Предыдущая публикация
Коръән могҗизасы🍀 🍀 🍀
Изге Коръәннең үзенчәлекләре бар. Коръән укуның һәм өйрәнүнең савабы турында хәдисләр бар. Мәкаләдә сүз бу хакта.
✅ Изге Коръәннең үзенчәлекләре:
1. Коръән — ул соңгы иңгән китап һәм аннан соң башкалар булмаячак.
2. Коръән — әүвәлге хәлендә безгә килеп ирешкән бердәнбер Изге язма. Кыямәт көненә кадәр ул шундый булыр, чөнки аны үзгәртүдән Аллаһы үзе саклый: "Без бит искә төшерүне (Коръәнне) иңдердек һәм Без аны саклыйбыз да!” (Коръән, “Әл-Хиҗер” сүрәсе, 9 аять)
3. Коръән бөтен кешелек дөньясына, бөтен дөньяга мәңгегә җибәрелгән, ә элекке язмалар билгеле бер халыкларга һәм кабиләләргә билгеле бер вакытка җибәрелгән.
4. Изге Коръән — ул иң бөек һәм мәңгелек, акылны һәм йөрәкне тетрәндергеч, барлык карашлардан да соклану уята торган китап. Коръән Мөхәммәд, саллаллаһү гәләйһи үә сәлләмгә Аллаһы тарафыннан бирелгән иң зур могҗиза булып тора .
5. Коръәндә чагылыш тапкан хакыйкать һәрвакыт кешеләргә хезмәт итәчәк. Ул кыйммәтсез һәм бернинди заманча фәлсәфи, фәнни, социаль ачышлар һәм күзаллаулар белән каршылыкка керә алмый: "... Хакыйкатьтә, бу гыйззәтле китап! Аңа ялган алдан да, арттан да килми. Ул хикмәт иясе, данлыклыдан иңдерү” (Коръән, “Фуссыләт (тәфсилләп аңлатылды)” сүрәсе, 41-42 аятьләр)
6. Коръән иң матур әдәби формада төзелгән. Коръән сүрәләре иңә башланган вакытка гарәп теле һәм гарәп әдәбияты чәчәк аткан. Гарәпләр искиткеч шигырьләр язганнар һәм яттан озын-озын поэмалар уку конкурслары үткәргәннәр. Гарәп җәмгыятен Аллаһы Тәгалә Коръәнне кабул итүгә һәм аңлауга әзерләнгән. Яхшы хәтер, матур сөйләм, сүзгә оста ия булу - болар барысы да исламга кадәр чорда гарәпләрдә үскәш тапкан.
Коръән гарәп телендә иңә башлагач, барысы да, хәтта иң яхшы сүз осталары да, шаккатып калганнар. Аларга әлегә кадәр мондый сүзләрне ишетергә туры килмәгән иде. Бер генә кеше дә яхшырак әсәрне иҗат итә алмады. Бу хакта Изге Коръәндә Аллаһы Тәгалә: “Әйт: “Әгәр бу Коръәнгә охшаш булган нәрсә булдырырга кешеләр белән җеннәр җыелсалар да, хәттә берәүләре икенчеләренә ярдәм күрсәтсәләр дә, алар аңа охшаш нәрсә булдыра алмаслар!” (Коръән, “Әл-Исра (төнге күчерү)” сүрәсе, 88 аять)
Шул ук вакытта Коръән Аллаһы ярдәме белән җиңел истә кала, аның теле даими рәвештә укыган кешегә аңлашыла, аның күрсәтмәләре буенча җиңел эш итәргә мөмкин: "Без Коръәнне искә алу өчен җиңел иткән идек, бер генә искә алучы бармы соң?" (Коръән, “Әл-Камәр (ай)” сүрәсе, 32 аять)
7. Коръәндә кешелек дөньясы әле күптән түгел генә исбатлаган күп кенә фәнни хакыйкатьләр чагылыш тапкан: ана карынында яралгының үсүе, галәм киңәюе, планеталарның һәм кояшның үз орбиталары буйлап хәрәкәте, Җирнең үз күчәре тирәсендә һәм кояш тирәсендә хәрәкәте, таулар, болытлар, яңгыр, океан тирәнлегендә караңгылык, баш миенең төзелеше һәм башкалар.
