Пул, омад, мансаб, ҳашамат... Булар мен учун чўт эмас.
...Бахт, муҳаббат, меҳр... Буларни топиш, ҳис қилиш қанчалар машаққатли. Меҳрни пулларга сотволиш мумкин бўлганида эди... Бахт ҳашаматнинг улфатига айланганидамиди... ёки муҳаббат мансабга кўнгил боғлаганида эди... Мен энг БОЙ инсонга айланган бўлардим.
Эсимни танибманки, дадам шаҳарда кўзга кўринган ташкилотда раҳбар лавозимида ишлайди. Ҳар тонг дарвозамиз ёнида дадамни кутиб машина тайёр турарди. Отам ҳамиша ўзига эътиборли, киборли шахс бўлган.
Олти ёшимда онамдан жудо бўлдим. Онамнинг нима сабабдан вафот этганини билмайман. Аммо ўша мудҳиш кун ёдимда қолган. Мени онамнинг ёнига олиб киришди. Бутун танаси оппоқ матога ўралган, фақатгина юзлари очиқ қолган онамни аввалига ухлаб қолган, деб ўйладим.
Атрофимда йиғлаб турганларга ҳайрон бўлиб боққанча онамнинг юзларини силадим. Аммо қўлим муздек вужудга тегиб, сесканиб кетдим. Югурганча кўчага отилдим. Нимадан қўрққанимни билмайман. Аммо бутун вужудимни тахлика, ваҳима қамраб олганди. Мени топиб келиб, бошимга дўппи, белимга белбоғ боғлаб қўйишди. Отамнинг ёнида дўппайган қабрлар макони бўлмиш қабристонга боргандик. Лекин болалигимга бориб, онамни сўнгги манзилига кузатаётганимни ҳис қилмаганман. Аксинча қабрлар оралаб, қўйилган тошларни томоша қилганман.
Кечга бориб, онамнинг йўқлигини ҳис қилганман. Йиғлаётган холамга қараб, қорним очганини, ойимга айтишини сўраганимда, холам шўрлик чунон уввос тортгандики, менга унинг йиғиси ёқмаганди.
Онамнинг маъракаларидан сўнг, уйдан келди-кетдининг оёғи узилгач, дадам уйимизга хизматкор ёллади. Гунг аёл эди. Нимага соқовни танлаганини ҳамон тушуниб етмайман. Мен-ку, майли, аммо уч ёшли синглим онамни излаб тинмай йиғларди. Уни овутаман деб мен ҳам йиғлаб олардим. Соқов аёл эса, бизга ширин гап айтиб таскин беришга ожиз эди..
Дадам фақат иш, пул топиш дарди билан яшарди. Ҳатто дам олиш кунлари ҳам у биз фарзандлари учун вақт ажратолмасди.
Етти ёшимда кўчадан уйга йиғлаб кирдим. Ҳовлида юрган дадам йиғлаётганимни кўриб, менга ғалати қаради.
-Бу нимаси? - деди жаҳл билан.
- Кўчада болалар билан уришдим, - дедим пиққиллаб. Тўсатдан дадам юзимга тарсаки туширди. Қалтираб кетдим.
- Сен ҳеч қачон йиғламаслигинг керак. Ҳеч қачон! Эшитяпсанми, Менинг ўғлим йиғламайди. Ҳамма нарсани куч билан, пул билан ҳал қилишга ўрган. Қанча десанг мен бераман. Аммо ҳеч қачон ожизлигингни кўрсатма!
Ўшанда дадамнинг гаплари менинг митти қалбимга бир умрга муҳрланиб қолди. Ҳеч қачон ҳиссиётга берилмаслик кераклигини тушуниб етдим.
Биринчи синфга чиққанимда, илк қўнғироқ куни мени мактабга соқов аёл етаклаб борганди. Бошқа болалар онаси, отаси билан борганда мени дадам олиб бормагани алам қилган. Бир кунгина ишларини унутиб турса бўларди-ку. Атиги бир кунгина қўлимдан етаклаб, шодлик бахш этса бўлардику... Йўқ, менинг отам учун оиладан, фарзанддан кўра иши муҳим эди. Атрофдаги болаларга россса ҳавас билан боққанман. Айниқса, болалари ортидан шошаётган оналарга кўпроқ тикилганман. Қанийди, менинг ҳам онам бўлганидами?... Афсуски, бу шунчаки рўё эди...
