Предыдущая публикация
ЗАКЛАДКА ПАД НОВЫ ЎРАДЖАЙ
Гаспадаркі раёна актыўна і досыць аператыўна справіліся з сяўбой азімага рапсу.
4700 гектараў – менавіта такія плошчы адвялі гэтай алейнай культуры аграрыі пад ураджай 2020 года, павялічыўшы іх ва ўсіх сельгаспрадпрыемствах на чвэрць у параўнанні з леташнім. Самыя вялікія палеткі ў КСУП “Валожынскае” – 720 гектараў, 630 – у “Пяршаі-2014”, 580 – у ААТ “Агра-Дубінское”. У астатніх сельгаспрадпрыемствах засеялі ад 130 да 400 гектараў.
Як патлумачыла першы намеснік начальніка ўпраўлення па сельскай гаспадарцы і харчаванні райвыканкама, начальнік аддзела раслінаводства Алена Сак, рапс досыць прыбытковы: сёлета адна тона масланасення рапсу каштавала 717 рублёў – удвая даражэй, чым зерне. Да таго ж ён з’яўляецца першаснай крыніцай паступлення даходаў у сельскагаспадарчай галіне ад вырошчвання прадукцыі раслінаводства. Дзякуючы яго рэалізацыі, гаспадаркі займелі магчымасць набыць запчасткі для рамонту тэхнікі, гаруча-змазачныя матэрыялы, а таксама выплаціць заработную плату.
Аднак, каб атрымаць добры намалот, трэба добра падкарміць зямлю. На жаль, раён не мае магчымасці закупіць неабходную для паўнацэннага ўраджаю колькасць мінеральных угнаенняў: іх уносяць толькі 42 працэнты ад патрэбнага. Як вынік, можна разлічваць не больш як на 14 цэнтнераў з гектара. Трэба правесці дзве падкормкі: фосфарам і каліем увосень, азотам – вясной. Там, дзе ёсць сродкі, і ўраджай атрымалі адпаведны: напрыклад, у СГУ “Бабровічы” УП “Мінскаблгаз” сёлета рапс даў па 30 цэнтнераў з гектара, у ААТ “Агра-Дубінское” – па 18,2 і ў “Багданаўскае” – па 16,4 цэнтнера.
Насенне для сяўбы набывалі ў элітгасах Мінскай вобласці: кошт адной тоны вагаўся ў межах ад 1 тысячы да 1100 рублёў. Добра зарэкамендавалі сябе такія гатункі, як “вітаўт”, “імперыял”, а таксама гібрыды “мерсэдас”, “цекнік”, “гардон”. А вось ад распаўсюджанага гатунку “капітал” прыйшлося адмовіцца, бо ён аказаўся вельмі патрабавальным да нашай глебы і не апраўдаў затраты. Які ўраджай прынясе новае насенне, можна будзе сказаць пасля ўсходаў і перазімоўкі. Будзем спадзявацца, што зроблены задзел прынясе плён.
Следующая публикация
Комментарии 1
Мікалай ЗЯЛКОЎСКІ
– адзін з самых вопытных і сумленных механізатараў КСУП “Сакаўшчына-агра”. Цэлае лета на
давераным трактары “МТЗ-1221” быў заняты на нарыхтоўцы кармоў для грамадскага
статка, а з надыходам пасяўной кампаніі падчапіў сеялку. Першай культурай стаў
рапс, а неўзабаве пяройдзе і на азімыя зерневыя. За дзесяцігоддзі работы кожны
надзел сакаўшчынскай зямлі ён ведае як свае пяць пальцаў: да даручанага ўчастка
работы заўсёды адносіцца старанна і адказна. І хоць гаспадарка зараз перажывае
нялёгкія часы, аднак менавіта на такіх, як Мікалай Мікалаевіч, і трымаецца.