16-бөлүм.
Алтынбек жеткен кезде полдо жаткан Шамэлдин жанына киши үйүлүп калыптыр. Айылдык дарыгер алгачкы жардамды көрсөтүү менен алек. Алтынбек кирип эле “качкыла, качкыла” деп кыйкырып калды. Полдогу канды көрүп чочуп кетти. Медайым Шамэлдин башынан агып жаткан канды токтотуп бинт менен ороп берди.
– Убакытты созгонго болбойт, көтөрүшүп машинеге салышкыла,- деп кыйкыра сүйлөдү Алтынбек.
Үчөөлөп көтөрүп машинеге салышты. Жанына Шамэл иштеп жаткан класстын жетекчиси кошо отурду. Шамэл эс-учун жоготкон абалда кетип бара жатты.
Улам-улам башын чайкап келиндин тынчы кетип жатты. Анын классын жасалгалап жатып ушундай кырсыкка туш болгонуна өзүн күнөөлүү сезди. “Кокус бир нерсе болуп кетсе кантем? Мектептин атына көө жаптың кишинин сөөгүн чыгарып деп директордун урушары анык. Кайдагыны баштадым эле? Кооздолбосо койсун, жөн эле койбопмун да”,- деген ойлор келди. Санаасы санга, ою онго бөлүнүп жатты.
– Байке, кайсы бейтапканага алып барабыз? Эмнеси болсо да жакыныраагына айдаңыз. Мындайда жол да узак болуп кетет...- деди келин чый-пыйы чыга.
– Баламдын жеке клиникасы бар. Ошол жакка эле алып баралы. Мамлекеттик ооруканага алып барып аңкайып күтүп отурабызбы. Алардын бир дарыгери болсо, экинчи дарыгери жок болуп чыгат дайым,- деген Алтынбек кимдир-бирөөгө телефон чала баштады.
– Алло, балам, кандайсың? Иштесиңби? Мен шашылыш бара жатам сага.
– Эмне болуп кетти? Тынччылыкпы?- баласы коркуп кетти атасынын үнүнөн.
– Тынччылык эмес ошо. Шамэл шатыдан кулап кетиптир, абалы оор. Дарыгерлериңди даярдап тур, шашылыш операция керек болуп калышы мүмкүн,- деген Алтынбек жол боюнда турган МАИчини көрүп телефонун өчүрө салды.
Көп узабай Алтынбектин унаасы жаркыраган жеке клиниканын алдына келип токтоду. Оорукана кызматкерлери күтүп турушкан экен, Шамэлди бейтап арабасына салып ичкери алып кирип кетишти. Коридорго кирет, кайра сыртка чыгат, айтор, Алтынбек бир жерге тура албай кыйма-чийме басып жүрдү.
xxx
Шамэлди алып келген ооруканада Айзада да дарыланып жаткан. Ал убакытысынын көбүн терезеден сыртты кароо менен өткөрөт. Азыр да терезеден сырттагы көрүнүштү кыймылсыз, үнсүз карап отурду. Унаадан түшүрүп ичкери алып кирип бара жаткан кишини жаны ачый карап, аяп турду. Көз жашы мөлтүлдөп ыйлап баштаган Айзаданы багуучусу келип терезеден ары алып кетти. Автокырсыктан кийин анын тааныганы эле дарыгерлер, багуучусу жана Жакыпов. Өткөн күндөрүн эстегиси келет, ойлонууга аракет кылат, бирок көп нерсе эсине келбейт. Узакка ойлоно албайт. Кыска гана убакыт көз алдына тартылат, уктап жатканда дайыма чочуп ойгонот. Тердеп, кыйналып калган болот, түшүн болсо эстей деле албайт. Болгону дайыма атасына эркелеп жаткан кичинекей кыз түшүнө кирет, ал кичинекей кыз өзүнүн бала курагы экенин деле аңдабайт. Азыр да адаттагыдай Айзаданын уйкусу качты. Бүгүн бейтапканага шашылыш алып кирип кеткен киши эсине түштү. “Ким болду экен? Аман калды бекен?” деп ойлонот. Эмнегедир ошол адамды өзүнө жакын сезди. Андан кабар алгысы келип, таңдын атышын күттү Айзада. Аны таанып-билбесе да, аман калса экен деген изги тилек жүрөгүндө уюп турду.
