Мокшетне и эрзятне эряйхть марнек странаньконь келес и нльне омба масторса. Кяльс коре лама раднядонк шабрань Пензенскяй областьса. 2020 кизонь переписть коряс тяса лувондови 28 тёжяньда лама мокшэрзя. Улихть мокшень и эрзянь целай велет. И мезсь кеняртьфти, Пенза аймакса эряй ламоц мокшетне и эрзятне ванфнесазь эсь культураснон, койснон-обуцяснон, аф виздезь корхнихть тядянь-алянь кяльса. Синь ётксост Пензенскяй областень мокшэрзянь региональнай национально-культурнай автономиянь активистсь, мокшалясь Александр Борисов. Ня шитнень тейнек удалась корхнемс Александр Фёдоровичень мархта телефононь пачк и максомс теенза кой-кодама кизефкст.
- Александр Фёдорович, азонтт аф лама эсь колгат: коса шачеть-касоть, кит тядятне-алятне?
- Шачень мон Пензенскяй областень Сосновоборскяй райононь Водолей велеса. Родительне простой колхозниктольхть. Алязе, Фёдор Иванович, ульсь бригадиркс, тядязе, Прасковья Алексеевна, работцесь свинаркакс. Алязе рана тусь эряфста, тядязе ськамонза касфтозень вете шабанзон. Шарьхкотьф, аф тёждяль теенза, савсь эсь прянь аф ужяльдезь лама трудендамс. 1972 кизоня семьяньке ётась эряма Пензати сяда мала вастс—Ермоловка вели. Сон ащи ошть эзда колмогемоньшка вайгяльбень вастса. Тяса шумордайне школать и поступань тонафнема велень хозяйствань институту. Специальностьс коре мон зоотехникан. Стажезе 35 киза. Институтта меле сань покодема Бессоновскяй райононь Сосновка вели. Комсь киза трудендань «Васильевская птицефабрика» АО-нь инкубаторса. Кафта ковда инголе лисень пенсияс. Сосновкаса тячемс и эрян.
- Тон пяк лац корхтат мокшекс. Семьясонт, улема, най кайгсь родной кяльсь?
- Алязе национальностьс коре мокшель, тядязе—эрзяваль. И синь фалу кода эсь ётковаст, стане и минь, шабатнень мархта корхнесть эсь кяльсост—алязе мокшекс, тядязе эрзякс, и сембе шарьхкотькшнеме фкя-фкянь и мзярдовок ашеме визне кяленьконь эзда. Киньге пряса мяльге ашель корхтамс рузкс. Нльне мзярда ётаме эряма рузонь вели—Ермоловкав, кудса най корхнеме эсь кяльсонк.
- А тонцень шабатне содасазь мокшень кяльть?
- Пяк лац. Рьвязе, Лидия Васильевна, мокшава. И миньге мархтонза, кода тядязе и алязе, корхнетяма родной кяльсонк. Сяс и шабаньковок сонь лац содасазь. А вов уноконенди тянь ширде мзярс аш мезьса шнафтомс пря. Синь алясна мокша, а тядясна чувашка, эсь ёткова, шарьхкотьф, корхнихть рузкс. Сяс шабасна мокшень кяльть аф содасазь. Но мон сявине тя тевть эсь кядезон (рахай), арьсян, маластонь пингть пяшкодьсаськ тя афсатыксть.
- Александр Фёдорович, кода тейнек удалась содамс, тон пуроптоть эсь кудсот национальнай культурань уженя—ёмла музей. Мезе ванфтови эсонза и кода эвондась музеень пуроптомать колга мяльсь?
