Кадерле имандаш туганнарым, сезнең белән бер мөһим һәм актуаль темага сөйләшәсе килә. Күпләр бүген, бу дөньяны калдырып бакыйлыкка киткән кешеләр турында болай дип язалар: "урыны җәннәттә, рухы тыныч, туфрагы җиңел булсын". Бу сүзләр, кайгы уртаклашу өчен кулланыла торган татар телендәге гыйбарә һәм туганнары, якыннары, ягъни аларны югалткан кешеләр өчен ихтирамлык күрсәтү.
Һәм әлбәттә мин кеше буларак аңлыйм - мәрхүмгә иң яхшысын телисе килә, шуңа күрә барысы да «җәннәттә» урын телиләр дә инде.
Бер мисал: Беркөнне, сугыш хәрәкәтләрендә һәлак булганнар турында әйтелгән менә шундый комментарий укыдым: «сугышчының урыны җәннәттә, рухы тыныч, туфрагы җиңел булсын, туганнарының кайгысын уртаклашам. Сезнең догаларыгыз ишетелде, ул коткарылды, аның җаны җәннәттә, сугышчы булу - мәңге яшәү!». Комментарий буенча: Бу кеше өчен, исән чагында гыйбадәт кылынган һәм аның патшалыкка эләгүе күздә тотыла һәм сугышчы булу - коткарылган булу дигән сүз.
Бу чынлап шулаймы?
Изге Язмага мөрәҗәгать итик һәм Аның котылу турында нәрсә сөйләвен һәм Ходай Патшалыгына (җәннәткә) ничек эләгеп булуны карыйк.
Бу мәсьәләдә безне нәкъ менә Аллаһы Сүзе генә яктырта ала бит. Чөнки чын мәсихчеләр кеше акылы белән яшәми.
Бу турыда Инҗилдә болай дип язылган:
«Шул вакыттан алып Гайсә: – Тәүбәгә килегез! Күкләр Патшалыгы инде бик якын! – дип игълан итеп йөрде».
Инҗил Маттай 4:17
Раббы Гайсә җиргә килгәч, күкләр Патшалыгы якынайды.
Ничек итеп?
Бу сүзтезмәне тикшерик - әгәр патшалык бар икән, ягъни бу патшалыкның патшасы да булырга тиеш. Раббыбыз Гайсә Мәсих шушы патшалыкның патшасы булып тора да инде.
Һәм, әлбәттә, һәр патшалыкта бу патшалыкның патшасына буйсынырга кирәк. Ә Күкләр Патшалыгында яшәргә теләүчеләр, нибары Гайсә Мәсихкә генә буйсынырга, Аңа үз тормышын тапшырырга, Аның әмерләре буенча яшәргә тиеш.
Шул сәбәпле, Мәсих безне тәүбә итәргә чакыра. Һәр кешегә Аллаһы каршында тәүбә итеп һәм вәгъдә ителгән Коткаручыны - Мәсихне күрергә, Аңа үз тормышын буйсындырырга тәкъдим ителә.
Шуңа күрә «Күкләр Патшалыгына ничек эләгергә?», - дигән сорауга җавап бирергә кирәк.
Беренчедән: тәүбә итү аша Аллаһы белән татулашырга һәм Гайсә Мәсихне үзеңнең Ходаең һәм Коткаручың, Күкләр Патшалыгының Патшасы дип кабул итәргә кирәк. Менә ничек Раббы Гайсә Мартага мәңгелек тормыш турында аңлата.
«Гайсә аңа болай дип җавап бирде:
– Мин – терелү һәм тормыш. Миңа иман итүче кеше үлсә дә, тереләчәк. Миңа иман итеп яшәүче һәркем исә һичкайчан үлмәс. Син моңа ышанасыңмы? – Әйе, Хакимем! Синең дөньяга килергә тиеш булган Мәсих, Аллаһы Углы икәнеңә ышанам, – диде Марта». Инҗил Яхъя 11:25-27.
Икенчедән: Бу Патшалыкның Патшасы Гайсә Мәсихне тыңлап, Аллаһыга иман итү кирәк. Мәсих безгә болай ди:
«Сезгә хак сүз әйтәм: Минем сүземне тыңлаучы һәм Мине җибәргән Затка иман итүче кеше мәңгелек тормышка ия. Ул кеше хөкемгә дучар булмаячак, чөнки инде үлемнән тормышка күчкән була». Инҗил Яхъя 5:24.
Шулай итеп күрүебезчә – Патшалык һәм Җәннәткә инү үлгәннән соң башланмый. Кызганычка каршы, ул кеше регалияләре, титулдары һәм үлгән кеше өчен дога кылу сәбәпле дә килми.
Ул монда җирдә Аллаһы каршында тәүбә итүдән башлана. Мәсихне үз Ходаең һәм Коткаручың дип кабул иткәннән соң, кеше монда коткарылу ала һәм аны бөтен гомере буена, Раббы белән бергә, Аңа ышанып, Аның ихтыярын үтәп яши.
«Гайсәне Хаким дип икърар итсәң һәм Аллаһының Аны үледән терелтүенә йөрәгең белән инансаң, котылачаксың. Йөрәк белән иман итү Аллаһының хаклыгын бирә, ә иманны тел белән тану – котылу алып килә».
Инҗил Римлыларга хат 10:9-10
Җирдә, әлегә исән чагында тәүбә итмәгән кеше, үлгәннән соң тәүбә итә алмый һәм шулай ук аның Җәннәттә урыны юк... Кызганычка каршы күңелсез хәбәр, ләкин чын хәбәр.
Фатихалы булыгыз!
Присоединяйтесь к ОК, чтобы подписаться на группу и комментировать публикации.
Нет комментариев