xxx
Шамэл баштыгын көтөрүп поездге кирип келгенде “аны кылмышкерлердин купесине отургуз” деп бир аял кыйкырды эшик оозунда турган кишиге. Аппак кийинген жапалдаш бойлуу мурутчан киши көзүнө урунду. Бир жерден көргөнсүйт, барып учурашайын деп колун сунду эле, алик албай мурутун оңго сылап коюп Шамэлди ээрчитип жөнөдү. Кир дегенсип көзү менен ачык турган эшикти көрсөттү. Шамэл кирип отургандарды алая карады, купенин ичи тамекинин түтүнүнөн көрүнбөйт. Керебеттин бурчуна отурду. Эч ким ага көңүл да буруп койгон жок. Эшиктер жабылып, поезд шарактаган күүсүнөн жазбай жол улап баратты. “Кайда баратам? Эмнеге баратам? Кантип бул поездге түшүп калдым?” деп ойлонот Шамэл. Суроолоруна жооп жок. Чылымды буркурата чегип жаткан купедегилерден бир аз чочулап отурду.
Шамэлдин бүрүшүп бурчта отурганын көргөн бири.
– Эх, тагдыр эмне гана кылбайсың,- деп үн катты.
– Эх, тагдыр дейсиңер... Тагдыр деген бул жөн гана шылтоо. Сени акча уурда, адам өлтүр деп бирөө кыйнадыбы? Жок, биздин ар бир кадамда тандоо болот да. Биз болсо баарын өзүбүз жасайбыз, өзүбүз тандайбыз да, анан “бул деген тагдыр” деп өзүбүздү актайбыз. Чынында, тагдыр деген жок нерсе. “Маңдайга жазган да” деп билип-билбей эле сүйлөй беребиз. Маңдайыңды күчтүү лупа менен карасаң да эч нерсе жазылган эмес. Тагдырды ким жасайт? Өзүбүз, өзүбүз,- деп өзүн көкүрөккө чапкылап ызалуу үн каткан аял купенин терезесин улутуна карап отуруп калды.
Шамэл “бул менин акча уурдаганымды, адам өлтүргөнүмдү кайдан билет? Буга ким айтты?” деп таң калат. Тааныш бирөө-жарым барбы деп отургандарды акырын сыдыра карап коёт. Эч бири тааныш эмес. Сыртка чыгайын деп эшикти тартты эле, ачылбай койду.
– Отур, сага чыкканга ким уруксат берди? Бул жакка киргендер каалаган учурда эле чыгып кете албайт,- деди баягы аял.
– Сиз кимсиз?- деди Шамэл калтыраган үн менен.
– Бул жакта сенин суроолоруңа жооп жок,- деди тиги аял акырая карап. Шамэл ордуна бүрүшүп отуруп берди кайра.
Купенин ичин кайрадан чылымдын коюу түтүнү каптады. Шамэл титиреп баштады, анын кыйналып жатканына эч ким көңүл бурган жок. Чылымдарын кере тартып, бака-шака түшүп жатышты. Бир кезде эшик шарт ачылып, аппак кийимчен жанагы киши кирип келди.
– Жүрү, Шамэл, сенин ордуң бул жакта эмес экен. Кийинки станциядан түшүп кал,- деп Шамэлди тиктеп калды. Сумкасын ала кетейин деди эле Шамэл.
