4-БӨЛҮМҮ...
- Ал эмне дегениң, уулум? Иштеген ишиң бар, үй-бүлөңдү таштап чет жакка кантип кеткени жатасың? Эки жыл айтканга оңой, бирок өтө чоң убакыт,- Сейит ушул сөзү менен Талгаттын оюн колдобой турганынын четин чыгарды.
- Атам уруксат берди. Ишим даяр, ал жактын маянасы да жогору.
- Акча баарын чечет дегени турасың го. Силердин үй-бүлөдө ошондой болушу мүмкүн, бирок мен үчүн андай эмес. Жаш аялыңды, ымыркай балаңды кимге ишенип калтырып баратасың?- күйөө баласынын көзүнө тике караган Сейит жооп күтүп калды. Дал ушул нерсе Талгаттын да талуу жери эле. Кайнатасынан көзүн алып качып, мукактана түштү.
- Атаң туура айтат. Бир аз уулуңарды чоңойтуп алып Айсал экөөлөп иштесеңер деле болот да. Апаңдын Айсалга кылган мамилесин бизди билбейт дейсиңби. Көрсөк көрмөксөн, уксак укмаксан болуп экөөңдүн очогуң бузулбасын деп отурабыз,- баятан бери унчукпай отурган Карачач да сөзгө аралашты.
Канча аракет кылгандары менен Талгатты оюна кайтара алышпады. Ишим даяр, келишим түзүлүп калган деп көшөрүп туруп алды. Аргасы кеткен ата-эне кызы менен күйөө баласына бата берип узатып кала беришти. Узап бараткан машинаны карап туруп Карачачтын энелик жүрөгү бул жоруктун жакшы эмес экенин сезгендей катуу булкуп алды.
Дарбаза тарсылдап калды. Астра өз бөлмөсүндө болчу. Бул убакта ким келмек эле... Мүмкүн коммуналдык төлөмдөргө келгендир. Кагазын эшикке кыстарып кете беришсин деген неме ордунан козголбоду. Кайра-кайра такылдаткан кандай өжөр неме деп ачуусу келген боюнча барып эшикти ачып саамга нес боло түштү. Маңдайында кичүү уулу Кайрат туруптур.
- Кандай, апа?- эңкейип далысынан кучактап, акырын таптап койду.
- Кел, уулум. Кир, кире гой.
Акырын башын ийкеген уулу ашыкча сөз сүйлөбөй 2-кабаттагы бөлмөсүнө кирип кетти. Уулунун келгени Астрага кадимкидей дем берди. Ашканага кирип чай коюп, дасторкон жая баштады. Чайга түшөт деп күтө берип чарчап, акыры 2-кабатка өзү чыгып бөлмөгө баш бакты. Кайрат Мырзанын кичинекей жумшак мамалагын кармалап, башын жерге салып отурган экен.
- Чай ичели, уулум.
Апасын көргөн Кайрат ордунан туруп терс бурулду. Ошондо гана Астра уулунун ыйлап жатканын көрдү.
- Сага эмне болду? Ыйлап жатасыңбы?
- Билмексен болбой эле коюңуз, апа. Ушунун баарын кылган сиз. Жадыраган чоң үйдүн заматта кутун качырып, ээнсиреттиңиз. Эми бул үйдө кимдин жашагысы келет? Эч кимдин! Сизден башка эч кимдин. Колундагы мамалакты сумкасына салды да, 1-кабатка чуркап түшүп кетти.
- Кайрат, Кайрааат!- шашкан Астра тепкичти жаза басып чалкасынан кетти. Болгону темир эшиктин карс этип катуу жабылганын гана укту.
- Мунусу да кетти. Акыркы үмүтүм ушуда эмес беле,- ушул учурда денесинин ооруганын да сезген жок. Жан дүйнөсү, жүрөгү жанчылып, аалам караңгылап баратты.
Айсал шаарга келгенден бир жума өтпөй Талгат Англияга учуп кетти. Акыркы күндөрдөгү күйөөсүнүн көзүндөгү аргасыздык, чарчоо Айсалды да жүдөтүп жиберди. Мындайда эркек адамдын чечкиндүүлүгү, аялга үмүт, ишеним бергени өтө маанилүү болчу. Бирок Талгат андай кылбады. Түнөргөндөн түнөрүп жүрүп, акыры алыска сапар тартты. Эми кандай болот?.. 3 бөлмө үйдө кайнатасы, Баян, Кайрат болуп жашашабы? Мындай жашоо канчага созулат?.. Эч ким эч нерсе дебесе да Айсал чүнчүп, жүдөй түштү. Болгон эрмеги, алаксытаары уулу гана. Бала менен алышып кантип кеч киргенин да сезбей калат кээде. Сыртка да сейрек чыгат, анда да кечинде гана.
