Евгений Атаков Томпо оройуонун быыбардааччыларыгар бэйэтин кытта билиһиннэрэр суругу таһаарда:

“Убаастабыллаах Томпо улууһун олохтоохторо, ыйы кыайбат кэминэн, ол эбэтэр балаҕан ыйын 11 күнүгэр Томпо улууһун аҕа баһылыгын талар күммүт үүнүөҕэ. Бу быыбарга мин кандидатурабын туруорбут киһи буоларым быһыытынан, эһиэхэ бэйэбин кытта билиһиннэрэргэ, былааннарбын кэпсииргэ сананным.
Мин Тополинайга төрөөбүтүм, 2008 сыллаахха Хандыга орто оскуолатын түмүктээбитим. Оскуоланы бүтэрээт, Байкальскай экономика уонна право институтугар экономист-менеджер идэтин баһылаары үөрэнэ киирбитим. 2013 сыллаахха үрдүк үөрэх кыһатын ситиһиилээхтик түмүктээн, дипломмун ылан, төрөөбүт улууспар төннүбүтүм, уонна Горно-Геологическай техникумҥа экэномист быһыытынан үлэлээн барбытым.
Ити сылга Аҕа Дойдум иннигэр ытык иэспин толоро аармыйаҕа ыҥырыллыбытым, ВДВ кэккэтигэр сулууспалаан дойдубар эргиллибитим.
2015 сылтан Хаандыгаҕа Култуура уонна духуобунас дьаһалтатыгар экономист быһыытынан үлэҕэ киирбитим. Чочумча буолан баран, ити сылга, «Районный информационный методический центр в сфере культуры» МКУ дириэктэрин эбээһинэһин толорооччунан анаммытым. 2016 сылга «Томпонское районное управление культуры и духовного развития» МКУ финансово-экономический отделыгар сүрүн экономист-специалист быһыытынан үлэбин салҕаабытым.
Олохтоох бэйэ салайыныы салаатыгар бэйэбин холоноору, бу үлэбиттэн баҕа өттүнэн уурайбытым. Ити курдук, Теплый ключ нэһилиэгин салалтатыгар үлэҕэ бэлэмнэнэр сыалтан, Ил Дархан тэрийбит Үрдүкү инновационнай менеджмент оскуолатыгар “Государственное и муниципальное управление” программаҕа үөрэммитим. Уонна 2018 сыл МО «Теплоключевской наслег» администрациятыгар сүрүн специалист дуоһунаһыгар, муниципальнай сулууспаҕа үлэлии киирбитим. Бу сулууспаҕа үлэлиир баҕа санаам улахана бэрдиттэн, маҥнайгы кэмҥэ туох да манньата суох, этэргэ дылы “идея” туһугар үлэлээн саҕалаабытым. Билигин ааспыты хайыһан көрдөххө, ити кэмҥэ ордук элбэх билиини ылбыт, уопуту мунньуммут эбиппин. Салалта үлэтэ улахан эппиэтинэһи сүктэрэрин өйдөөбүтүм, ону кытта дьулуһар сыалларым сөптөрүн толору өйдөөбүтүм.
Онон, кэлэр болдьоххо «Теплоключевской наслег» муниципальнай тэриллии салайааччытын быыбарыгар бэйэм кандидатурабын туруорбутум. Быыбарга кыайыыны ситиһэн, икки сыл устата нэһилиэк салайааччытынан үлэлээтим, уонна ис сүрэхпиттэн этиэхпин сөп – үлэбин киһи сиэринэн, ыраас суобастаахтык толоро сылдьабын уонна бу хайысхаҕа салгыы сайдар былааннаахпын. Бу эппитим аҥардас тылынан эрэ кэпсээн буолбатын туоһулаан МО «Теплоключевской наслег» иһигэр үлэлээбит кэммэр тугу ситиспиппитин кэпсиим:
1. «Дорожник» кулууп саҥа дьиэтэ тутуллан олоххо киирбитэ. Сыл аайы олохтоох көҕүлээһиннэри өйүүр программаҕа көхтөөх кыттыыны ылабыт. Бу программаҕа кыттыы түмүгүнэн кулууп территориятын тупсарыы үлэ ыытыллар.
2. Култуура эйгэтин үлэһиттэрин штатын бэрээдэктээһин үлэтэ ыытылынна. Култуура үлэһиттэрэ оройуон араас тэрээһиннэригэр айанныылларыгар көмө оҥоһуллар.
3. Уонунан сыллар усталарыгар уларыйбатах Аэропорт уонна Теплый Ключ нэһилиэктэр эргэрбит, аварийнай туруктаах сибээс остуолбаларын көтүрэн, саҥа остуолбалары туруорбуппут.
4. Эргэрбит уот ситимнэрин остуолбалара эмиэ сөргүтүллүбүттэрэ, саҥа остуолбалар турбуттара.
5. 2020 сылга оҕолорбутугар анаан бэрт өр күүтүүлээх спортивнай площадканы туттарбыппыт. Бу биһиги нэһилиэкпит социальнай бырайыактар конкурстарыгар ситиһиилээхтик кыттыбытын түмүгэ. Онон бу үлэни олохтоохтор бары уопсай кыайыыбытынан ааҕабын.
6. Теплай ключ Мир, Советская уулуссаларыгар итии ситимнэрэ саҥардыы ыытыллыбыттара, ол түмүгэр “араҥас дьиэҕэ” уонна түгэх турар дьиэлэргэ кыһынын лаппа сылыйбыта.
7. МО «Теплоключевской наслег» генеральнай былаанын саҥалыы көрөн суруйуу түмүгэр сир учаастактарын регистрациялааһын судургутуйбута.
8. В 2019 сылга ФГУП «Почта России» салалтатын кытта бииргэ үлэллэн, тэрилтэ операционнай саалатын өрөмүөннээбиппит, дьон өҥө ылаллара ордук табыгастаах буолбута. Почтаны тарҕатыыга ситимэ быстыбат көмө оҥоһуллар.
9. А.Н. Черницын кэриэһигэр олохтоммут оройуоннааҕы волейболга күрэх сыллата ыытылла турар. Кэнники кэмнэргэ биһиги хамаандаларбыт бириистээх миэстэлэргэ тиксэр буоллулар, бу биһиги нэһилиэкпитинэн киэн туттарга дьоһун төрүөт буолар.
Ити курдук, үлэ быыстала суох бара турар, дьиҥэр, оҥоһуллубут үлэ быдан элбэх, онон быыбар кэмигэр сиһилии үлэм түмүктэрин кытта билиһиннэрэн иһиэҕим.
Түмүккэ, МО «Теплоключевской наслег» быыбардааччыларыгар эрэммиттэрин иһин, нэһилиэк салайааччыта быһыытынан ситиһиилээхтик үлэлиир кыахтаахпын көрдөрөрбөр кыах биэрбиттэрин иһин, ис сүрэхпиттэн махтанабын! Оттон билигин, Томпо улууһун аҕа баһылыгын дуоһунаһыгар бэйэм кандидатурабын туруоруммут күммэр, салайааччы быһыытынан эрдэ оҥорбут үлэбин сыаналаан көрүҥ уонна бэйэҕит быыбаргытын оҥорун диэн ыҥырабын!
#томпонскийрайон #хандыга #теплыйключ #джебарикихая #охотскийперевоз #сайды #кэскил #мегиноалдан #крестхальджай #арыытолоон #ударник #баягантайскийнаслег #тополиное