Hüseyn Arif Qaçaq Kərəmin soyundan olub. Böyük Vətən müharibəsi başlayanda orduya çağırılıb, müharibədə iştirak edib.
Uşaqları ona “ata” yox, “Söyün qağa” deyə müraciət edirmiş.
Lətifələr qəhrəmanı, məzəli insan kimi tanınan Hüseyn Arifin ömrünün xeyli hissəsini dərd-qəm içində keçirən biri olduğunu çox adam bilmir. Tək oğlu Arifin ölümü onun həyatını alt-üst edib. 21 yaşlı oğlu Arif avtomobil qəzasında öləndən sonra Hüseyn Hüseynzadə Hüseyn Arif imzasıyla yazır.
"Bir dağ kəli yaraladım zirvədə" misrası ilə başlayan şeirində şair oğlunun ölümündə özünü günahkar bildiyini belə ifadə edir:
Birdən-birə elə çırpdı özünü,
Sağ buynuzu qopub qaldı qayada.
Ey Hüseyn, qısa elə sözünü,
Bu qan səni tutasıydı, tutdu da...
Ateist olub. Uşaqlarını da o ruhda tərbiyə edib. Yəqin bu səbəbdən ağsaqqal dediyi dostu İsmayıl Şıxlı öz aralarında Hüseyn Arifə “Kafir” deyirmiş.
Gəncliyində məşhur aşıq Aşıq Mirzənin qızını sevib. Ancaq qovuşmayıblar. Hüseyn əsgərlikdə ikən Bənövşə ərə gedib. Sonralar şairə özündən 9 yaş kiçik, 16 yaşında bir qız göstəriblər, gözəl olduğundan şair ona vurulub. Evlənməyə razılığını alıblar. Qız onu oxudacağına söz alandən sonra Hüseynlə ailə qurmağa razı olub. Ancaq şair bir çox sevgi şeirlərində “İlk və son məhəbbətim” deyə Bənövşəyə işarələr vurub.
Situasiyadan yumorla çıxmağı varmış. Məsələn, ona eşq elan edən şairə xanıma, “Arvadla məsləhətləşim, sizə bir söz deyərəm” - deyibmiş.
SSRİ Xalq artisti Zeynəb Xanlarova ilk dəfə onun şeirinə bəstələnmiş musiqi ilə efirə çıxıb, “Qonşu qız” mahnısıyla... Sözləri Hüseyn Arifin, musiqisi Ələkbər Tağıyevindir. Amma sonralar danıb bu faktı. Deyib, öz mahnımla çıxmışam. Halbuki o vaxt gənc bir qızın mahnısını heç vaxt efirə buraxmazdılar. Bu fakt televiziyanın “Qızıl fondu”nda da öz əksini tapıb.
Deyilənə görə, Hüseyn Arif şərqşünaslıq fakültəsini fərqlənmə ilə bitirsə də farsca bilmirmiş.
Cəmi 68 il ömür sürüb. Amma kim bilir, oğul dağı olmasaydı, daha neçə il yaşaya bilərdi. Şeirlərinin birində belə deyir:
Hüseyn Arifəm, közə dözərdim,
Enişə, yoxuşa, düzə dözərdim.
Səksənə, doxsana, yüzə dözərdim –
Əllidə Arifi itirməsəydim.
Allah rəhmət eləsin!
Присоединяйтесь к ОК, чтобы подписаться на группу и комментировать публикации.
Комментарии 7