Бул байкенин аты Бакыт, Манас аэропортунда жыйырма жылдан бери такси айдайт экен. Мага башынан өткөн кызык окуяны айтып берди. 2008-жылы Чыңгыз Айтматов каза болгондо Кыргызстанга аябай көп чет элдиктер келиптир. Бакыт байке аларды жаны тынбай ташып, эсинде эки адам калган экен. Бири жапониялык болчу дейт. Ал атайын Айтматов менен коштошкону ат арытып келип, аны салып алып, мейманканадан орун таппай кыйналганын күлүп эскерди. Экинчиси Орусиядан келген бир БОМЖго окшош киши эле дейт. Ал жөн салды келген киши го деп Бакыт байке алгач маани бербегени менен, машинесине отурганда сураса ал да Айтматов менен коштошууга келген Орусиянын жөнөкөй эле окурманы экенин айтыптыр. Таң калган таксичи "жазуучусуңбу? же адабиятчысыңбы?" деп сураса, "жөн эле окурманы, күйөрманы болчумун" дептир каңырыгы түтөп тиги адам. Анан ага да мейманкана издеп, бир да орун таппай Бакыт байкенин аргасы кетет. Ал маалда таксичи агабыздын балдары жаш, шаар четинде жаңы конушта үч бөлмө чакан жер тамдын курулушун жаңы баштаган, айласы кетип "сага жатакана, тамак-аш бекер эле болсун, бензиниме эле акча төлө, каалашыңча жатып, тажияга катышып кет" деп өзүн Сергей деп тааныштырган жупуну кийинген окурманды үйүнө алып барат. Кыргыздын той-топуру көп эмеспи, ал маалда таксичи байкени ар ким тойго чакырып, тигил мейманын кошо ала жүрөт. Бирок ким экенин, кайда иштерин такыр сурабаптыр. Кетеринде Айтматовдун күйөрманы байкеге ыраазычылык билдирип, колуна 30 миң рубль карматат. Ошол кездеги миң доллар болчу дейт, таң калыптыр таксичи. Көрсө ал орусиялык окурман өз шаарындагы тың бизнесмен экен. Бакыт байкеге кийин дагы 40 миң рубль салып, кышка калбай үйүн жылуулап алуусун айтат тигил мейманы, кийин Бакыт байкенин машинеси эскирип, жаңы алуу зарылдыгы чыгат ишинен улам. Ары-бери карыз сураса чыкпайт, акыры Сергейге СМС жазат, 5 миң доллар берип тур, чогултуп кайра берем деп. Сергейи дароо эле рубль менен акчаны салып жиберет. Бакыт байке жанын чаап иштеп, 5 миңдин 3 миңин чогултат да жаңы жылдын алдында Сергейге кайра СМС жазат, азырынча 3 миңди ала туруусун, калганын кийин берерин айтып. Сергей дароо эле "колуңдагы акчаны үйүңдү толук бүтүр, же бизнеске сал, менин Айтматовду тааныткан ардактуу кыргызым" деп жооп жазган экен. Ыйладым дейт Бакыт байке, аялы экөө ыйлашыптыр... Айтматов каза болсо да анын арты менен Орусиядын бир тууган тапканын айтып берди мага жолду катар. Айтматовго абдан ыраазы экен...
Присоединяйтесь к ОК, чтобы подписаться на группу и комментировать публикации.
Нет комментариев