- Тядязе пяк кородозь малаткшнесь тянь или тонань колга лятфни паршихненди. Кулома карша сон кадозе тейнек ванфтомс алязень армейскяй службань щамонц—моряконь формать. Сон и арась сай пингонь музейть пуроптоманцты васенце аськолксокс. Мон коль сяда сидеста ушедонь арьсекшнема историять, атяньконь-бабаньконь, эсь колганк мялямть ванфтоманц квалма. Вдь ётай пингфтома аф ули сай пинге. Афкукс пяк питни содамс и мяляфтомс сянь, мезсь сотф родцень-плямацень, семьяцень, народцень мархта. Мезе ванфтови музейсон? Тяниень пингть тяза пуроптф кафта сятта лама экспонат. Ули, кепотьксонди, парь, кона кадовсь бабазень эзда. Эсонза сон ванфтозень рьвакс лисемань сембе паршиензон. Парьть лангса улихть эсь лацонь узорхт. Ся пингть вдь эрь семьять ульсь сонцень тяшксоц, конань коряс сон сотцевсь. Ули музейсон котф, конань тядязе кодазе эстеенза рьвакс лисемань паршикс. Ванфтовсь и кштирдема лапац, конань рьвакс лисемстонза теенза казезе крёстнавац. Улихть пешуфтат, нюрям, тарваз, сяканят, пихтембарь, нардамат, сире пингонь школьнай партат, сока, шкаень ликонят и лама мезе лия.
Музейть пуроптоманц ушедоманц мархта ряцок, вов ни 26 киза, вятян эрь ковонь семейнай журнал. Мезе тяшнян эзонза? Васендакиге семьяньконь эрь шинь эряфонц, кодама мяляфтови событият ульсть миньцонк. Тяда башка, тяшнесайне мокшэрзянь кунардонь койхнень-обуцятнень, конатнень сотцесайне сире ломаттнень эзда, юкстаф валхнень (эздост пуроптф тёжяньда лама ни), конат тячи юкстафт и аф нолявихть тевс. Тя журналти стане жа сувафтыне эсь родоньконь-пляманьконь историянц, удалась кочкамс кемонь поколениятнень колга информация. Нльне содаськ, кие родстонк-плямастонк васенцекс ульсь кстиндаф. Атянь-атяньконь лемоцоль Тума.
- Тон сувсят Пензенскяй областень мокшэрзятнень региональнай национально-культурнай автономияти. Кодама тефт вятят тя организациять эса?
- Сонь васенце целец—ванфтомс Пенза аймакса мокшэрзянь кяльхнень, культурать, койхнень-обуцятнень. Тянкса минь, конешна, кирттяма кеме соткст Мордовиять мархта. Саранскяйста пачфнетяма аф фкя лацонь литература—периодическяй изданият, мокшень и эрзянь поэттнень и писательхнень произведенияснон мархта книгат Пензенскяй областень школатненди, библиотекатненди. Велетнень эса, коса эряйхть мокшет и эрзят, эрь кизоня ётафнетяма Родной кялень ши, конань лемнесаськ мокшэрзянь содаф ломаттненди, кепотьксонди, Советскяй Союзонь Геройти Михаил Девятаевонди, сказительницати Серафима Люлякинати и лиятненди. А нинге эрь кизоня ётафнетяма «Вастома» мокшэрзянь культурань фестиваль.
- Александр Фёдорович, тяддень октябрьста Саранскяйса ётафтови Мордовскяй (мокшень и эрзянь) народть Межрегиональнай общественнай организациянц VIII Всероссийскяй съездоц. Арьсекшнят-аф самс и кодама кизефкст, койсот, эрявихть ваномс тя пуромксса?
- Тейне удалась примамс участия мокшэрзянь народть колма съездонзон эса и тяддевок пяк оцю мялезе повомс тя пуромксти. Но лиси-аф, няфтьсы пингсь.
Монь, кода мокша ломанень, конешна, пичефтьсамань кяленьконь ванфтомац. Аф секрет, што тяни од ломаттнень ламошкасна аф корхтайхть родной кяльсост, синь рузыякшнихть. А кда оттне аф кармайхть корхтама мокшекс, кяльсь юмай. Юмай кяльсь, юмай и народоньке. Вов мезть колга арьсезевома. Сяс съездса эряви ваномс-смекамс, кода шарфтомс од ломаттнень мяльснон национальнайти, кода касфтомс кяленьконь статусонц, штоба корхтамс тядянь-алянь кяльса улель аф визькс, а меколанкт, модна.
- Сюкпря, Александр Фёдорович, корхнеманкса.
Ольга ЕВДОКИМОВА.
Присоединяйтесь к ОК, чтобы подписаться на группу и комментировать публикации.
Нет комментариев