– Аны бул жакка ташта, бул жерден өзүң эле чыгып кет,- деди. Кылчактап сумкасын караган бойдон Шамэл купеден чыгып кетти. Кийинки станциядан түшүп калган Шамэлге жанагы киши кол булгалап, поезд андан арып жүрүп кетти.
xxx
– Эсине келди, бейтап эсине келди,- медайым башкы дарыгерге чуркады. Бир аздан кийин экөө ээрчише палатага кирип келди. Алардын артынан Алтынбектин уулу дагы кирип кетти.
Бул маалда Алтынбек дагы ушул жерде болчу. Баласы “кыйналасың, эс ал” деп үйүнө кетирип жиберсе да түнү менен уктай алган жок. Бир тууганынын баласы. Таң атпай кайра ооруканага келгенде уулу ичкериден чыгып Шамэлдин абалы турукташканын кабарлады.
– Кудайга шүгүр, ичер сууң түгөнбөптүр,- Алтынбек жакшы кабарды угуп абдан кубанды. Оор үшкүрүп алды.
– Абалы жакшы, сарсанаа болбой үйгө бара бериңиз. Өзүм көзөмөлдөйм.
Алтынбек ошол жерден эле мугалим келинге телефон чалып, Шамэлдин өзүнө келгенин кабарлады. Бул учурда Айзада да Шамэл жаткан палатанын тушуна келип калган эле. Ичкериде Алтынбектин тиги мугалим менен сүйлөшүп жатканын угуп кубанды. Айзада бүгүн күндөгүдөй эмес, бир башкача бактылуудай жүрдү. Анын маанайын көрүп, дарыгери да, багуучусу да таң калды.
“Тихий час” убагында Айзада Шамэл жаткан палатага акырын кирип барды. Мемиреп уйкуда жаткан адамды бир саамга тиктеп турду да, акырын колун кыса кармап, кайра сыртка чыгып кетти. Сезимтал, көп нерсени аңдабай калган Айзада жүрөгүнүн каалаганын аткарып койду...
Кызы Алтынай менен жээни Аландын үйгө келбегенине сарсанаа болгон ата кудасына, Дайырдын атасына, телефон чалды эле, ал келининен кабарсыз экенин айтты.
– Алтынайды билбедим. Дайыр болсо үйдө, уктап жатат,- деди.
– Кандайча үйдө? Алар жолукмак эмес беле?- кыздын атасы чочуп кетти. Андан ары сөз уланган жок, телефонун өчүрдү.
– Ай, катын?! Дайыр менен дебедиң беле?- деп ачуулуу кыйкырды.
– Мага Дайыр менен кеттим деп айткан, кайдан билейин ага жолукпаганын. Кызың бир нерсени ачык айтчу беле өзү?- деп сыртынан сыр алдырбаганы менен, ичинен чыйпылыктап калды апасы.
– Эй, бала! Тур өйдө, катын-балаңдан кабар албайсыңбы. Куда чалды, "Алтынай жок, байланыша албай жатабыз" дейт,- деди атасы Дайырдын бөлмөсүнө кирип барып.
– Эмне? Алтынай жок бекен?- Дайыр ордунан ыргып туруп кийине баштады. Эшикке чыгып эле Алтынайга телефон чалды. Биринчи чалуусу жоопсуз калды. Машинасын от алдырып дагы бир жолу чалып көрдү, дагы жоопсуз. Көчөгө чыгып дүкөндөн жаңы СИМ-карта сатып алып башка номур менен чала баштады. Бир нече чалуудан кийин Алтынай жооп кайтарды. Ал чоочун номур менен Дайыр чалып жатканын аңдады.
– Алтынай, кандай? Каяктасыңар?- деген Дайырдын тынчсызданган үнүн угуп Алтынай ыйлап жиберди.
– Жакшыбыз,- деди ый аралаш үнү менен.
– Эмне болду? Каяктасыңар? Баарыбыз сени издеп жатабыз, тынччылыкпы?
Суроо артынан суроо узатылды.
