Предыдущая публикация
ӨЗҮН ТАППАЙ КАЛГАН АЙЫМ.
Сезим, эң сонун кыялдары менен өзү жактырган мырзага турмушка чыгат. "Бир үй-бүлөбүз, өмүр бою бирге болобуз" деп, бүт сүйүүсүн жолдошуна арнайт. Жолдошун ыраазы кылып жашаганды жакшы көрөт. Жакшы көргөн тамагын жасап, кийимдерин таза кармап, жумуштан жылмаю менен тосуп алат.
Эч бир суроону жолдошусуз чечпейт.Бардык жерде жолдошун эске алат. Жүрөгүндө ар дайым аны бийик коёт. "Жакшы жубай болуум керек" деп, аял өзүнөн көптү талап кылып, жолдошу жубайынан эмнени күтсө ошонун баарын берүүгө аракет кылат.
●Жолдошунун каалоосун аткарат. Өзүнүкүн айта албайт же эң акыркы орунга коёт.
● Чарчап атса да убакыт бөлөт. Кеч келгенине карабастан түнкү уйкусун бузуп курсагын тойгузат.
● Кийимдерин аппак кылып үтүктөп, жакшы карайт. Өзү эски кийими менен жүрөт. Жаңы кийим сурабайт. Акчасын аяйт.
Бара-бара аялдын энергиясы кете баштайт. Жолдошун сүйүп, бүт күчүн жумшаганы менен күйөсү аялынын аракетине кайдыгер мамиле жасай баштайт. Аял бунун баарын күйөсүнөн корккон үчүн эмес, сыйлаган үчүн жасап атканын эске албайт. Жубайы канчалык көңүл буруп, жакшы мамиле жасаган сайын күйөсүнүн текебердиги күчөй берет.
Жубайына берген убадасын унутат. Аялга бүт милдетти артып, талабы күч алат. "Эч жака кете албайт" дегенсип 2 баласына карабастан, жубайын моралдык кысымга ала баштайт.
● "Аял жакшы эр жакшы" деген макалды аялынын кулагына куюп, өзүнүн кыла албай калган иштери үчүн ар дайым жубайын күнөөлөйт.
● Жумуштан кечигип кармалып калса, жаман оюн таңуулап, обу жок кызганып жүрөгүн оорутуп сүйлөйт.
● Тууган, достору менен катыштырбайт. Аялы жакын адамдары менен баарлашып, сырдашып, күлүп отурушун көп каалай бербейт. Аларды да жаман ойлоп "аялымды бузат" деп жакын адамдарынан алыстатат. Бирок ошол эле учурда үй-бүлөдөгү тынчтыкты өзү бузуп атканын мойнуна алгысы келбейт.
● Аялынын өсүп-өнүгүүсүн каалабайт. Ички дүйнөсүндөгү каалоосу кызыктырбайт. "Аялым менден ашып кетсе уят болом" деп, кур намысы менен өсүп келе жаткан гүлдү жула берет. Бирок аялынын жакшы сапаттары, чыдамдуулугу менен сыймыктанууну билбейт.
● Ар дайым Сезимдин артыкчылыктарын басынтып сүйлөйт. Сезим эмнеден кубаныч алса, ошол кубанычын көз жашка айлантат. Бир аз эле бир нерсени туура эмес кылып алса, эмне деген сөздөрдү айтпайт. Көпкө жемелейт. Аркасынан ээрчип сүйлөп, майдаланат. Ошол эле үчурда үй-бүлөдө эң биринчи өзү башчы, жоопкерчиликтүү экенин унутат. "Баарын аял жасаш керек" дегенсип Сезимди бирде ыссык сууга, бирде муздак сууга салып, эмоционалдык жактан көп кысым көрсөтөт.
Жан дүйнөсү жанчылган Сезимдин абалы оорлошо берет. Канча жолу кечирди, чыдады, моюн сунуп баш ийсе да эч кандай жыйынтык чыкпайт. Таптаза сезими менен бүт сүйүүсүн күйөсүнө арнап, кор болгону үчүн абдан өкүнөт. Өзүн алданып калган жаш баладай сезип, жаш болсо да, өзүнүн өлүмүн күтүп жашап, жүрөгү картая түшөт.
Жакшы жашоодон үмүтү үзүлөт. "Тагдырым ушул турбайбы" деп максаттуу жашоону унутат. Өзү үчүн эч нерсе кыялдана албай, өзүн жек көрүп калган абалга түшөт.
Сүйгөн адамынан гүлдөбөй эле өзүн таппай калат. Өзүн ким экенин түшүнбөй, эмне үчүн жашап жүрөм деген суроого жооп таба албайт. Төшөгү муздайт. Өзүндө бир да энергия калбайт. Ошол себептен ачуулуу, сөз көтөрө албаган, кыжырданган жүрөгү муздап калган айымга айланат. Ойлорунун баары негатив. Адамдар туралуу жакшы ой-жүгүртө албай, баарын күйөсүндөй көрөт. Ички дүйнөсү абдан жабыркап калган үчүн, жүрөгүндө сүйүү жашабайт. Бирок абдан тынч, сүйүүгө толгон жашоого чаңкайт.
Эми, канткенде жашоосу жакшы жагына өзгөрүн билбей, эки ара ойдо кыйналып, жашоодо ордун таппай жүргөн кербези.
(Пост суранычтар боюнча жазылды)
Игамбердиева. Зарема
Следующая публикация
Комментарии 13
Кээ бир аялдар жолдошунун адамгерчиликсиз, акылсыз айбан адам экенин түшүнүп турса деле өздөрүн курман кылып жашап жүрө беришет. Мындай учурда аялдар өздөрү күнөөлүү. Ошондуктан да жолдошун жамандап кереги жок