Сувани йыIкьаIле верыгъ уIвхаIссе,
НикIеенче сугъооца йизда Сувагыл`.
Адамеер авайкIан ишихъаб хъигьна,
Едаар,ичеер воохье йишди былахыл`.
ХъадийнкъаI юххьанбы, хъадийнкъаI мед къыIл`,
ТIетI`-тIелейни аIрее ийгвал` вод хайбы.
Анджах инсаныхъа гьиняа диндж дешын,
Къеъээйыд огъанче верыгъен цIабы.
ГьаIйыф чишее кьыIдим, ишбы дешданкъаI,
Гьаъа шы хинкIалбы, гьаъа гьыIнкIылеер.
Чихенбы гивадхын хъуркеке алла,
Абле Сувагыл`хъа гимбышыс йыхъеер.
Санкъуни аккалхъа мигьманар абеэ,
Гьаззирба коксеенче йикI` хъодху гиххьес.
Белкед уIлджуIмбына джукIле къидеджуйн,
Мигьман арийнкъаI ман суфраныл` ихьес.
Гьиняадын даватбы гьакIенийн байрам,
Сел`хьинне хъадайле эрекьий, чахыр.
Кьом-кьомас гимийъар сувагылийка,
Одхьун-илёдгъийхъа деш джуни ахыр.
Санкъуни кал`лейлхъа са баляа хъабеэ,
Гьодакке гыргынкъвее кумаг гьаъас хыл`.
Дюн`йейле ценнягьра инсан аркынеэ,
Гыргына хивуна ясеехъа гьирхьыл`.
КIыреехъа хъадийнкъаI гьар кул`фатын сес,
Шадехье хивыхъа геледжагъ водва.
Дестебы къаджийнкъаI мактабеехъа ааIн,
Шадвал`ын йикI`ел` оо илёозар сува.
Вахт вобний зы йыгъни къел`бышей гиъур,
Ахтыни боюлхъа гьодаккенний хыл`.
Таалейни хаIнейлхъа алхышбы гьаъа,
Йыгъни къел`бышеенче кал`лейлхъа гьирхьыл`.
Гъу йизда ваз, верыгъ, гъу йизда хаIне,
Йыгъни ишыгъей, нурей ачыхба лига.
Зы вахъа иляккы хааIхъаI илхъечу,
Вале оони къатей деш захъа джига.
Валех Гамзат
Присоединяйтесь к ОК, чтобы подписаться на группу и комментировать публикации.
Нет комментариев