– Биз батирге чыгып кеттик.
– Эмне болгон батир? Дарегиңди айт, барайын,- деди Дайыр. Бышактап ыйлап жаткан Алтынайды аяп кетти. Жетип барып бооруна кыскысы келди.
Алтынай да ушул маалда баш жөлөөр адамга муктаж болуп турган эле. Дайырга турган жеринин дарегин жөнөтүп жиберди. Дайыр көп узабай караңгы көчөлөрдү аралап отуруп айтылган даректи таап келди. “Мындай жерге батирге чыгып Алтынайдын башына эмне күч келди? Атасынын заңгыраган үйү турса” деген ой башына кайра-кайра келет. Көрсөтүлгөн дарекке жетип катарлаш батирлер жайгашкан короого кирип барды.
Алтынайга телефон чалып, “мен келдим, кайсы бирине кирем?” деди эле, ортодогу бир батирдин жарыгы күйүп, эшиги ачылды. Дайыр ошол тарапка басты. Үйдүн ичи бопбош. Ортодо бир жер төшөк салынган, анда Алан уктап жатат. Бурчта бир чемодан, бир баштык турат. Үйдүн ичинде эмне бар экени боштуктан дароо эле Дайырдын көзүнө урунду.
– Эмне болду, Алтынай, апаң менен уруштуңбу?- деди ага жакындаган Дайыр.
– Апам, апам мени күйөөгө берем дейт,- шолоктоп ыйлаган абалда Дайырды кучактап калды.
– Эмне? Ал эмне болгон күйөө экен? Мен сени эч кимге бербейм. Сен мендиксиң,- чачтарынан жыттап көкүрөгүнө бекем кысты.
– Алтынай, сага кылган адилетсиздигим үчүн кечирчи. Мен сага апаңдан ушул сөздү угузбашым керек эле. Күнөөнүн баары менде. Мага бир мүмкүнчүлүк бер. Мурдагы каталарымды кайталабайм, Кудай алдында ант берем,- Дайыр Алтынайга жалбарып жатты.
– Кээде сөздөрүңө ишенбей кетем. Бирок сага мүмкүнчүлүк бергим келет, билбейм, эмне гана болбосун сенден баш тарта албай койдум,- деди Алтынай Дайырдын көкүрөгүнө башын жөлөгөн абалда.
Дайыр жубайы менен уулун өзүнүн үйүнө алып кетмей болду. Уктап жаткан уулун көтөрүп барып унаанын арткы орундугуна жаткырды. Чемоданын, баштыктарын багажга салып, батирдин ачкычын коңшуларына дайындап тапшырып короодон чыгып кетишти.
Дайырдын кубанычы ичине батпай бара жатты. Алтынайдын “жарашууга макулмун” деген сөзүн канча убакыттан бери күтүп жүргөн. Психологдун “өзүңдү оңдосоң калганы өз жолуна түшөт” деген сөзү кайра-кайра эсине түшүп жатты. Ушул учурда Дайырдын акылын “жашоону мындан ары жаркырата жайшайм” деген ой уялап турду. Жаратканга ыраазычылык айтып жатты ичинен.
xxx
Жакыпов Германияда жүргөндө Айзаданы ооруканадан үйгө чыгарып кетиш керек экенин кабарлашкан. Ал түндө Бишкекке келген. Башка иштерин жыйыштырып, таң эрте бейтапкананы көздөй бет алды. Барып дарыгерлер менен сүйлөшүп, дарыланууга кеткен чыгымды төлөдү.
– Толук айыктырып чыгарып берсек жакшы болмок деңизчи, бирок бул эс-тутум дегендики ушундай, балким, калыбына келүү үчүн жылдар керектелет. Күтүшүбүз гана керек. Бул дарыларды үзбөй ичсин. Ай сайын текшерүүгө алып келип туруңуз,- деп Айзаданы бейтапканадан чыгарып беришти.
