Торбеевскяй районца аш стама ломань, кона афолезе сода педагогическяй трудонь ветеранть, трудонь кельги мокшавать Р.А.Федосейкинать. А Варжеляй велеса сонь кудонц няфтьсазь ёмла шабатневок. Эряй аф ичкозе школать эзда. Кудонь кенкшенза панжадот сембонди. Сиренятне сашендыхть седикс-ваймокс корхнема, одонь кизоснон лятфнема. Сяда оттне сувсихть ширезонза лезксонкса, советонкса. Лама пялонза уленди и шабада. Синь сяда сидеста кизефнихть велеть историянц, сядонгольдень эряфонц колга, трудонь кельги ломанензон квалма. И Раиса Александровна примасыне сембонь, киньге аф обжасы.
Раиса Александровнань козя работань опытоц. Велень школати макссь 40-да лама киза. Мзярда сашендыхть ломатть Саранскяйста, Торбееваста, лия вастста, Варжеляень поселенияса покодихне васендакиге вятьсазь сонь пялонза. Раиса Александровна машты инжиень примама.
—Хуш и эрян ськамон, а кудозе най пяшксе ломаньда,—виденцясь Раиса Александровна.—Цёразе эряй Торбееваса. Тоса семьяц, кудоц, покодема вастоц, а седиец-ваймоц фалу Варжеляйть мархта.
Александр Егорович пяк кельгсы шачема-касома веленц, кудонц. Аф юкснесы тядянц.
Шачсь и кассь Р.А.Федосейкина Варжеляй велеса учителень семьяса. Тядяц, Раиса Васильевна, ульсь начальнай классонь учителькс, школати макссь 40-да лама киза. Стирнясь сидеста ванондсь тядянц мельге: кода сон аноклай урокс, кода проверсесыне шабатнень тетрадьснон. Кой-коста ашезь мадонда пялевес. А мзяра ётафтсь панжада урокта, мялень салай мероприятияда. Раиса Александровна шарьхкотькшнезе: учителень тевсь стака, но интереснай. Сяс кочказе тя профессиять сонцьке. И вестенге ашезь каенда. Вов ни мзяра киза пенсияса, а седиец сяка школать мархта. Пара мяльса лятфнесыне эсь учениконзон. 40 кизоста лама идь ётась кядялганза. Ульсть ётксост медалистт, республиканскяй олимпиадаса, кодама повсь пялькстомаса сяськихть. Сембе синь шнама ломатть.
—Минь классонк тонафнесь комозьда лама шаба,—азонды Федосейкинать ученицац О.В.Вельдина.—Колма ученикт сашендсть Сире Чётова велеста. Сембонди Раиса Александровна ульсь аф аньцек класснай руководителькс, но и омбоце тядякс. Макссь цебярь содамошит, тонафтомазь мокшень кяльть, литературать кельгома. Тянкса теенза тячемс азондан оцю спасиба.
Раиса Александровнань сембе учениконза музь вастснон эряфса. Елена Кучерова покоди УФСИН-нь системаса, Елена Тепаева—следователь-дознаватель Торбеевань внутренняй тевонь отделса, Людмила Федосейкина—юрист.
Педагогическяй трудонь ветеранць тячемс аньцек лямбе валса лятфнесыне и учитель ялганзон, конатнень мархта лама киза трудендась школаса. Тячемс покодихть школаса Нина Арсентьевна и Василий Серафимович Маскаефне, Анастасия Васильевна Федосейкина и лиятне.
Раиса Александровна пяк кельгсы сембе минценнеть. Ванфтсыне мокшень койхнень-обуцятнень, щапнень-каряпнень. Лац содазе мокшень поэтть А.С.Малькинонь. Аф ламос сон эрясь Варжеляйса. Тястонне рьвац, В.С.Цибискина. Раиса Александровна тонафнесь Варвара Сергеевнань племянниконц мархта фкя класса. Содаф поэтсь тячемс учительть мялямсонза, сидеста азонкшни колганза велень школаса тонафнихненди.
Р.А.Федосейкина вестевок ашезь вешенде эстеенза тёждя кит-ятт, ашезь панце казне мельге. Инь оцю казнесь эряфсонза—тя учениконза. Тячемс и пря шнафты мархтост, и гордость инксост маряй.
Илья СИДОРОВ.
Присоединяйтесь к ОК, чтобы подписаться на группу и комментировать публикации.
Комментарии 11