КОТКУДАВНЭ

(Эрзянь ёвкске Тимо нуцьканстэнь)
Вейке эрзянь покш вирьсэ, сэрей-рацяня тумо ало ульнесь коткудавонь пизэ. Коткудавтнэ тейсть эйсэнзэ ламо иень перть. Иестэ иес, иестэ иес. Эрьва кизэнть перть чинь чоп сынь пурнасть вишка коське тарадкеть, тикше недькскеть, кодоркскеть, керь пелькскеть. Вачкасть весе неть пелькскетнень маарс. Маарось кассь ды теевсь ломанень карксамова сэрьсэ. Сон лембель, чевтель. Коткудавтнэнь туртов сон ульнесь теке ош. Сынь потсонзо уцесть, печтякшность кувака телетнень. Истямо маарось пиземенеяк а начтави, виев варманеньгак а пувави-а салави, цят якшамонеяк а кельмевтеви. Кизна коткудавтнэ чоп важодить, тельня удыть кеме, кувака удомасо.
Коткудавтнэнь ули инязораваст, Коткудаваст. Сон алыи вишка ашо алнэть. Конатнень эйсэ мейле лиснить од коткудавнэть. Коткудавтнэнь ютксо улить алонь мельга якицят-ваныцят, пизэнь ушмант-ванстыцят ды ярсамкань вешницят-таштыцят ды пизэнь витницят-вачкицят.
Эрьва коткудавонть ули эсензэ тевезэ, конанть сон паро мельсэ топавты.
Вирень коткудавтнэ чопода тюжат. Рунгинест цить мерить. Прясост покш сельминеть. Пильгинест - меньчевицят, теке кеме уськинестэ теезьть.
Весть, кизэнь самсто, вейке ашине алнэстэнть лиссь вишка од коткудавнэ. Сон ульнесь ашола тюжине. Ярсамояк а маштыль. Андыця коткудавтнэ сонзэ андсть, трясть, мельганзо якасть. Кавто таргонь перть тонавтызь ярсамо, якамо. Васня пизэнть чоподасонзо. Мейле кармасть шкань-шкань ливтнемензэ ушов, чивалдос....
Сась чи, зярдо коткудавнэсь ськамонзо лиссь коткудавонь пизэстэнть. Ды лия коткудавтнэнь марто сыргась ярсамкань вешнеме. Васня сон лия коткудавтнэнь ютксо чийсь икелев коткудавонь яннэванть. Ванкшнось перть пельга, кузнесь тикшинень пряс, ютнесь кевнень перькава. Вана икелензэ стясь пирявксокс мелянь сэря. Коткудавнэнть сась мелезэ куземс сонзэ лангс ды варштамс перть пельга. Нолаштнезь куйсь. Сэрянть лагозо пек валаняль, цитниця. Коткудавнэсь зярыяксть чийсь-тейсь кувалманзо мекев-васов. Валгсь ды тусь лия коткудавтнжнь мельга. Вана икеле молиця коткудавось муйсь ашо сукске. Куя! Тантей, паряк. Весе коткудавтнэ кундасть эзэнзэ ды кармасть ускомонзо коткудавонь пизэс. Вишка коткудавнэськак тенст лездась мезе вийсэ. Тевесь ульнесь а шожда! Ды коткудавтнэннень сон изнявсь.
Истя од коткудавнэсь ульнесь эсь васенце покш тевсэнзэ.
***
Эрюш