Hərgün sinən üstə sıxıb rəsmimi,
Məni xatırlayıb ağlayırmışsan.
Səsinə hay verən olmadı deyə,
Qəlbini min yerdən dağlayırmışsan.
Diqqətlə nəzər et hər bir cizgimə,
Gör nələr söyləyir, danışır sənə.
Sənsiz nə haldayam, nə çəkirəm mən,
Bir izah etməyə çalışır sənə.
Tənha, xəyalınla baş-başa qalıb,
Yoruldum mən onu əzizləməkdən.
Gözlərim yolların əsiri olub
Onlar da yorulub yol gözləməkdən.
Daha bu sevgidən soyuyub ürək,
Elə uzaqdayam yetməz əlin də.
Unut əllərimin hərarətini,
Əzbər də olmasın adım dilində.
Söyle cansız rəsmin nə mənası var?
Evindən asılı qalsın-qalmasın.
Öldü sənə qarşı bütün hisslərim,
Saxlayan deyiləm bu eşqin yasın.
O kövrək ürəyim daş olub indi,
Nə olsun, çox da ki şairəm belə.
Şəklimi oda ver, yanıb kül olsun,
Qalmasın səndə bir xatirəm belə....
Присоединяйтесь к ОК, чтобы подписаться на группу и комментировать публикации.
Нет комментариев