Талгат жетип алдым деп бир ирет коңгуроо кылган. Ошондо эл аралык байланыштын өтө кымбат экенин айткан. Арадан 1 айга жакын убакыт өткөн соң Талгат кайра байланышка чыкты. Мырзаны, үйдөгүлөрдү гана сурады. Жумушу тууралуу да айтпастан телефонду бат эле коюп койду. Айсалга бул жолку сүйлөшүү түш сыяктуу эле болуп өткөнсүдү. Чын эле сүйлөштүмбү деп кайра телефонун карады. 53 гана секунда сүйлөшүшүптүр. Байланыш кымбат дебедиби, ошого кыска эле сүйлөдү да, эң негизгиси аман-эсен экен деп өзүн-өзү сооротту.
Мезгил өз өкүмүн жүргүзө берет экен. Жай бүтүп, берекелүү сары көйнөк күз да кирип келди. Мырза чулдурап өз тилинде сүйлөп чуркап жүрөт. Билинбей Талгаттын кеткенине да бир жылга чукулдап калыптыр. Барган сайын сейрек коңгуроо кылчу болду. Акыркы жолу качан сүйлөшкөнүн да эстей албай калды Айсал. Аралык адамды кадимкидей алыстатат экен. Башында Талгатты сагынып, кээде түн ичинде ыйлап да алчу. Барган сайын өз дүйнөсү менен болуп, өзгөргөнүн өзү да сезе баштады.
- Ата, окуумду бүттүм. Мырза да чоңоюп калды. Мен жумуш караштырып жатам. Ылайыктуу, кесибиме туура келген иш болсо эми иштейин,- Айсал бир күнү чай үстүндө кайнатасына сөз баштады.
- Кызым, Мырза бир аз кичине да. Ишенип кимге таштайм деп жатасың? Баян да быйыл окуусун бүтөт. Ал деги сынактарынан бошобойт.
- Жеке бала бакча караштырып койдум. Жумуш табылаары менен ошол жакка жиберем. Талгаттын тыйынын карап отура берип чарчадым, ата. Бир жылдан бери 2 гана жолу акча жөнөттү. Баланын деле кем-карчы бир топ болот экен. Сизге оорчулук түшүрбөй, аз да болсо үйгө аралжы киргизейин.
Келининин акыркы сөзү Медерди катуу ойго салды. Талгат акчасын аялына жөнөтүп жатса керек деп жүргөн оюнда. Демек, жөнөткөн эмес экен. Анда эмне кылып жүрөт бир жылдан бери. Мүмкүн эсеп ачып топтоп жаткандыр... Канча ойлонгону менен баары бир уулун жаман жолго кыйгысы келбеди атанын.
Бул учурда Талгат тапканын көңүл ачууга, ичимдикке жумшап, үй-бүлөсүн, жубайы менен уулу бар экенин да эсинен чыгарып койгон эле. Бүгүн да жумуштан чыгып, түз эле түнкү клубга жөнөдү. Эрте мененки эле жетекчинин алдында берген убадасын унуткартып, заматта ызы-чууга, түтүнгө толгон түнкү жашоо өзүнө сиңирип кетти.
Башы жарылчудай ооруган Талгат көзүн араң ачты. Ордунан турууга аракет кылганы менен дарманы жетпеди. Денесине таш байлап койгондой салмактанат. Көзүн чоң ачып айланасына көз жүгүрттү. Чоочун дубал, терезеси да жүлжүйүп жарык араң эле түшөт. Кайсыл жерде жатканына акылы жетпей, өйдө болуп эки жагын карады. Тар, күңүрттөнгөн бөлмөдө экен. Эс-мас абалда теңселип турду. Өз денесин өзү көтөрө албай, көзү караңгылап, дубалдар кыйшайып баратканын бир билет. Көзүн ачса полдо жатыптыр. Канча ирет ичсе деле мындай болчу эмес. Суусап, башы ооруп кыйналчу. Бүгүнкү абалына өзү да түшүнбөй, майда калтырак баскан колдорун карады. Кечээ эмне ичтим? Азыр кайда жатам? Убакыт канча болду? Жумушумчу? Сансыз суроолор ансыз да чачырап кетчүдөй болгон мээсине туш тараптан чабуул жасап жатты. Бир күн башта жетекчинин алдында берген убадасын эстегенде денеси калтырап, муздак тер чыга түштү. Бүгүн жумушту калтырса иштен кол жууганы ошол. Бөлмөдө саат да жок экен. Кол телефону менен капчыгы кайда калганы белгисиз. Эшикти ачкан Талгат жогору көтөрүлгөн тепкичтерди көрдү. Ар бир тепкич ажалына жетелеген сыяктуу жүрөгү дүкүлдөп, дем жетпей баратты. Мынчалык бийик, анан да узак болбосо...