Жакыпов Айзаданын үйүн көздөй жөнөдү, анын үйүнүн дарегин так билер эле. Жол кырсыгынан кийин баштыгын Жакыповго өткөрүп беришкен, анда мурун өзү алып жүргөн чынжырчага байланган ачкыч бар болчу. Үйдү ачайын десе ичинде дагы ачкыч салынуу экен. Каалганы каккылады, жаш жигит эшикти ачты.
–Кимсиң сен?- Жакыпов өктөм үн катты. Жигит Жакыповду даана тааныды.
Анын артында лифттен чыгып келе жаткан Айзада менен дагы бир келин Амандын көзүнө урунду. Айзаданы көрө салып эле Жакыповго жооп бербестен аны менен учурашты. Айзада таң калычтуу карап койду Аманды. Ошол эле маалда Айзада өз үйүнө келгенин деле билген жок. Эшик оозунда үйгө кирбестен тура берди.
– Мен Айзада эже менен иштешип жүргөм, үйгө таштап кеткен мени,- деди алаңдаган Аман. Жакыповдун жан сакчысынын келе жатканын көрүп.
– Андай болсо сен үйдү бошот, жарым саатта жыйыналып чыгып кет,- деди Жакыпов.
– Макул, макул,- Аман ичкери кирип кетти. Биртке буюм-тайымын заматта чогултуп чыга беришке койду.
– Анан жигит, сени мындан ары бул тегеректен көрбөйүн. Айзаданын да тынчын алба, макулбу?!
– Болду, болду,- деп чыгып бара жаткан Амандын колунан ачкычты алып калды Жакыпов. Аман эмне болуп жатканын анчейин аңдаган жок. Анын акылында “Айзада эже эмнеге мени таанымаксан болуп койду? Бирдемеси бар, болбосо менден сурай турганы көп эле да” деген ой айланып турду. Эшик алдында туруп Аман өзүнө жашай турган жай издеп жатты интернеттен.
– Эмнеси болсо да онлайн бизнес менде калды,- деп ичинен өзүнчө кудуңдады Аман.
Жакыпов багуучуну дагы бир айга жалдады. “Дарыларын убагында берип жанында бол, буга азык-түлүк алып алгыла” деп колуна акча карматты.
– Сиз мага ким болосуз?- деди багуучу келин менен сүйлөшүп отурган Жакыповдун жанына келип.
– Мен сенин агаң болом.
– Бул кимдин үйү?- деди Айзада ага улай.
– Бул үй сенин өз үйүң. Беймарал жашай бер,- деп маңдайынан сүйүп, Жакыпов чыгып кетти. Үйдөн чыгып эле Айзаданын батирге берилчү үйүн көздөй жөнөдү. Ал жактагы жашоочуларга жолугуп, батир акыларын Айзаданын эсебине которуп тургула деп дайындап кетти.
xxx
Айзада ойгонору менен багуучусу Берметтен аны клиникага алып барып келүүсүн өтүндү. Бермет анын кимге жолуккусу келип жатканын айттырбай түшүндү. Ал мырзанын аты-жөнүн суратканында эле Айзаданын жүрөгүндө бир сезим пайда болгонун түшүнгөн. Оорукчан болуп калды, көңүлүнө жакканын кылсын деп Бермет деле анын аракетине каршы болгон жок. Экөө такси менен бейтапканага келип түшүштү. Шамэл өзүнө келип калыптыр. Анын палатасына кирип келген бейтааныш аялды сиз ким элеңиз деп таңдангандай карап калды. Арыкчырай, бакыраң көз сулуучумак келген келиндин анда эмне иши бар экенине кызыкты...
Уландысы бар.
Урматтуу окурмандар чыгарма жакса класс басып комментарий жазып колдоп кетиңиздер...
Присоединяйтесь к ОК, чтобы подписаться на группу и комментировать публикации.
Комментарии 9