Предыдущая публикация
Кимга борай йиғлагани биродарлар?
Ҳар тирикнинг ўз дарди бор тошиб кетган,
Елкасидан, бошидан ҳам ошиб кетган,
Бизга шундай дарди дундан насиб этган,
Кимга борай йиғлагани биродарлар?
Меҳрга зор этиб қўйса меҳрибонлар,
Қадримизни қаҳад қилса қадрдонлар,
Ёш ўрнида икки кўздан оқса қонлар,
Кимга борай йиғлагани биродарлар?
Сўзлай десам, сўзимга бир зор бўлмаса,
Ҳиссиётсиз каломлардан кор бўлмаса,
Фарёд солиб йиғламоқлик ор бўлмаса,
Кимга борай йиғлагани биродарлар?
Оналар ўз фарзандларин ўлдирсалар,
Туғиб ахлат қутисида қолдирсалар,
Юрагимни зардоб билан тўлдирсалар,
Кимга борай йиғлагани биродарлар?
Отасию-онасидан кечса каслар,
Бурда нонга зор қилсалар назар пастлар,
Қиёматга оз қолгани шуми дўстлар,
Кимга борай йиғлагани биродарлар?
Отасидан туғиб қизлар захар ичса,
Эр йигитни эркак киши суюб, қучса,
Қўни-қўшни бир-бирига кафан бичса,
Кимга борай йиғлагани биродарлар?
Ҳақиқатга бу дунёда кун бўлмаса,
Минг чиранма рўзғор деган ғор тўлмаса,
Яратгандан ўзга содиқ дўст қолмаса,
Кимга борай йиғлагани биродарлар?
Ҳайвон тугаб, ўқ отсалар ўз зотига,
Якун ясаб бегуноҳлар ҳаётига,
Чидамасам етимларнинг фарёдига,
Кимга борай йиғлагани биродарлар?
Майишату, зинолардан ортмаса тун,
Ғийбат билан бошлансаю, тугаса кун,
Келмадикми бу дунёга синов учун,
Кимга борай йиғлагани биродарлар?
Тўйиб кетсам макр-ҳийла талошидан,
Ҳасрат ортса берган сабр-бардошидан,
Яхши кўпу, улар тўйган кўз ёшидан,
Кимга борай йиғлагани биродарлар?
Малика Тавфиқ.
Следующая публикация
Нет комментариев