Жогору чыкканда гана кайсыл жерде экенин түшүндү. Түнкү клубда калып кеткен экен. Жылан сыйпап кеткенсип бир да жерде саат илинбептир. Теңселе басып барга барып, саат сурады. Жумуш башталганына 3 сааттан өткөнүн укканда кулагы чуулдап, көзү тунара түштү. Бүттү, баары бүттү... Сыртка баратып кайра кайрылып телефону менен капчыгын сурады. Ийнин куушурган бармен алаканын жайды.
Кайдан- жайдан пайда болгон токумдай кара булут көбөйүп отуруп асман бетин көрсөтпөй калды. Самсаалап ылдыйлап түшүп келип, кадимки кол сымал Астранын чачынан сылап, койнуна кирди да чырмалып ороп алды. Чоңойгондон чоңоюп үйдүн ичин толук каптады. Жардамгааа..... Талгааат.... Астра канча кыйкырса да эч ким үнүн укпады. Бир убакта кара туман Астраны коё берди да, Талгатты чулгаган бойдон жогору көтөрүлүп баратты. Талгааат, уулууум.... Астра өз үнүнөн өзү чочуп ойгонуп кетти. Жүрөгүнүн дүкүлдөгөнү өзүнө угулуп жатыптыр. Оо кудай, бул эмне болгон түш? Ажалымдын келгени го... Бирок туман Талгатты алып кетпедиби... Астра шашылып жарыкты күйгүздү да, ашканага чыгып муздак суу жутту. Көргөн түшү түстүү тасмадай көз алдында турду. Сактай гөр, жараткан, түшүм караңгы түн менен кетсин деп кобуранып терезени чоң ачты. Айлана мемиреп тынч уйкуда жатыптыр. Ушул учурда жаш баланын ыйлаганы кулагына даана угулду. Акыркы күндөрү бул нерсе тез-тез кайталанчу болду. Башында көп маани бербей жүргөн, барган сайын чоң үйдүн сүрү кыйла шаштысын алып койду. Айрыкча баланын ыйлаганы угулганда кулагын бекем жаап укпаганга аракет кылат. Дагы деле жектегенин, ушунун баарын жасаган Айсал деген сокур сезимин жеңе албай келатат.
Ошол бойдон таң аткыча кирпик какпады. Терезенин тушунан чымчыктар чырылдай баштаганда ордунан козголуп, сыртка чыкты. Селкинчекке отуруп, короого көз чаптырды. Буга чейин байлык, аброй деп жүргөн ушул заңкайган хан сарай, тоодой машина көзүнө суук көрүнүп, ичиркенип алды. Бир жылдан берки жалгыз жашоо билинбегени менен Астраны бир топ карытты, чүнчүттү. Акыркы жолу Кайрат үйдөн чыгып кеткенде катуу жүрөгү ооруду. Бир күн болбосо бир күн мурдагыдай жашоо кайтып келет деп жүргөн. Мезгил өткөн сайын көөдөндөгү ишеним, көздөгү үмүт изи калбай салаадан куюлган кумдай жоголууда. Оор үшкүрүп ордунан туруп үйгө бет алды. Кунарсыз күндөр, жалгыздык байкатпай канатын кыркып, кайратын мокотуп бараткан эле.
Жумуштан чыккан Астра кызыл күйгөн жол чыракты күтүп машинада отурду. Алдынан жөө жүргүнчүлөр өтүп жаткан. Бир убакта тааныш караан көзүнө урунганда ток тепкендей денеси дүрүлдөп кетти. Алдында Айсал өтүп бараткан эле. Татынакай кийинип, чачын желкесине жыйнап алган келинин артынан узата карап турду. Айсал жолдон өтүп, бала бакча тарапка бурулду. Ошондо гана Астранын эсине небереси Мырза түштү. Демек, баланы бакчага берген экен. Жолун улап кеталбай ичи уйгу-туйгу болуп, машинасын жол четине токтотуп коюп, жерге түштү. Кара көз айнегин тагынып, Мырза менен Айсалдын чыгышын күтүп далдоолонуп туруп калды. Айсал узакта чыкты. Уулун көтөрүп, күлүп сүйлөп келаткан келинин көргөндө буту тушалып, ордунда катып калды. Көз алдына Талгаттын балалыгы келди. Өзү да дал ушинтип уулун бакчага ташычу эмес беле. Мырза да атасынын эле көчүрмөсү тура. Астранын көз алдында Айсал менен Мырза узап баратышты. Алдынан тосуп чыгып, небересин бетинен сүйүп, келини менен амандашып коюуга алы келбей темир торчону кармаган боюнча кала берди. Өмүрүндө биринчи жолу бошошуп ыйлады. Бирок ким үчүн ыйлаганын өзү деле билбей турду.
