Предыдущая публикация
1 Shohlar 8:1, 3-22
Shomuil keksaygach, oʻgʻillarini Isroilga hakam qilib tayinlagan edi.
Ammo oʻgʻillari Shomuilning yoʻlidan yurishmadi. Ular tama qilar, pora olar, bir yoqlama hukm chiqarardilar. Bir kuni Isroilning hamma oqsoqollari toʻplanishib, Ramaga — Shomuilning huzuriga borishdi va unga shunday deyishdi: — Mana, siz keksaydingiz, oʻgʻillaringiz esa sizning yoʻlingizdan yurishmayapti. Endi boshqa xalqlarda boʻlganiday, ustimizdan hukmronlik qiladigan bir shoh tayinlang. Isroil oqsoqollarining “Ustimizdan hukmronlik qiladigan bir shoh tayinlang” degan gaplari Shomuilga yoqmadi. Shuning uchun u Egamizga ibodat qilgan edi, Egamiz Shomuilga shunday javob berdi: — Xalq senga nima aytsa, hamma gapiga quloq sol. Ular seni rad etishmadi, oʻzlarining shohi sifatida Meni rad etishdi. Ularni Misrdan olib chiqqan kunimdan buyon Menga nima qilgan boʻlsalar, senga ham shunday qilishayotir: ular Meni tark etib, boshqa xudolarga sajda qilishdi. Endi ularning gapiga quloq sol. Faqat ularni jiddiy ogohlantirib qoʻy, oʻzlari ustidan hukmronlik qiladigan shohning huquqi va muomalasini ochiqchasiga ayt. Oʻzlari uchun shoh talab qilayotgan xalqqa Shomuil Egamizning hamma aytganlarini yetkazdi: — Sizlarga hukmronlik qiladigan shohning huquqi va muomalasi quyidagicha boʻladi: shoh oʻgʻillaringizni majburlab jang aravalarida va suvori lashkari safida xizmat qilishga oladi. Baʼzilarini oʻziga qoʻriqchi qilib tayinlaydi, ular shohning jang aravalari oldida yugurishadi. Shoh baʼzilarini mingboshi, baʼzilarini ellikboshi etib tayinlaydi. Qay birini shoh oʻz dalasini ekish–oʻrishga, yana boshqasini esa jang qurollarini va jang aravalarining asbob–uskunalarini yasashga majbur etadi. Qizlaringizni pardozchi, oshpaz, novvoy qilib oladi. Eng yaxshi dalalaringizni, uzumzorlaringizni, zaytunzorlaringizni olib, oʻzining aʼyonlariga beradi. Doningizning, uzumlaringizning oʻndan birini olib, saroy amaldorlari bilan boshqa aʼyonlariga taqsimlab beradi. Qul va choʻrilaringizni, eng sara hoʻkizlaringizni, eng sara eshaklaringizni olib, oʻzining ishi uchun foydalanadi. Qoʻy va echki suruvlaringizning ham oʻndan birini tortib oladi. Oʻzlaringiz ham unga qul boʻlib qolasizlar. Vaqti kelib, oʻzlaringiz istagan shoh dastidan faryod qilasizlar. Lekin oʻsha paytda Egamiz sizlarga javob bermaydi. Baribir xalq Shomuilning gapini eshitishni istamadi: — Yoʻq, ustimizdan bir shoh boʻlsin, oʻshanda biz ham hamma xalqlar singari boʻlamiz. Shohimiz bizga hukmronlik qilsin, oldimizda borib, urushlarimizda bosh boʻlsin, — deyishdi. Shomuil xalqning hamma gapini tingladi, soʻng ularning gaplarini Egamizga aytdi. Egamiz Shomuilga: — Ularning gapiga quloq sol, ustilaridan shoh tayinla, — deb amr berdi. Shomuil Isroil xalqiga: — Har kim oʻz shahriga qaytsin, — dedi.
Следующая публикация
Нет комментариев