Предыдущая публикация
2024 кизось - Семьянь киза☘️
ТЯДЯНЬ- АЛЯНЬ СЕДИЕНЬ И ВАЙМОНЬ ЛЯМБОСНА САТНИ ЛАМА ИДЕНДИ!
2024 кизось странасонк Россиянь Президентть Владимир Путинонь Указонц мархта азф Семьянь кизокс. Но аф аньцек тядде миньцонк семьятненди шарфневсь и шарфневи башка мяль. Коль касы лама идень семьятнень лувкссна, мезсь пяк и пяк кеняртьфти. Ламоцне сявондихть приёмнай шабат и касфтсазь синь родной лаца. Тяфтама кепотьксокс ащихть Ковылкинскяй райононь Малав велеста мокша ломаттне мирттне-рьвятне МАЛЬКИТТНЕ, конат тяниень пингть касфтыхть вете итть—синценнеть и ниле приёмнайхть.
Вов мезе удалась содамс тя семьять колга корреспондентоньконди, кона корхнесь Светлана Малькинать мархта. Светлана Александровна шачемас коре аф Малавонь, сась тя вели, кода корхнихть, рьвянякс. Мокшавать ёмла родинац—Старошайговскяй райононь Лемдяй велесь. Светлана Александровнань эряфонь киц ушедсь Евстифеефнень семьяса. Аляц, Александр Никанорович, аш шиса, а инголи лама киза заняфоль механизаторонь тевть мархта. Тядяц, Мария Никитична, каннессь почта, тяни пенсияса. Оцю мяльса морси сиде моронят «Синельга» творческяй коллективса Лемдяй велень Культурань кудть видеса ётафневи илатнень пингста, сяс мазы вайгяленц инкса содаф ламотненди. Семьясост ниле итть, конатнень ёткста Светлана сембода ёмлась.
Светлана Евстифеева Лемдяень школань 11-це классть шумордамдонза меле тусь Саранскяи, коса поступась 20№ училищав. Тонафнесь приборонь испытателькс. Училищать аделамдонза меле мрдась Лемдяи, ушедсь покодема велень контораса учётчицакс.
Самай эста арась содафокс сай пингонь мирденц—Малав велень цёрать, Иван Малькинонь мархта. Иван Семёнович сась Лемдяи, кода корхнихть, добувама—совхозу тишень скирдавама. Няезе Светлана Александровнань, кона работась контораса, тусь мялезонза баяравась-учётчицась. Мокшень стирське шарьхкодсь, што лия райононь цёрась—удалаф ломань, лама тевса машты-шарьхкоди.
Пингонь ётазь Иван Семёнович тердезе Светлана Евстифеевать рьвакс. Тяфта и эвондась Малькиттнень од семьясна. Кой-мзярс мирттне-рьвятне эрясть и покодсть Москуса, но ваймосост фалу ульсь Мордовиясь. Ашесть ляда странать столицас, мрдасть Ковылкинскяй району Малав вели, коса эрясь мирдть тядяц Матрёна Афанасьевна.
Иван Семёнович шачемас коре лама идень семьяста. Малькиттне шачфтсть-касфтсть ниле цёрат и стирь. Иван работась Малавса трактористокс, шофёркс, плотникокс… Эрь тевса сафнезе, сембоса маштсь. Тяфта тевсь ащи тянивок.
Семьянь азорть аляц, Семён Афанасьевич, кода и рьвять аляц, эста ни ашель шиса. Светлана Александровна и Иван Семёнович эрясть Матрёна Афанасьевнань мархта. Кирдсть жуватат, путнесть пере, тиендсть кудъётконь тефт. Светлана Александровна школаса урятциель, меле траксонь потьнихнень лангса бригадироль, лавкаса мишендиель. И Иван Семёновичка фалу тевботмосоль: лия плотникнень мархта шапондсь срупт аф аньцек Мордовияса, но и лия региоттнень эса.
Оцю кенярдемакс Малькиттненди арась стирьснон, Ольгань, шачемац. Мзярда топодсь киза пяле мархта, тядясь лиссь работама.
Касомок, Ольга Малькинась ушедсь кизефнема тядянц и алянц: «А мес ськамонан? Лиятнень улихть акасна-сазорсна, альнякасна-дуганцна, а монь кивок аш!»
Арьсесть-тисть мирттне-рьвятне Малькиттне и састь мяльс сявомс семьязост приёмнай шабаня—каземс седиень лямбоснон аф аньцек Ольгаснонды, но и ся идти, конанди судьбась ашезе макса тянь.
Тяфта Ольгань эвондась сазорняц Юля. Мзярда стирнясь повсь приёмнай семьяс, теенза ниле пяле мархта кизонятольхть. Юля Светлана Александровнань ушедсь лемнемонза тядякс, а Иван Семёновичень—алякс. Ольга аш ни кода кенярдсь: тяни соньге ули сазорняц! Стирнятне мусть марстонь кяль, арасть афкуксонь ялгакс.
Тядде Малькиттнень стирьсна Ольга шумордазе 9-це классть, теенза 15 киза. 10 кизоса Юлясь аделазе 4-це классть. Ольга Малькинась эряфонц ёрай сотомс медицинать мархта, сяс мялец поступамс медицинскяй колледжу.
Ольга тячи-ванды туй тонафнема, Юля ляды ськамонза. Пади, тага сявомс семьязонк идня? Тяфтама мяльхть-арьсемат састь Иван Семёновичень пряс и сон пачфтсь тянь колга рьванцты. А ся, ламос апак арьсек, кирдезе ширенц. Но, кле, кизефтемат Ольга и Юля. Стирнятне ашесть атказа. Меколанкт, кенярдезь васьфтезь тя кулять.
Малькиттне кочказь эрявикс документтнень, ётазь комиссиятнень-меснень.
«Мзярда молеме иднятнень ванома, няеськ ня колмотнень, мирдезе пшкядсь: «Нят миннет!»—азонды Светлана Алесандровна.
И вов аф кунара кудсост эвондасть нинге колма шабанят—стирня и кафта цёранят—родной браткат и сазорнясна.
Оцюнясь—Даниил, теенза 8 кизот, 7 кизоса Кирилл тядде моли 1-це классу, сазорняснонды Верониканди 4 кизонят.
Васенда Малькиттне синь несколькаксть усксезь ширезост инжикс. Даниил, Кирилл и Вероника эстокиге мусть марстонь кяль Ольгань и Юлянь мархта.
Малькиттнень оцю кудсна, коса вастсь сатни сембонди. Зрнянь кядь мокшалясь Иван Семёнович коль заняф эряма вастть сядовок цебярькс тиеманц мархта. Мирдсь и рьвясь кирдихть жуватат, путнихть пере.
Мокшавась Светлана Александровна мушенды пинге морсемс «Мокшаночки» коллективса, кона Малав велень Культурань кудть видеса. И тиендьсы тянь оцю мяльса. Нинге налхконды сценкатнень эса.
Малав велеста Малькиттнень семьяснон колга ули кода азондомс нинге. И трудонь кельгихть, и пара ваймот, и лиянди лездыхть. Но сянь мархта, што семьязост сявсть приёмнай ниле шабат, пря аф шнафтыхть. Аф тянкса, кле, тянь тиеськ, а саме мяльс максомс теест тядянь-алянь седиеньконь лямбоснон. И нинге. Мярьгсть, кда улель возможность, сявольхть сяда лама идня!
Татьяна АЛЬШИНА.
Следующая публикация
Комментарии 1