Кечинде Айсал айылга коңгуроо кылды. Туруктуу жумуш чыгабы, чыкпайбы деп күмөнсүп жүргөндө ата-энесинин тынчын албайын деп ашыкча нерсе деле айткан эмес эле.
- Апа, сүйүнчү! Мырзаны бакчага бердим. Өзүм иштеп жатам.
- Оозуңа май, садагам. Жакшы кылган турбайсыңбы. Эмне жумуш таптың?
- Тигүү цехине кирдим. Азырынча катардагы эле тигүүчүмүн. Бирок бүгүн дипломумду көргөн жетекчим башка жумушка которобуз дегендей кылды.
- Шашпа, кызым. Акырындан баарына жетишесиң. Мырза ыйлабай эле барып жатабы бакчасына?
- Ооба, үйрөнүп калды. Башында 2-3 күн эртерээк үйгө алып кетип жүрдүм. Бир жумадан бери толук кандуу иштеп жатат ал деле,- Айсалдын сөзүнө апасы да күлүп кубанды.
- Жакшы жаңылыгыңа рахмат, каралдым. Атаң келип укса кубанып калат тура. Баса, Талгат кандай жүрөт? Жумуштары жакшы дейби?
- Жакшы эле, апа. Иштеп жүрөт,- томуктай нерсе тамагына такалып, дем жетпей калгансып энтигип кетти. Апасы эмес өзү Талгаттын кайда, кантип жүргөнүн билбесе эмне демек эле. Акыркы жолу 6 ай мурда сүйлөшкөн. Андан бери же өлүүсү, же тирүүсү белгисиз. Кайнатасы да тымызын сызылып, дары ичип жүрөт жүрөгү ооруп. Телефонду койгон Айсал оор үшкүрүп ордунан турду. Кечке иштеп чарчаса да үйгө келгендеги келиндик милдетин эч унутка калтыра элек. Казанды бошотуп, кечки тамактын камын көрө баштады.
Эшик ачылып Медер акырын ашканага баш бакты.
- Кызым, Мырза уктап калды. Курсагы кандай эле?
- Мейли, ата. Бакчадан кечки тамагын ичип келген. Ойгонсо бирдеме жедирем.
- Кечке ойноп чарчаптыр неберем. Тиземе башын жөлөп ойноп жатып эле уктап кетти. Кызым, сени менен сүйлөшөйүн дедим эле,- столго отурган кайнатасынын алдына чай койгон Айсал күтүп калды.
- Угуп жатам, ата.
- Жумуштарың кандай? Кечке иштегениң аз келгенсип үйдүн түйшүгү да мойнуңда болуп жатат. Сени көрүп аяйм, кантип жүгүңдү жеңилдетем деп бассам-турсам ойлоном.
- Менде баары эле жакшы. Кабатыр болбоңуз, ата. Буйруса кийинки жумадан эмгек акымды да берип калышат.
- Талгат менен сүйлөшүп жатасыңбы, кызым? Кабарсыз болгон сайын жүрөгүм түпөйүл. Бөлөк эл, бөтөн жерде кантип жүрөт деп кээ күнү кирпик-көзүм ирмелбей таң атырам. Окуп жүргөндө бат-бат кабарын билдирип сүйлөшүп турчу. Эми болсо дайынын билдиргенге жарабайт.
- Акыркы жолу 6 ай мурда сүйлөшкөнбүз. Мага да ошол бойдон байланышпады. Өзүм да 2 жолу чалдым, телефону өчүк, номери тейленбейт дейт.
- Аман болгой эле. Бул бала минтип дайынсыз болбош керек эле. Же бара койчу жакын жерде болбосо,- Медер түнөрүп ой басып отуруп калды.
Уландысы бар...
Урматтуу окурмандар чыгарма жакса класс басып комментарий жазып колдоп кетиңиздер...
Присоединяйтесь к ОК, чтобы подписаться на группу и комментировать публикации.
Нет комментариев