Интернет касалликми ёки овунчоқ? Унинг фойдаси ва зарари ҳақида батафсил танишинг.
21 аср-интернет асри. Ҳа, рости ҳам интернет асри. Бугунги кунда интернетнинг қулочи шу қадар ҳам кенгки, дунёнинг у четидан бу четига сониялар орасида хабар алмашиш ҳеч гап эмас. Унинг қулайликлари шу қадар кўпки, санаб саноғига етолмаймиз. Танганинг икки томони бор деганларидек, интернетнинг яхши ва ёмон томонлари бор. Бу дегани интернет яхши ё ёмон деганимс, бу ўша интернет истеъмолчисининг ўзига ва ирода кучига боғлиқ. Ҳозир сизлар билан ижобий ва салбий томонларини кўриб чиқамиз.
Интернетнинг ижобий (яхши), фойдали томонлари!
-Тезкор замонда ахборот ва техника, илм-фаннинг жадаллик билан ривожланишида интернетнинг фойдаси беқиёс. Биргина мисол қилиб оладиган бўлсак, тиббиёт соҳасида бир касаллик ёки дориворнинг янги тури сониялар орасида интернетга жойланади, ана марҳамат, тайёр маълумот.
-Тил ўрганиш қулай. Ҳа, албатта, хоҳлаган тилингизга онлайн таржима қилишингиз мумкин. Катта бир матнни ҳам зумда бошқа тилга ўгириб беради.
-Огоҳлантириш кучига эга. Ана бу бошқа гап, оддий мисол, об-ҳавонинг интернетда қулай билиб олиниши миллиардлаб одамларга кони фойда. Деҳқонлар, чорвадорлар, саёҳатчилар, оддий фуқаролар шундоқ интернетга уланиши ва об-ҳавони кўриши билан ишларини яхшилаб режалаштириб олишади. Ўзим ҳам никоҳ тўйимни интернетга қараб, бир ойлик об-ҳавони кузатиб, санани белгилагандим, чунки баҳорнинг инжиқ ҳавоси соат сайин ўзгаради (15-март эди), инсон умри давомида бир марта орзу-ҳавас ила тўй қилади ва ўша куни осмоннинг кулиб тургагига нима етсин!
-Интернет имконияти йўқларга катта имкониятлар майдони. Бунга қўшилмасдан иложингиз йўқ. Ахир ижтимоий тармоқларда минглаб ёшлар ўзларининг қизиқишларига биноан турли илмий-бадиий еғинлар ташкил қилишган.
-Интернет Ижодкорлар мактабидир. Бунга, менимча, ижод аҳлини тушунадиганлар қўшилса керак. Ҳаваскор ижодкорлар ўз ижод намуналарини тармоқларга жойлаб, минглаб мухлисларга ҳавола этади. Бу эса мухлисларнинг турли фикрларини келтириб чиқаради, қарабсизки, ижодкор изланади ва ижодий чиниқиб боради.
-Интернет-кашфиётлар майдони. Ҳа, ҳозир интернетни деб анчагина инсонларни кашф этдик, этмоқдамиз. Ўлмасбек Самарқандийни танирмидик? Муаззам Иброҳимовани танирмидик? Иқбол Юсуфни танирмидик? Айнан интернетни деб серқирра ижодкорларни кашф этдик. Манманлик бўлмасин-у, айнан ўзим ҳам интернетга уланиб, ижодларимни жойлаб борганимдан сўнг озгина чиниқдим ва ўз аудитория ўқувчиларимга эга бўлдим ва айнан нет орқали ижодларим катта нашриётларга етиб борди. Интернет бўлмаганда камина Алижон Сафаровнинг ёзганлари дафтарларда чириб йўқ бўлиб кетиши ҳам мумкин эди.
-Интернет мулоқотда тежамкордир. Смс ёзсангиз, 160 та ҳарфга фалон пул ейди, аммо интернетда бутун бошли китоб ёзсангиз ҳам ҳисобингиз миқ этмайди. Вайбер, Вацап, Телеграмм, Скейплар орқали хоҳлаганча мулоқотда бўлишингиз мумкин.
* * * * *
Интернетнинг зарарлари ва салбий (ёмон) томонлари.
-Иқтисодий емириб боради. Ойига 5 доллардан то 10 долларгача (бу фойдаланувчига боғлиқ) чўнагимизни қуритади. Емай-ичмай интернет учун еғамиз.
-Кўз нурига зарар. Соатлаб қолиб кетишимиз билинмагани билан кўзларимизни толиқтириб қўяди кўриш сезгилари зарарланиб, бора-бора жиддий зарарларга олиб келади, ҳатто кўзнинг заифлашиб қолишига, узоқни кўролмай, кўздан ёш оқиб қолишига олиб келади.
-Интернет жиззаки ва асабийликка олиб келади. Бир маълумотни ўқиб, кейин унисига ўтиб, кейин смслашиб, кейин комментларни кезиб, кейин тасмани титиб, кейин кимларнингдир номақбул ишини кўриб, асабий бўлиб қоламиз ва арзимаган нарсага ҳам атрофимиздагилар билан тортишиб қоламиз.
-Интернет-тарбиямизни ҳам бузади (ҳамманингмас, кўпчиликнинг). Битта далил, реал ҳаётда бировга қаттиқ гапиролмайдиган одам ҳам тармоқда бўкиб сўкишиб, ҳақоратлагиб кетади. Комментларку, жанг майдони. «Кўрмасам, ишим тушмаса, менга нима » деб ҳақоратлаб ташлайверамиз.
-Интернет-тузоққа илинишнинг энг осон жойи. Бу жиддий масала, тушунчаси кам одамлар тармоқлардаги ёвуз ниятли кимсаларнинг ёлғон ва ҳаволи гапларига учиб, билиб-билмай турли оқим ва бузуқ йўлларга кириб кетади. Уларнинг миясини шунақа заҳарлайдики, оқибатда содда ва бесавод кимсалар тайёр ўлжа бўлади ва келажак дарахтининг илдизига болта уради. Ўша ғаразли ниятдаги одамларнинг қурбони бўлади ва Ватанига, халқига хиёнат бўлиб, бир умр Ватанни, яқинларини кўролмасдан, итдек бўлиб хор бўлиб ўлиб кетади. Ҳатто жасади она ватан тупроғидан ҳам маҳрум бўлади. Азиз ёшлар, ўсмирлар, ёлғончилар тузоғига илинманг, Ватан, она олдидаги, халқ олдидаги бурчингизни адо этиб, уларга содиқ хизмат қилинг.
Булар интернетнинг менинг наздимдаги суръати эди. Бу билан интернетдан кетинг демоқчи эмасман, марҳамат, киринг, фақат яхши йўлда фойдаланинг, билсангиз интернет катта маълумотлар баъзаси. Ундан унумли фойдаланиб, илмингизни, тушунчангизни ошириб боринг.
Ҳурмат билан Алижон Сафаров.
Присоединяйтесь к ОК, чтобы подписаться на группу и комментировать публикации.
Комментарии 2