Предыдущая публикация
ТРУДС КОРЕ КАЗНЕСЬКЕ✨✨✨✨✨
Наталья Демкина, кона пцтай колмогемонь киза работай
санитаркакс, казьф Россиянь Трудонь и социальнай защитань
министерствать Почётнай грамотанц мархта
Мокшавась Наталья Демкина пцтай колмогемонь киза работай санитаркакс «Эряфкшуфненди и инвалиттненди Заречнай кудсь-интернатсь» Мордовия Республикань населениять социальнай обслуживаниянь государственнай бюджетнай стационарнай учреждениять Старошайговскяй филиалсонза. Наталья Владимировнанди тя учреждениясь—васенце и, тячиень шити, мекольце работама вастоц. Кодак аськолдазе порогонц и кярьмодсь санитаркань тевти, станяк и работай тянемс.
Тядде, Социальнай работниконь шить мяльса кирдезь, Наталья Владимировна лама киза совестьс коре работаманкса и социально-трудовой тевса сатфксонкса казьфоль Российскяй Федерациянь Трудонь и социальнай защитань министерствать Почётнай грамотанц мархта. Но, кода азозе санитаркась, тя казнесь аф аньцек сонь, а Заречнай кудть-интернатть Старошайговскяй филиалонц марнек коллективонц. И, аф ваномок сянь лангс, што Почётнай грамотать получазе ськамонза, эшкссонза ламотнень седикс-ваймокс трудендамасна.
«Аньцек марса ули кода получамс тяфтама оцю казнет и сатомс работаса оцю сатфкст»,—мярьгсь Наталья Демкина.
Эряфкшуфнень и инвалиттнень мархта колмогемонь киза санитаркакс работамста, лац-ряц сафтомс сембоса, улема ляпе седи, пара вайме ломанькс. И Сире Шайгавонь эряйсь Наталья Владимировна самай тяфтапнень эзда. Эрь шиня сон тиенди цебярь сятненди, кит уликс туфталхнень инкса аф якавихть эсь мельгаст.
Пара тефне, лиятнень инкса заботендамась мокшавати максфт Шкайть мархта белай свету эвондамстонза.
Шачсь-кассь Наталья Демкина Сире Шайгав велеса Чудаефнень лама идень семьяса, коса ульсть вете шабат. Сон инь оцюсель, мельганза нинге ниле сазоронза. Ужяленди, пяк рана тусь эряфста тядясна, Галина Васильевна. Теенза ульсь аньцек 41 киза. Сазорхнень колга заботась прась аляснон Владимир Ивановичень и акаснон лафтуснон лангс. Наташанди эста ульсь 20 киза, а инь ёмла сазоронцты аньцек колма кизонят.
Наталья Владимировна арась сазорнянзонды омбоце тядякс, касфтозень синь. Пичефти, но фкять эздост эряфонь сюрекиц сязевсь аш ни кода рана—стирняти ульсь 14 киза.
Старошайговскяй средняй школань 9-це классть шумордамдонза меле Наталья Владимировна тонафнесь Саранскяень 22№ училищаса поваркс-кондитеркс. Самай эста Чудаефнень кудс чакась зиянць—кулось Галина Васильевна. Шабатне эрявсть касфтомс, сяс акасна мрдась вели и лиссь работама санитаркакс эряфкшуфненди и инвалиттненди Старошайговскяй куду-интернату—эста тяфта лемоцоль, а тяни сон—Заречнай кудть-интернатть Старошайговскяй филиалоц.
Наталья Демкинать валонзон коряс, санитаркати маштома эрь эряфкшу ломанть и инвалидть мархта марстонь кялень вешема. Тя лувови инь васенцекс работаса. Вдь ляпе эрь валнясь кепси мяль, эжди.
Санитаркати шити несколькаксть ломаттне андомат и симдемат, сембось мельгаст урядама, штамат-эшелямат, лихтемат ульцяв прогулкас, а нинге—штамат кияксне, да и лия тевда аф кржа.
Коронавирусть пингста санитаркатне и лия персоналсь киза эрясть работама вастса кафтонь недяля. 14 шида меле вастозост сашендсть работас коре ялгасна—полафнесть фкя-фкянь, но COVID-19 лангс тестированиять ётамдонза меле. Тиендевсь сембось, штоба коронавируссь афоль пова учрежденияв, коса эряйхть эряфкшуфне и инвалиттне.
Тняра кизоста кой-кит эздост арасть санитаркати Наталья Демкинати эсь ломанькс. Синьге тонадсть Наташаснонды,—тяфта ламотне кельгомга сонь лемнесазь.
Мокшавась Сире Шайгавса эряй семьянц мархта. Мирдец, мокшалясь, Сергей Степанович, шачемас коре Лемдяйста. Демкиттнень колма стирьсна. Оцюсь, Татьяна Сергеевна, лисьф рьвакс, ули идняц. Валеранди киза пяле мархта. Омбоце стирьсна, Настя, тонафни Л.П.Кирюковонь лемса Саранскяень музыкальнай училищаса, шумордазе омбоце курсть. Ёмла стирьсна Катя тонафни школаса, 1 сентябрьста моли 9-це классу.
Наталья Владимировна пяк кельгсыне мокшавань щапнень-каряпнень, сяс стафтсь эстеенза национальнай костюм, конань мархта наряжакшни свадьбас, илас-коза.
Корхнеманьконь шумордамста азсь оцю спасиба сембонди, кит макссть оцю оценка санитаркань тевонзонды и казезь Почётнай грамотаса. И нинге весть шарфтсь мяль, што тя—аф аньцек сонь, а марнек коллективть сатфксоц.
Татьяна АЛЬШИНА.
Следующая публикация
Комментарии 32