Предыдущая публикация
Фикрет Хидиров
ЛАЦУ ДАГЪЛАР
ЦIвекI-сам галай кирпичдин кIвал,
Аруш алай кьвед-кьве дакIар.
Игис хьанва кIвалихъ багъ, сал.
Вилик гала лалу дагълар.
Кьвед-кьве дакIар – фирягь, ахъа,
Михьивал я вили цава,
Пакам кьиляй килигдай за,
Вал тир виляй кьару, дагълар.
Хъуьтуьл юзаз дакIард шуьше,
Саки гузва адаз мезе.
Лепеда тваз ипек перде,
Къугъурзава гару, дагълар.
Ракъинин пай – пакаман нур,
Тандални ви гъизва абур,
Иердиз алукIна акур
Гинибаш я яру, дагълар.
Цифер жедай ви чинал гъай,
Кьибле-кефердикай атай,
ДакIанда заз, кIалуб кьацIай,
Къалурзава кьалу, дагълар.
Кьулан вацIун шакъайрин ван
Гагь кьезил, гагь жедай залан.
На ягъзавай макьам тир кьван,
Япара ама, хару дагълар!
Карагзама гьар са легьзе…
Вучда, гьар суз жедай рекье…
Халкь пайнава часпарди къе,
Эцигнава пару, дагълар.
Гагь-гагьни къвез жувакай хъел:
Хайи кIвал-муг хквез рикIел…
Вучиз туна акьван гуьзел
За зи арха, далу, дагълар?!
Уьмуьр фейи зи чиг-жегьил
Макандихъ цигел я кьве вил.
Арандава Фикрет, агьил,
Яргъай акваз лацу дагълар.
2018
Фикрет Хидиров
Следующая публикация
Комментарии 3