Баъзан катталар болалар ҳеч нарсани пайқашмайди, сезишмайди, ҳис қилишмайди, деб ўйлашади. Аксинча, катталардан фарқли равишда болаларнинг ҳиссиёти ўзгача бўлади. Улар ҳақиқий меҳрни сохтасидан ажратиб ололадиган ҳақиқий инсонлардир!
Шукрки, устозим жуда меҳрибон аёл эди. Маъмура опани ҳозиргача ширин хотиралар билан эслайман. Онам йўқлигини билибми, ё ўзи чиндан ҳам шунақа юмшоқтабиат, меҳрибон аёлмиди, хуллас, ўша вақтдаги муҳаббатни у кишидан олганман. Шунинг учунми, мактабга доим шошардим. Шу аёлни кўрсам, қандайдир қалбим роҳат топгандай бўларди.
Қасрмонанд ҳовлида мен, синглим ва соқов хотин яшардик. Дадам уйга кеч қайтар, эрталаб эса бизни кўрмасди. Ухлаб ётган бўларди.
Ака-сингил жуда эркин эдик. Кўнглимиз тусаганини қилардик. Тўққиз ёшга етиб, учинчи синфни тугатганимда, Дилдора биринчи синфга борди. Уни мактабга ҳам ўзим олиб бордим. Дадам менга:
- Баҳодир, синглингни мактабга олиб чиқ, гаплашиб қўйдим, - деди бепарво оҳангда. Мен эса розилик билдирдим. “Сиз ҳам боринг биз билан”, дегим келдию, аммо айтолмадим.
Лоқайдлик, бефарқлик кишини совуқ ва ҳиссиз кимсага айлантиради. Сиз қалбан боғланган кишингиздан меҳр ва илиқлик кўрмасангиз унга нисбатан бўлган қалбдаги меҳр ришталари таранглашиб бораверади. Бора бора танангиздаги қалбга боғланган қайсидир ҳужайралар ўлиб қолади.
Менинг дадам билан орамиздаги ҳолат худди ўшандек тус олиб борарди. Ота бўлиб у менинг қандай ўқиётганимга қизиқмас, баҳоларимни ҳам суриштирмасди. Аввалига яхши ўқишга бўлган иштиёқим тобора сусайиб борарди. Чунки мен дунёни ПУЛ бошқаришига ишона бошлагандим. Дадамнинг ора сирада айтадиган гап сўзлари, ҳамма нарсани моддият билан ўлчашлари бизга ҳам таъсир қилмай қўймасди. Ҳамиша сўрамасакда чўнтагимиз тўла пул бўларди.
Ака-сингил қўл ушлашиб эрталаб мактабга борардик. Синфдошларим орасида энг кўп пул билан юрадигани мен эдим. Уларга ҳотамтойлик қилиб, бир нарсалар олиб берардим. Компьютер ўйинларига ҳам пулим бўлгани учун тенгдошларимни мен етаклаб борардим. Улар билан қизиқ эдида...
Ўн икки ёшимда пул билан кўп нарсага эришиш мумкинлигини англаб етганман! Мактабда яхши ўқимасдим. Ўқимай қўйгандим. Аммо ўқитувчиларим отамнинг ҳурмати учун ҳам мендан баҳони аяшмасди. Дарсларга кирмасам ҳам, яхши баҳо олардим. Отамнинг ташкилоти мактабимизга ҳомийлик қилгани боис директор ҳамма ўқитувчиларни огоҳлантириб қўйганди. Ҳарқалай, ким ҳам ҳомийдан ажралишни истайди, дейсиз?
Саккизинчи синфда ўқиётганимда кимё фанидан янги ўқитувчи келди. Ҳар доимгидек унинг ҳам дарсларига кирмадим.
- Баҳодир, дарсга кирмасанг, сенга чорак баҳо чиқмас экан, - деди синф бошлиғимиз.
- Нима, менга-я, тағин ишдан ҳайдатиб юбормай, - дедим синфдошимга керилиб.
- Ҳеч бўлмаса бир марта дарсга кир, - деди у менга ялиниш оҳангида. Сўнг қўшиб қўйди: - Сени деб мен гап эшитишим керакми?
