Предыдущая публикация
Умр ўтиб борар, билмайман ҳатто,
Қаерда сочилиб ётар сомоним.
Қаерда бўлсанг ҳам билгин, албатта,
Сен менинг яхшимсан менинг ёмоним!
Йиллар тўхтамади, беқур, бетоқат,
Сен томон талпинди афсус-афғоним,
Сен шуни унутма, эслаб қол фақат,
Сен менинг яхшимсан менинг ёмоним!
Қўй, халал бермасин бугун аламлар,
Ахир ғаниматдир бугун ҳар оним.
Майли, нима деса десин одамлар,
Сен менинг яхшимсан менинг ёмоним!
Қанча ёмон бўлсам, билгин шунчалик,
Оғриса оғриди жоним, жаҳоним.
Қанча ёмон кўрсам, билгин шунчалик,
Сен менинг яхшимсан менинг ёмоним!
Йиллар ўтаверди беун, бенасиб,
Осмонга ўрлади оху фиғоним.
Бугун айтажакман бағримга босиб:
СЕН МЕНИНГ ЯХШИМСАН МЕНИНГ ЁМОНИМ!
Следующая публикация
Нет комментариев