя разсе́янных и во оте́чествии су́щих, во тьме страсте́й блужда́ющих, но сла́бою любо́вию ко све́ту Христо́ву влеку́щихся и жду́щих твоего́ оте́ческаго наставле́ния, да благоче́стию навы́кнем и насле́дницы Ца́рствия Небе́снаго яви́мся, иде́же ты пребыва́еши со все́ми святы́ми, сла́вяще Го́спода на́шего Иису́са Христа́, Ему́же честь и держа́ва, ны́не и при́сно и во ве́ки веко́в. Ами́нь.
МОЛИТВА ВТОРАЯ СВЯТИТЕЛЮ ИОАННУ, АРХИЕПИСКОПУ ШАНХАЙСКОМУ И САН-ФРАНЦИССКОМУ, ЧУДОТВОРЦУ.
О святи́телю чу́дне Иоа́нне, толи́ко распространи́л еси́ се́рдце свое́, я́ко нете́сно вмеща́ется в нем мно́жество почита́ющих тя челове́к от разли́чных племе́н и наро́дов! При́зри на убо́жество слове́с на́ших, оба́че от любве́ тебе́ приноси́мое, и помози́ нам, уго́дниче Бо́жий, поне́ отны́не очища́ти себе́ от вся́кия скве́рны пло́ти и ду́ха, рабо́тающе Го́сподеви со стра́хом и ра́дующеся Ему́ с тре́петом. И что возда́мы тебе́ за ра́дость о́ную, ю́же ощути́хом, зря́ще в хра́ме святе́м мо́щи твоя́ святы́я и прославля́юще па́мять твою́; вои́стину, не и́мамы, чим возда́ти, то́чию а́ще на́чнем себе́ исправля́ти, быва́юще но́ви вме́сто ве́тхих. Сея́ благода́ти обновле́ния бу́ди нам хода́тай, свя́те Иоа́нне, помози́ нам в не́мощех, исцели́ боле́зни, уврачу́й стра́сти моли́твами твои́ми; преста́вленный же от сего́ вре́меннаго во ино́е жити́е ве́чное, в не́же наста́ви тя Пречи́стая Влады́чица, Одиги́трия разсе́яния ру́сскаго, чудотво́рною Свое́ю ико́ною Коренно́ю-Ку́рскою, Ея́же спу́тник ты яви́лся еси́ в день преставле́ния своего́, ра́дуешися ны́не в ли́це святы́х, сла́вящих Еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Видео удалено или не является публично доступным
Следующая публикация
Нет комментариев