8. Коръән кешеләрне наданлыктан һәм ялгышулардан коткарды, туры юл күрсәтте, кешеләрне дин буенча дөрес яшәргә өйрәтте. Коръән диннәр арасындагы каршылыкларны юкка чыгарды: "Без сиңа китапны алар бәхәсләшкән нәрсәне аңлату өчен һәм иман китереп инанган кавемгә (халыкка) туры юл һәм рәхмәт буларак кына иңдердек"(Коръән, “Ән-Нәхел (бал кортлары)” сүрәсе, 64 аять)
✅ Коръән укуның һәм өйрәнүнең савабы турында хәдисләр
Пәйгамбәребез Мөхәммәд, саллаллаһү гәләйһи үә сәлләмгә, әйткән:
❗ “Коръән Аллаһ сүзедер.
Күпме савап бирәчәгән Аллаһ белер.
Коръән – укыган кешегә карангы кабердә юлдаштыр,
мизанда савап ягына авырлыктыр,
Кыямәттә шәфәгатьчедер,
сират күперендә иптәштер,
Җәннәткә юл күрсәтүчедер,
анда бөек дәрәҗәләргә менүгә сәбәптер,
кайгылы күңелгә шифадыр”.
❗ “Сезнең иң хәерлегез – Коръәнне өйрәнгән һәм башакаларга өйрәткән кеше”.
❗ “Өммәтемнең иң өстен гыйбадәте – Коръән укудадыр”.
❗ “Аллаһы бу китап белән кайбер кавемне зурайтыр, дәрәҗәсен күтәрер. Кайбер кавемне түбән төшерер”.
❗ “Кем Аллаһының китабыннан бер хәреф укыса, аның өчен укучыга бер хәсәнә (яхшылык) бирелер. Бер хәсәнә эченде ун савап бардыр”.
❗ “Күңелендә Коръәннән бер нәрсә дә булмаган кеше – харап бер өй кебектер”.
❗ Коръән Аллаһы Тәгалә тарафыннан җибәрелгән китап. Аның оешканлыгы, ягымлы яңгырашы, сөйләменең матурлыгы һәм аятьләр тезелеше, бу катапның Аллаһыдан булуына берәү дә шик калдыра алмый.
❗ Коръән теле — ул әдәбият, хөкемнәр, икътисад, сәясәт, тарих, тәрбия, укыту һәм дин теле. Коръән - ул хикәяләр, үткәннең тарихы, киләчәкнең фаразлары, фәнни хакыйкать, тормыш күренешләре һәм шартлары, тазалык, гигиена һәм үз-үзеңне тоту этикасы.
❗ Коръәнне укыганда, күп кенә галимнәр аның матур сөйләменә сокланалар. Төрле өлкә һәм һөнәр кешеләре анда могҗизалар күрәләр, тасвирлауның төгәллегенә, карарларның хаклыгына, раслауларның дөреслегенә гаҗәпләнәләр.
❗ Коръән белемнәре, аның тирәнлеге - ярсыз диңгезләр, санап бетергесез хәзинәләр. Коръәнне укы һәм фикерлә. Әгәр син аңа вакытыңны бирсәң, ул сиңа үзенең серләреңнән бүләк итәр. Коръәнгә күз сал, дикъкать белән кара —Аллаһыдан куркып, аның ризалыгын өмет итеп Коръән укучыга, Аллаһы Тәгалә чиксез нигьмәтләренә ишекләрен ачар. Шундый отышлы килешүне югалтма!
❗ Әгәр дә кешеләр Коръән турында уйласалар, күңел йозаклары чишелер иде, йөрәкләре йомшарыр иде, озак вакыт утсыз булган яктырткычлар яндырылыр иде. Аларның юллары нур белән яктыртылыр иде, күңелләре күтәрелер иде.
❗ Изге Коръән кешеләргә бөек мәрхәмәт, алар турында кайгырту, бәхетле итү, газаблардан коткару китабы. Һәм шунда китапның төп могҗизасы— ул бөтен кешелек дөньясына, Бөек Аллаһыдан иңгән белемне өйрәтә. Кешеләр күрергә һәм ишетергә, аңларга һәм белергә өйрәнәләр. Коръән дин, иман, игелек яки явызлык, хәләл яки харам турында уйлаучы кешеләргә аерма.
Лира ГАФИУЛЛИНА.
Теглар:
#балтачрайоны
#балтачевскийрайон
#дин
Следующая публикация
Нет комментариев