Вынікі работы за мінулы год, планы на перспектыву, аналіз дасягнутых поспехаў і дапушчаных пралікаў былі абмеркаваны падчас справаздачнага сходу ў ААТ “Дабаснянскае”. Удзел у яго рабоце прынялі першы намеснік начальніка райсельгасхарчу райвыканкама Антаніна Смятана, старшыня прафсаюзнай арганізацыі работнікаў АПК Віктар Ставер.
З дакладам выступіў дырэктар сельгаставарыства Аляксандр Вербінаў. Ён адзначыў, што на працягу мінулага года назіраліся як станоўчыя тэндэнцыі да павелічэння вытворчасці і стабілізацыі фінансавага стану гаспадаркі, так і некаторыя недапрацоўкі.
Так у галіне раслінаводства было атрымана прадукцыі ў супастаўных цэнах на 4 млн 9432 тыс. рублёў, што больш паказчыка 2022 года. Нядрэнна спрацавалі і мясцовыя жывёлаводы: у 2023 годзе яны атрымалі прадукцыі больш чым на 7 млн рублёў, што таксама перавысіла лічбы папярэдняга года.
Адной з галоўных задач раслінаводчай галіны дырэктар назваў забеспячэнне буйной рагатай жывёлы добрай кармавой базай. Летась дабаснянцы ў гэтым плане папрацавалі даволі добра. Было нарыхтавана больш за 13 тыс. т сенажу, 12966 т сіласу і 1283 т сена, што дазволіла забяспечыць грамадскі статак кармамі пад поўную патрэбу, нават з запасам. На 1 умоўную галаву жывёлы атрымалася па 33,2 ц/к адз., з іх травяністых – 27,9 (+0,7 ц/к адз.)
Асноўную долю даходаў сельгаставарыства забяспечвае жывёлагадоўля. Пагалоўе БРЖ – 3463 галавы, з іх 910 – каровы. За апошні год колькасць жывёлы павялічылася на 95 галоў. Валавы надой малака за 2023 год склаў 5650 т, што вышэй паказчыка 2022 года на 20 т. Рэалізацыя малака – 5065 т. Усё яно было адпраўлена на перапрацоўчае прадпрыемства гатункам “экстра”.
Па словах Аляксандра Уладзіміравіча, важкі ўклад у павелічэнне вытворчасці малака ў мінулым годзе зрабіў калектыў МТФ “Добасна”, дзе атрымалі прадукцыі на 145 т больш, чым у 2022 годзе, а таксама работнікі МТФ “Пясцова”, дзе надой на адну фуражную карову склаў 7005 кг.
Валавы збор цукровых буракоў склаў 6829 т (ураджайнасць 300 ц/га). На рэалізацыі “салодкай” прадукцыі зарабілі 772 тыс.руб, больш, чым у папарэднім годзе.
Нягледзячы на няпросты фінансавы стан, у сельгаставарыстве праводзіцца мэтанакіраваная работа па абнаўленні машынна-трактарнага парка. Тут набылі збожжаўборачны камбайн, барану, касілку, культыватар, граблі, размеркавальнік мінеральных угнаенняў і іншае.
Ацэньваючы праведзеную работу і абагульняючы атрыманыя вынікі, Аляксандр Вербінаў адзначыў, што, не ўсё магчымае было зроблена, дзесьці недапрацавала агранамічная служба, парушэнне тэхналогіі не дазволіла жывёлаводам атрымаць больш прадукцыі. Усё гэта павінна быць выпраўлена ў бягучым годзе.
Напрыканцы свайго выступлення Аляксандр Вербінаў заўважыў, што ў сучасных умовах ужо недастаткова проста павялічваць аб’ёмы вытворчасці прадукцыі, неабходна паляпшаць яе якасныя паказчыкі, іншымі словамі, рабіць канкурэнтаздольнай.
У бягучым годзе калектывам ААТ “Дабаснянскае” плануецца павялічыць ураджайнасць збожжавых і зернебабовых культур, цукровых буракоў. Над гэтым плённа павінна папрацаваць агранамічная служба. Стаўку таксама робяць на павелічэнне надояў малака і сярэднесутачных прываг БРЖ.
Звяртаючыся да ўдзельнікаў справаздачнага сходу, Антаніна Смятана адзначыла, што сельгаставарыства дасягае неблагіх вынікаў у дзейнасці, але ёсць яшчэ перспектывы для далейшага развіцця, паляпшэння эканамічных паказчыкаў, якія, у сваю чаргу, станоўча адаб’юцца на заробках і дабрабыце працаўнікоў.
Ганаровымі граматамі ўпраўлення па сельскай гаспадарцы і харчаванні райвыканкама былі адзначаны Анатоль Кучынскі і Канстанцін Калаткоў (на фото).
Падзяка раённай прафсаюзнай арганізацыі работнікаў АПК была аб’яўлена Надзеі Русавай.
Граматамі былі адзначаны – аператар машыннага даення Ганна Ганчарова, якая ад кожнай фуражнай каровы надаіла па 7516 кг малака, цялятніца Наталля Кучынская, дасягнуўшая стопрацэнтнай захаванасці цялят, жывёлаводы Алена Найданава і Галіна Міхалёва, за дасягненне высокіх паказчыкаў у рабоце.
Людміла СЯМЁНАВА. Фота аўтара.
Газета "Кіравец" выпуск от 15 сакавіка 2024 года
Нет комментариев