Кимё ўқитувчиси мени кўргач:
- Баҳодир деганлари сенми? - деди энсаси қотиб. Унинг муомаласидан жаҳлим чиқди. Индамай, кўзига қараб, бақрайиб туравердим. Ўқитувчи чорак баҳони қўймаслигини, мени синфда қолдиришини пўписа қилиб гапирди. Саккиз йил давомида ҳеч бир ўқитувчи ғинг демаганидан кейин бу ўқитувчининг пўписаси парвойимга келармиди? Албатта, йўқ. Дадамга бир оғиз айтсам, ҳаммасини остин-устин қилишига кўзим етади.
- Қўлиздан келганини қилинг, - деганча хонадан чиқиб кетдим. Шу заҳоти дадамга телефон қилдим. Бир оғиз гапим етарли бўлди. Директор дарҳол мени хонасига чақиртирди. Қорни катта, кўзлари қисиқ, бақалоқ директоримиз менга ёнидан жой кўрсатди.
- Баҳодир, қайси ўқитувчи? - деб сўради у кўзларимга мўлтираб қараб.
- Кимёдан кирадиган янги ўқитувчи, - дедим.
Сақич чайнаб ўтиришимга қараб, директорнинг пешонаси тиришди. Бироқ ҳеч нарса демади. Агар менинг ўрнимда бошқа ўқувчи бўлганда, директоримиз сақич чайнатиб қўймасди, албатта.
- Майли, ўзим чақириб айтиб қўяман...
Директоримизнинг шу ваъдасидан кейин мамнун тарзда хонасидан чиқдим. Ҳарқалай, бу ўқитувчи фидойи инсонлардан экан.
- Мен бу болага баҳо қўймайман. Бир марта ҳам дарсимга кирмаган. Ундан кўра мен ишдан кетаман, - деб ишдан бўшаб кетибди.
Ака-сингил мактабнинг қирол ва қироличаси ҳисобланардик. Биров мушугини пишт демагандан кейин, кўнглинг тусаганини қиларкансан. Дилдорани биров хафа қиладиган бўлса, яхшигина таъзирини бериб қўярдим.
Ўн беш ёшимда дадам туғилган кунимга машина калитини совға қилди. Бошим осмонга етганди. Синфдошларимнинг менга ҳавас билан тикилаётганини кўриб, теримга сиғмасдим. Бировларнинг кўзини куйдириб машина минишнинг ҳам гашти бўлакча экан. Эрталаб машинани миниб, чиқиб кетиб алламаҳалда уйга қайтардим. Дўстларим билан машинада сайр қилишга одатланиб қолгандим. Ҳайдовчилик гувоҳномам бўлмасада, ортимдаги суянчим отамга ишонардим. Тўғри, бир икки марта ДАН ходими машинамни олиб қўйди ҳам. Бироқ жаримаси тўлангач, яна ўша ҳол давом этарди.
Ўн олтига қадам қўйганимда дадам тўсатдан уйланаманга тушиб қолди. Ҳовлимизга ёшгина жувонни етаклаб келди
Дадам аёлни бизга таништираркан:
- Латофатни опа денглар. Бу сизларга оналик қилади, - деди буйруқомуз оҳангда.
Латофат менга ёқмади. Тўғри, у чиройли эди. Аммо кўзларидан айёрликни сезиш қийинмасди. Бу аёл дадамга хотинлик қилишига ишонмасдим. Қасрдек ҳовлимизга бека бўлишни истаётгани юз-кўзидан билиниб турарди.
- Вой Баҳодиржон, сени даданг бирам кўп мақтадилар, - деганча юзимдан силади аёл. Унинг ҳаракати менга ёқмади. Ҳарқалай, озми-кўпми яхши-ёмонни фарқига бориб қолганман. Катта бўла бошлагач, ёшим ўн бешдан ўтгач, дадамнинг ким биландир гаплашиб юришини кўнглим сеза бошлаганди. Гоҳида тонгда кириб келардилар уйга. Эркак киши, нима қилибди, дерсиз. Манга шунда дадамни тушунгандек бўлганман. Унинг ёлғиз яшашини тўғри эмас, деб ўйлаганман. истамасдим. Лекин бундай кўча аёлига илакишиб юришини, уйланишини ҳаёлимга келтирмагандим. Латофатнинг кўриниши кўча аёлникидан фарқ қилмасди. Лабларини қалин қилиб бўяб олган, юзига хаддан зиёд пардоз берган бу аёл қоматини кўз-кўзлаш учунми тор кийимларда юришни хуш кўрарди. Менингча, у қирқ ёшли отамдан йигирма ёшлар кичик эди. Мен уни умуман ёқтирмасдим. Латофат бўлса илондек ёпишиб, бизнинг кўнглимиздан жой олишга ҳаракат қиларди. Ўн уч ёшли синглим унинг тузоғига илинди. Латофат Дилдорани ширин гаплари, турли туман совғалари билан ўзига қаратиб олганди. Бироқ бу аёлдан ҳар қандай қабиҳлик чиқиши мумкинлигини кўнглим сезиб турарди. Машинада кўчама-кўча юриб, бундай аёллар ҳақида тасаввурга эга бўлгандим. Иложи борича у билан гаплашмасликка ҳаракат қилардим. Дилдоранинг ҳам у билан яқинлашишини истамасдим.
