Предыдущая публикация
ЭРКАК ПУЛСИЗ ҚОЛГАНДА ЁМОН
Омад қувиб солганда ёмон,
Тақдир бахтин олганда ёмон.
Инсон қадри пуллик замонда,
Эркак пулсиз қолганда ёмон.
Чойхонага айтмас ошналар,
Менсимайди баланд пошналар.
Йўқчиликда кўзлар ёшланар,
Эркак пулсиз қолганда ёмон.
Кетар экан ҳамма ҳар тараф,
Биров турмас кунинга яраб.
Гаплашишар чўнтакка қараб,
Эркак пулсиз қолганда ёмон.
Давринг келса мақтаб сизлашар,
Бирам ширин ширин сўзлашар.
Жигарлар ҳам фойда кўзлашар,
Эркак пулсиз қолганда ёмон.
Камбағалга қиз берар қай жой,
Совчи қўйиб турганида бой.
Кимга ёқмас машина, сарой,
Эркак пулсиз қолганда ёмон.
Миннатга дучор қилма Худо,
Ўзига бер хор қилма Худо.
Бандасига зор қилма Худо,
Эркак пулсиз қолганда ёмон.
✍ Одилбек Қодиров.
Следующая публикация
Нет комментариев