Предыдущая публикация
Аллаһыга һәм кешеләргә рәхмәтле булыгыз...
«Нинди генә хәлдә булсагыз да, Аллаһыга рәхмәтләр әйтегез, чөнки сездән, Гайсә Мәсихнеке булган кешеләрдән, Аллаһы шуны тели».
Инҗил 1 Тессалуникәлеләргә хат 5:18
Рәхмәтле мәсихселәр Аллаһыны рәхмәтле итә. Безнең Раббы Аллаһыга һәрвакыт рәхмәт әйтерлек нәрсәләребез бар. Хәтта иң авыр һәм уңайсыз шартларда да без, безгә ярдәм итүче Ходаебыз кулын күрә алабыз һәм күрә белергә тиешбез.
Изге Язма безне һәрнәрсәдә рәхмәтле булырга, шулай ук өзлексез дога кылырга һәм һәрвакыт шатланырга чакыра. Бу эшләр һәрвакыт үзара бәйләнгән. Әгәр без бертуктаусыз дога кылабыз икән, бездә һәрчак күкне һәм җирне барлыкка китерүче Мәңгелек Аллага шатланырга һәм рәхмәт әйтергә нигезебез җитәрлек булачак.
Шулай ук Аллага да, кешеләргә дә рәхмәтле булу бик мөһим.
Раббы рәсүле Паул болай дип дәвам итә: «…чөнки сездән, Гайсә Мәсихнеке булган кешеләрдән, Аллаһы шуны тели».
Бу сүзләр рәхмәтле булуга да, һәрвакыт шатланырга, өзлексез дога кылырга һәм барысы өчен дә рәхмәт әйтергә дигән үтенечләргә дә кагылырга мөмкин.
Әгәр Ходай куша икән, димәк Ул һичшиксез ярдәм итәчәк. Ул безнең һәр догаларыбызга ачык, йөрәгебезне тынычлык һәм шатлык белән тутыра, бөтен дөньяны гына түгел, бөтен тормышыбызны һәм шартларыбызны да үз кулында тота.
«Гайсә Мәсихтә» дигән сүзләр Гайсәнең безне бу нәрсәләргә үзенең җирдәге хезмәте вакытында өйрәткәнен хәтерләтә. Ул Үзенең үрнәге белән, безгә шатланырга, бертуктаусыз дога кылырга һәм барысы өчен дә рәхмәтле булырга кирәклеген күрсәтә.
«Һәрвакыт шатланыгыз». Инжил 1 Тессалуникәлеләргә хат 5:16
Бу, Инҗилдә иң кыска шигырь. Аның кыска булуына карамастан, ул шатлыкка кагылышлы мөһим үгет-нәсихәтне ача. Изге Язма чын шатлык Аллаһыда дип әйтә — «Хаким Гайсәдә һәрвакыт куаныч табыгыз, кабатлап әйтәм: куаныч табыгыз!» Инҗил Филиппуйлыларга хат 4:4
Безнең Аллаһыбыз игелекле һәм үзгәрешсез, шуңа күрә безнең шатлыгыбыз анда тулы һәм даими. Раббы Аллаһыбыз Гайсә Мәсихтә без, хәтта тән кайгысы булса да, шатлана алабыз —«Безне көендерәләр, ә без һәрвакыт сөенәбез. Без ярлы, шулай да күпләрне баетабыз. Безнең бернәрсәбез юк, шулай да без һәрнәрсәгә ия». Инҗил 2 Көринтлеләргә хат 6:10.
Әгәр чын мәсихче Коткаручыга иман итүен дәвам итсә һәм аның шатлыгының чыганагы Гайсә Мәсих булса, бу чакта иманлы кеше һәрвакыт, хәтта бөтенләй уңайсыз шартларда да, шатлык тоярга мөмкин.
Мәсихнең чын гыйбадәтханәсе - шатлыкка тулы гыйбадәтханә. Анда шатлык һәм җиңү атмосферасы хөкем сөрә, аның һәр әгъзасына ышаныч һәм дәрт бирә. Тагын бер мөһим аспект бар. Раббы Гайсә Үз шәкертләрен болай дип өйрәткән: «...исемнәрегезнең күкләрдә язылуына шатланыгыз». Инҗил Лүк 10:20б. Мәсихчеләрнең шатлыгы аларның котылганлыгын һәм мәңгелек тормышка ия булуларын аңлауда. Шатлык хисләрен ачык чагылдыру кеше өчен табигый, урынлы һәм кирәкле.
Якыныңа яхшылык кыл...
«Карагыз аны, берәү дә явызлыкка явызлык белән җавап бирмәсен. Һәрвакыт бер-берегезгә һәм бар кешеләргә яхшылык эшләргә тырышыгыз».
Инҗил 1 Тессалуникәлеләргә хат 5:15
Бу боерыкны Аллаһы безнең һәрберебезгә әйтә. Әгәр кемебез кемгә булса да явызлык өчен яманлык кыла икән, ул Аллаһы алдында гөнаһлы.
Ишетегез, явызлыкка явызлык белән җавап бирмәгез, бу сүзләр безнең өчен мөһим булып тора. Чөнки бу безгә карата әйтелгән, Аллаһы теләге...
«Һәрвакыт» дигән сүз, без кешеләргә карата яхшылык кылуны вакыты - вакыты белән, я безгә уңайлы булганда гына түгел, ә һәрвакыт дигәнне аңлата.
Ә «эзләгез» сүзе активлыкны күрсәтә. Чөнки безнең мөмкинлек булган чакта, без яхшылык эшли алабыз. Өстәвенә, безгә яхшылык эшләү мөмкинлеген табарга гына түгел, хәтта аны тудырырга кирәк.
«Яхшылык» - бу сүз әлеге контекстта явызлыкка каршы куелган сүз. Чын мәсихче, иманлы кеше буларак явызлык өчен яманлык белән җавап кайтарырга тиеш түгел, ә яманлык урынына яхшылык эшләргә мөмкинлек эзләргә тиеш.
«Бер-берегезгә һәм барысына» дигән сүзләр, безнең иманбыз талаптары буенча, без мөмкин булганча барлык кешеләргә, әүвәле имандашларга, шуннан имансызларга яхшылык эшләргә тиеш, дигәнне аңлата
Тормышта, кешеләрнең еш кына безгә каршы гаделсез эш иткән очраклар була. Рәсүл Паул заманында гадел җавап бирү норма булуга карамастан, мәсихчеләр этикасы нигезендә үзең өчен үч алудан тыелып тору бик яхшы булыр. Чөнки Мәсих шулай эшләгән: «Мыскыл ителгән вакытта Ул Үзе мыскыл итмәде, газап чиккәндә янап куркытмады, Үзен гадел Хөкем итүчегә тапшырды». Инҗил 1 Петердән хат 2:23
Бүтәннәрнең безгә яманлык яки зарар китерүе һәм безнең дә аларга карата шуны эшләгәндә, яисә бүтән төрле зарар китергәндә, моның өчен үч алуыбызны акламый. Безгә, үзебезнең рәнҗетүчеләрне гафу итәргә кирәк. Мондый мөнәсәбәт бары тик чын мәсихчеләргә генә хас күренеш.
Имансыз, Аллаһы сүзен белмәгән кешегә, явызлык өчен явызлык белән җавап бирү табигый хәл. Ләкин безгә, чын мәсихчеләргә моңардан өстен булу бик мөһим.
Барыгызга да тынычлык һәм мәрхәмәтле тормыш телим!
Следующая публикация
Нет комментариев