- Баҳодир, машинангда мени дўконга олиб бориб қўй, - деди бир кун Латофат нозланганча. Қовоғимни солиб олдим. Нима, мен унинг югурдагиманми?
- Йўқ, машинам бузуқ, - дедим юзимни ўгириб.
- Вой, ҳалигина юриб турганди-ку....
- Йўқ, дедим-ку, йўқ! - деб бақирдим унга. Шу пайт қаердандир дадам пайдо бўлиб қолди.
- Нега унга бақиряпсан? - деди менга ўшқириб. Латофат эса дарҳол кўзига ёш олди.
- Баҳром ака, ўғлингизга қанча онадек меҳрибон бўлишга уринмай, у мени жеркигани жеркиган. Ҳозир ҳам дўконга олиб бориб кел, дегандим....- деганча дадамнинг елкасига бош қўйди. Ифлос аёл мендан ҳам уялмади. Аёл киши шунчалик ҳам маккор бўладими? Ҳозиргина кулиб, жилпанглаб турган аёлнинг бир зумда кўзига ёш келиши....
- Обориб келсанг бўлмайдими? - деди дадам менга хўмрайиб.
- Машинам юрмаяпти. Қолаверса, мен хотинчангизга югурдак эмасман. Ана, шопирингизга айтинг, - дедим-да, уйга кириб кетдим.
- Ҳе, онангни.... - деганча ортимдан сўкинди дадам .
- Қўйинг, қўйинг, ҳали бола-да, - Латофатнинг яна нозланган овози эшитилди. Дадамнинг марҳум онамни сўкканига ғазабим қўзиди. Шу аёл боис сўкиш эшитганим учун Латофатни баттар ёмон кўриб қолдим.
Тонгда бир қарорга келдим: Мен уйдан кетаман!
Эрталаб дадамга қароримни айтдим.
- Нимага? - деди дадам ҳайратланиб менга қараркан. Латофат эса ўтирган жойидан қимирлаб қўйди.
- Мен бу уйда яшолмайман,- юзимни ўгириб гапирдим.
-Майли, хоҳлаган жойингдан уй танлаб, кўчиб чиқавер,- деди менинг "меҳрибон" дадажоним. Ҳатто фарзандининг уйдан кетишига сабаб нелиги билан ҳам қизиқмади.
Хуллас, ўн етти ёшимдан мустақил ҳаётни бошладим. Агар пул керак бўлиб қолса, дадамнинг ёнига борардим. Биламанки, ғамхўр дадам ўғлидан пул қизғанмасди.
Ёдимда, бир куни синфдош ўртоғим мени жума намозини ўқиш учун масжидга етаклади.
- Баҳодир, фақат бу дунёнимас, у дунёни ҳам эслаб қўйиш керак, - деди менга қараб. Журъатнинг оиласи номозхон эканлигидан хабарим бор эди. Хуллас, ўша куни у билан масжидга кирдик. Илк марта синфдошимнинг илтимоси билан саждага бош қўйдим. Инсон кўнгли алланечук бўлиб кетаркан. Онам ўлгандан буён тарқамаган кўнглимнинг ғашлиги бир марта саждага бош қўйишдаёқ тарқагандек бўлди. Ўша куни имомнинг гаплари ҳамон эсимда: “Ппайғамбаримиз Муҳаммад алайҳиссалом:"Одамзод икки тоғ мол-дунёси бўлса ҳам, учинчи тоғ мол-дунёни сўрайди" деган эканлар". Бу ҳадисни эшитиб, отам кўз ўнгимда намоён бўлди. Худди шундай инсонлар тоифасига кирарди дадам.
