Предыдущая публикация
Яшәп була ансы дөньясында
Үз җаеңны гына кайгыртып.
Яшәп була ансы ошбу җирдә
Башкалар да барын "онытып".
Яшәп була ансы җай чыгарып,
Кемнәргәдер аяк чалып та.
Яшәп була ансы, башкаларны
Кайгы-борчуларга салып та.
Яшәп була ансы, әллә кемдәй
Үз көеңне генә көйләтеп.
Яшәп була ансы акыл сатып -
Үзең белмәгәнне өйрәтеп.
Яшәп була ансы, тәкәббер зат -
Мин-минлекле надан булып та.
Яшәп була ансы, белә торып
Начар гамәлләрне кылып та.
Яшәп була ансы, юлдан язып,
Баштан чумып гөнаһ-хәрамга.
Яшәп була кешелектән чыгып,
Акыл җуеп, охшап хайванга...
...Бу шигырьдән үзеңне танысаң
Хәерлерәк булыр дәшмәвең.
Тик бер сорау сиңа юллый алам -
Кемгә кирәк андый яшәвең?
Фәнәвис Дәүләтбаев
#укы
Следующая публикация
Нет комментариев