Предыдущая публикация
СИЗ ҚУРЪОН ТАФСИР ҚИЛАР ЭДИНГИЗ МЕН ЭСА ЗИНО ҚИЛИШНИ ЎЙЛАБ ЎТИРАР ЭДИМ
Навбатдаги дарсим тугагач, бир киши ортимдан эргашиб менга бир воқеани сўзлаб бермоқчи эканини айтди. Уйга кирдик. У сўз бошлади: «Мен бир неча йилдан бери дарсларингизга қатнашаман. Францияда ўқиб, компьютер соҳаси бўйича олий диплом олганман. Авваллари диндан жуда узоқ бўлиб, намоз ўқимас, рўза ҳам тутмас эдим. Тўғриси одам ўлдиришдан бошқа барча гуноҳларни қилиб кўрганман. Айшу ишратга тўла ҳаётда яшар эдим. Ўқишни тугатиб юртга қайтдим. Жуда яхши лавозимли ишга жойлашдим. Уйимни французчасига «бар»га айлантирдим. Ҳатто ҳайит кунлари ҳам аёлим иккимиз турли меҳмонхоналарга ўйин-кулгу қилишга борар эдик. Бир кун жуда ҳам ёмон касалга йўлиққанимни билиб қолдим. Оз муддатда озиб кетиб, ҳатто ҳаракат қилишга ҳам қийналиб қолдим. Юртдаги ўттиздан ортиқ докторларга касалимни кўрсатдим, улар касалликка ташхис қўя олишмади. Шундан сўнг Францияга йўл олдим. У ерда тўлиқ текшириб, сўнгра жуда ҳам нодир касалликка учраганим, бу касаллик ўн уч миллионта одамдан биттасида бўлишини айтишди. Даволовчи доктор:
- Бу ерга келганинг, даволанганинг, сўнгра қайтиб кетишинг Франция ҳисобидан бўлади, дея менга пул картасини топширди. Олти ой турли муолажалар олганимдан сўнг доктор менга:
- Хафа бўлманг, аммо касалингизнинг давоси йўқ, - деди.
Шом (Сурия)га қайтдим. Менинг бир дўстим жума мавъизалари ва дарсларга мунтазам қатнар эди. Аввал ҳам бир бор сизнинг дарсингизда бўлганман, у вақтда мавъизага қулоқ солиш қаёқда-ю, мен қаёқда бўлганман, эх-хее... Сиз Қуръон тафсир қилар эдингиз, менинг хаёлим эса зино қилиш билан банд бўлар эди. Дўстим мени дарсингизга олиб келди. Ҳолим йўқлигидан зўрға суяниб келиб, курсига ўтириб тинглай бошладим. Дарсда Аллоҳдан ихлос ила астойдил дуо қилиб сўраш ҳақида айтилди. Мен ҳам қўл очиб биринчи бор:
- Эй Аллоҳ, агар менга шифо берсанг намоз ўқийман, деб дуо қилдим. Бу менинг биринчи бор Аллоҳга илтижоим эди. Иккинчи бор дарсингизга келганимда сиз Аллоҳдан дуо қилиб сўраётганда бирон-бир шарт қўйиш мумкин эмаслигини айтдингиз. Уйга қайтгач ҳаётимдаги биринчи намозни ўқиб, сажда қилдим. Аллоҳга қасамки, биринчи намозимдан бир неча соат ўтгач ўзимни енгил сеза бошладим. Сўнгра кун сайин тузала бошладим. Аллоҳ таоло менга комил шифо ато этди, тузалиб кетдим. Ибодатларни тарк этмайдиган, шариат ҳукмларига зид ишлардан сақланадиган бўлдим».
Роббингиз ҳаққи айтинг-чи, бу касаллик ушбу одамга фойдали бўлдими ёки зарарли? Албатта фойдали, мутлақ фойдали! Агар шу касалликка йўлиқмаса на тавба қилар, на Аллоҳни таниган бўлар эди. Бу маънодаги воқеалар кўплаб топилади, уларнинг барчасидан биргина хулоса олиш лозим. Ер юзидаги бирон бир мусибат йўқки, унда мукаммал бўлган ҳикмат бўлмаса.
«Шайх Нобулсийдан қиссалар ва ҳиссалар» китобидан.
Следующая публикация
Нет комментариев