Бутун умри давомида давлат йиғиш билан банд бўлган одамнинг кўзлари ҳам сўқир бўлиб қоларкан. Ёнида бўлаётган ишларни ҳам кўрмас экан. Дадам учун бутун дунё пулдан иборат. "Пулинг бўлса, шоҳ ҳам сенга салом беради. Пулинг бўлмаса, гадо ҳам сендан нафратланади", деб ўргатганди менга.
Дадамнинг биргина қўнғироғи билан институтга ўқишга кирдим. Очиғи, аёллардан бутунлай кўнглим қолиб кетганди. Биттаси Латофатми? Чиройи билан ҳаммани мафтун этиб, макри билан адо қилади. Назаримда, ҳамма аёллар Латофат сингари эди. Мен умуман қизларга ишонмасдим. Ёлғондан битта гул совға қилиб , машинада айлантириб келишга таклиф қилсам, манаман дегани ҳам йўқ деёлмасди, дарҳол рози бўларди. Қўлингда пул бўлса, қизларни ҳам сотиб олиш мумкин деб ўйлардим. Айниқса, дискотекадаги қизлар дарҳол қучоғингга киришга тайёр бўлиб туради.
Йигирма ёшга кирганимда байрам қиладиган бўлдик. Дадам пулни аямаганлиги учун уйимда бундай ўтиришлар кўп бўлиб турарди. Дадам телефон қилиб, табриклади. Ўша куни кўп ичиб юборибмиз, чоғи, курсдош йигитларнинг икки-учтаси меникида ётиб қоладиган бўлишди.
-Э, шундай ўтираверамизми? - деб гап бошлади йигитлардан бири.
- Нима қиламиз, бўлмаса? - дедим мен.
- Кўчадаги бир-иккита жононлардан топиб келайлик. Маишат дегани шу бўладида,- деди у сирли кулимсираб. Қолганларга ҳам жон кирди.
-Бўлди гап йўқ. Пули мендан. Бор, топиб келавер, - гапирдим мен тантилик қилиб.
Орадан ярим соат ўтар-ўтмай, курсдошим тўртта қизни етаклаб келди. Ярим-яланғоч либосдаги қизларнинг туриши ҳар қандай йигитнинг ҳам кўнглига ўт ёқиши аниқ. Сочлари сариққина, қолганларига нисбатан чиройлироқ қизни танлаб, уни ётоқхонага бошладим.
Эрталаб кўзимни очганимда, уйда ўзимдан бошқа ҳеч ким йўқ эди. Ҳамма ёқ пала-партиш, нарсалар сочилиб ётарди. Нима бўлганини эслолмасдим. Бошим ғувиллаб оғрир, уйимдан аллақандай ёқимсиз ҳид келарди. Кўзимни очолмасдим. Шу тобди ики дақиқага кўзим юмилди, туман орасида онам кўринди. Менга қараб йиғлармиш, “эсиз болам-а, эсиз болам”, дермиш нуқул. Чўчиб уйғондим. Онамнинг руҳи нега бу қадар безовта... Қилган ишимдан қўрқиб кетдим. Кечаги номаъқул ишни қайта такрорламасликка ўзимга сўз бердим.
Ҳаёт инсонни турфа кўйларга солиши мумкинлиги рост.
Тақдир баҳор ҳавосига ўхшайди гўё. Кутилмаганда ёмғир ёғиб турган самодаги булутлар ғойиб бўладида, қуёш чарақлаб кетади. Ёхуд бир томонда ёмғир ёғиб турган лаҳзаларда иккинчи томондаги қуёш нури жилвасида камалак жилоланади. Ҳаётимда ҳам худди шу ҳолат юз берди.
.Кунларнинг бирида ўқишдан қайтарканман, йўлда машина тўхтатиш учун қўл кўтариб турган қизга кўзим тушди. Дарҳол тўхтадим.
- Ассалому алайкум, Чорсуга олиб бориб қўйинг, - деди қиз майин овозда. Рози бўлдим. Қиз ўтиргач, кўзгудан уни кузата бошладим. У баъзилардек жуда гўзал эмасди, аммо нимасидир ўзига тортарди.
- Исмингиз нима?- деб сўрадим машина кўзгусидан унга тикилиб. Қиз индамади. Ҳайратландим. Биринчи марта бундай саволимга жавоб ололмагандим.
- Яхши эшитмайсизми? - дея яна савол бердим. Қизнинг юзини ўгириб бошқа томонга қарашидан жаҳли чиққанини сездим.
- Хафа бўлманг, тўғриликча сўраяпман, - дедим яна ўзимни оқлаш учун.
- Мен сизга исмимни айтиш учун эмас, манзилимга етказиб қўйишингиз учун машинангизга ўтирдим, - деди қиз сал жаҳл билан.
- Хайрият-э, гапираркансиз-ку...
Негадир шу заҳоти кўнглимда бу қизга нисбатан ўзгача илиқлик пайдо бўлганди. Мен билганларга ўхшамасди у. Машинани атайин секин ҳайдардим.
-Тезроқ ҳайдашни иложи йўқми? - қиз ялиниш оҳангида гапирди.
- Иложи бор, исмингизни айтсангиз бўлди, - ҳазилона тарзда жавоб қайтардим мен.
У кулиб юборди.
- Феруза, - деди жилмайган куйи.
- Шундай чиройли исмингиз бор экан, яшириб ўтирибсиз, - деганча тезликни оширдим.
- Раҳмат. деди қиз ним табассум билан.
Бу қиздаги нимадир ўзига тортарди. Буғдойранг бўлсада жозибали чеҳраси, бироз қисиқ, аммо кулиб турувчи кўзлари, кишини мафтун этадиган табассуми бор эди унмнг. Бу қизни бир неча дақиқа ичида ёқтириб қолганимга ўзим ҳайрон эдим. Унинг кишига меҳрла боқувчи нигоҳини суйдимми ёки табассумли чеҳрасиними, билмайман. У мени сеҳрлаб олгандек эди. Илтимос қилиб, аранг унинг телефонини олдим.
Кечга яқин унга қўнғироқ қилдим. Ферузадек қизни ҳали учратмагандим. Ҳамшира бўлиб ишларкан. Негадир у билан дардлашгим келарди. Феруза ҳар бир гапимни эшитиб, мулоҳаза қилиб, фикр билдирарди. У менга ҳамма қизлар ҳам енгилтак эмаслигини исботлаб берганди.
- Баҳодир ака, бир илтимос, қўлингизда бор давлатингизни фақат яхшиликка сарфланг, хўпми? - деди у суҳбат ниҳоясида.
Феруза билан ҳар икки кунда телефонда суҳбатлашиб турардик. У ҳеч қачон учрашувга чиқишга розилик бермасди. Лекин кундан-кунга мен унга ўрганиб борардим. У менга синглимдан хабар олишим лозимлигини тайинларди. Сўнгги пайтларда ўзим билан ўзим бўлиб, Дилдоранинг ёнига бормай қўйгандим.(Фақат телефонда гаплашардик. Латофатнинг юзини кўргим келмасди).
Ниҳоят бир нафратланиб чиқиб кетган ота уйимга синглимни кўриш мақсадида қайтиб бордим. Ҳовлида аллақандай бачкана либосларда юрган Дилдорани кўриб, ҳушим бошимдан учди. Латофат унга кўкраги очиқ, калта кўйлак кийдириб қўйганди.
- Бу нима қилганингиз? - дедим Латофатга нафрат билан тикилдим. Бамайлихотир қаҳва ичиб ўтирган жувон мени кўриб кўзлари катта катта бўлиб очилди. Ғазабим қўзиб кетди.
- Ака, қўяверинг, ҳозир ҳамма шундай кийиняпти, - деди синглим сўзимга эътироз билдириб. Латофат эса индамай мийиғидан кулиб қўйди. Сўнг:
- Даданг индамай қўйгандан кейин сен нима дердинг? - деди масхаромуз илжайиб. Қўлимни мушт қилганча дарвозадан чиқиб кетдим. Ўзимни қўлга ололмасдим. Ғазабим тошқин дарёдек ўзанидек тошган эди гўё. Синглимни у ердан олиб чиқиб кетишга кучим етмади. Анави манжалақини бир нарса қилиб қўймаслик учун ҳам у ерда қололмасдим.
Ўша куни дўстларим билан дискотекага бордик. Ўйин-кулги авжида. Бир маҳал ўйнаётганлар орасидан бир қиз кўзимга ниҳоятда таниш кўринди. Жазавага тушиб ўйнаётган одамлар орасидан гоҳ кўриниб, гоҳ кўринмай рақсга тушаётган қиз томонга қадам ташладим. Кўзларимга ишонмасдим. Бу қиз.... синглим Дилдора эди. Сочлари ёйилган, бели очиқ либосларда юрган синглимнинг атрофида тўртта йигит гир айланиб рақсга тушишарди. Ўзимни тутиб туролмадим.
- Дилдора! - деб бақирдим. У менга бир қарадида, ўгирилиб рақсида давом эта бошлади. Назаримда, унга ё ичириб, ё чектириб қўйишганди. Оломон орасидан уни аранг судраб чиқдим. Машинага ўтказиб, уйимга олиб келдим. Синглим ҳамон сарҳуш эди.
- Дилдора, - деганча юз-кўзларини силадим. Сув ичирдим. У менга қаради-да жилмайди. Яна кўзларини юмди. Шу пайт нигоҳим унинг томирига тушди. Ифлослар, синглимни гиёҳвандликка ўргатишган экан. У нимадан бунчалик хурсандлигини энди тушуниб еткандим. Афсуски, мен кечикканга ўхшардим. Синглимни бағримга босиб йиғлагим келди. Ўша куни илк марта бирор яқин одамим йўқлигидан ўкиндим. Дод солгим келди. Онамни қўмсадим. Гарчи тун ярмидан ошган бўлсада, умид билан Ферузага телефон қилдим. Телефон бир неча марта чақирди. Сал кам ўн марталар гудок кетгандан кейин у томондан гўшак кўтарилди.
Алло, - Ферузанинг уйқисираган овози эшитилди.
- Феруз, - дедим мен ҳам ғамгин товушда. Аҳволим чиндан ҳам ёмон эди. Кимнингдир бағрига бош қўйиб тўйиб тўйиб йиғлагим келаётганди. Лекин... Феруздан бошқа яқин кишим йўқ эди.
- Баҳодир ака, - унинг овози тетиклашди. Менинг тушкун овозимни эшитиб, уйқуси ҳам ўчиб кетган бўлса керак. - Нима бўлди?
- Ёрдаминг керак, - йиғламсираган кўйи гапирдим. Ёнимда ётган синглимнинг аҳволига қараб, кўзларимдан дувиллаб ёш тўкиларди.
- Нима бўлди? - яна саволини қайтарди у. - Айтинг, Баҳодир ака, нима гап?
- Феруз, ҳаммаси жонимга тегди. Сен яхши бўлинг, дегандинг. Мени яхши бўлишимга қўйишмайди, - дедим алам билан. У мени гапириб олсин, деб индамай турарди.
- Феруз, биласанми, нима? Бу дунёда менинг ёлғизгина синглим бор эди. Уни ҳам тамом қилишибди. - шу топда кўзларимдан тирқираб ёш отилиб кетди. Болалигимда отамнинг танбеҳидан сўнг қотиб қолган дийдам бугун яна юмшаганди. Ўн беш йиллик аламлар кўз ёшига айланиб қуйила бошлаганди.
- Дилдорага нима қилди? - хавотирли оҳангда сўради Феруза.
- Синглим.... синглим гиёҳванд бўлиб қолибди .
- Нима-а?!
- Феруз, нима қилай, айт. Қийналиб кетдим. Яшаш жонимга тегди. Ҳамма нарсам етарли-ку, аммо ҳаловатим йўқ.....
Ўзимни тутолмасдим. Телефон гўшагини қулоғимга босганча йиғлардим.Йигит кишиман, аммо ҳохирги ҳолатимда мен қайси жинс вакили эканлигим ҳам ёддан чиққанди. Ичимдан отилиб келаётган фарёдни фақат кўз ёшлар билан ювардим. Ҳеч кутилмаганда турган бўронни кузатганмисиз. Еру осмонни чанг тўзонга тўлдириб шамол турадию, ҳамма нарсани бирдек қўпориб кетади. Лекин зум ўтмай унинг чангини, тўзонларини ёмғир ювиб кетади. Худди шу ҳолатда эдим мен. Ичимда бўлаётган бўронни кўз ёшларим ёмғири юваётганди...
- Баҳодир ака, ўзингизни кўп сиқманг. Ҳали ҳаммаси яхши бўлади. Ҳозир тиниқиб ухланг. Эртага кўришармиз, - у таскин берганча, гўшакни қўйди.
Бундай аҳволда менинг кўзимга уйқу келармиди. Илк марта онамни соғинганимни ҳис қилдим. Агар онам тирик бўлганларида ака-сингил шунчалар хўрланмасмидик. "Онасиз етим шум етим", дегани балки шудир.
Тонггача кўзимга уйқу инмади. Балконга чиққанча чироқлар орасида ястаниб ётган шаҳарга тикилдим. Тун ҳавосидан тўйиб нафас олдим. Миллионлаб чироқлар ёниб тургани билан битта қуёшнинг ёруғини беролмаскан. Ҳаётда ҳам атрофида минглаб инсонлар бўлсада, ҳаммаси бирдек меҳро таратолмас экан.
Ўзим ва синглимнинг келажаги ҳақида ўйлай бошладим. Энди нима бўлади? Нима қиламиз? Балки, уни олиб бошқа шаҳарга кетганим маъқулмиди? Дадам ҳеч қачон йўқ демайди. Ёши элликка қараб кетаётган бўлсада, дадамнинг ҳамон кўзи бойликка тўймаган. Нега у бунчалар бойликпараст экан? Нега иккитагина фарзандининг ҳаёти қизиқтирмаскан. Фақат пул билан таъминлаб қўйишни оталик деб ўйлармикан?
Тўғри, дадамнинг болалиги яхши кечмаган. Бу ҳақда ёлғизгина аммам айтиб берганди яқинда. “Биз камбағалликда яшаганмиз. Лекин бир куни дадам тўсатдан ўлиб қолдилар. Дадамнинг ўлими эса онамга қаттиқ таъсир қилиб, тушкунликка тушдилар. Кейин эса тушкунликдан чиқолмай руҳан носоғлом аёлга айланди. Акамнинг ёди фикри пул топишда бўлиб қолганди ўшанда. Уни росса камситишган. Жиннининг ўлисан, деб устидан кулишган. Шунинг учун пул билан ҳамма нарсани жойига қўя оламан деб ўзига ўзи синдирган. Баҳодиржон, сен отангдан кўп хафа бўлма, жон болам. Унинг дардини мен биламан”, деб куюниб гапирганди аммам. Лекин... мен нимадир қилишим керак эди. Нима? Уни билмасдим.
Эрталаб Дилдора аранг кўзини очди.
- Ака, - деди мени ёнида кўриб. Ғазаб ва... меҳр билан унга тикилдим.
- Нима ишлар қилиб юрибсан? -деб бақирдим. У индамай кўзини ерга қадади.
- Отам бой, ҳаммасини қилиб беради, деб ўйладингми? - дедим ҳамон ўзимни босолмай. Дилдора елкалари силкиниб йиғлай бошлади.
- Мени кечиринг.... - деди у пиқиллаб.
- Ким ўргатди буни сенга?
У менга ярқ этиб қаради-ю, индамади.
- Нега индамайсан, гапир.....
- Дискотекага ким билан боргандинг?
Синглим чуқур хўрсинди.
- Ака, энди бақирганингизнинг фойдаси йўқ, - деди йиғламсираб.
- Нимага?У ким?
- Латофат опа, - унинг жавобини эшитиб титраб кетдим.
- Қанжиқ,ифлос....- бўралатиб уни сўкдим.- Қачондан бери нинага ўтиргансан?
- Бир ой бўлиб қолди. Мен дорисиз туролмайман, - деди у титраб қақшаркан.
- Буни ҳам у қилдими?
- Йўқ, дискотекада укол қилишди. Биринчи куни маст бўлиб, ҳушимдан кетиб қолгандим. Ўзимга келиб қарасам, билагимда нина изи.... Икки кундан кейин бутун баданим қаттиқ оғрий бошлади. Латофат опага айтгандим. У мени тушунди. Кейин яна ўша дскотекага олиб борди.
Синглимнинг аҳволини кўриб, ўзимдан нафратланиб кетдим. Онамдан ёдгорлигим биргина жигаримни ҳам асролмадим. Аниқ биламан, дадам ҳамон қизининг дардидан бехабар бўлса керак.
- Юр, - деганча уни судраб, уйга олиб бордим. Ҳали дадам ишга кетмаган экан. Иккимизни бирга кўриб, Латофатнинг ранги оқарди.
- Дада! - илк марта дадамга қараб баланд овозда гапирдим. - Мана, қизингизни аҳволини қаранг, - деб синглимнинг билагини кўрсатдим. Дадам кўзлари олайиб, Дилдорага қаради.
Присоединяйтесь к ОК, чтобы подписаться на группу и комментировать публикации.
Нет комментариев