Предыдущая публикация
Татьяна Маторкина Нина Налогинадо ды Союза теевть оршамотнеде
🌸🌸🌸 Нина Налогина: «Мельспаро ваномс раськень оршамопельсэ ютыцянть лангс»
Эрьва иестэ «Шумбрат, Мордовия!» республикань раськень творчествань фестивалев сакшны те кедьчелькев авась. Сон аволь ансяк моры сцена лангсо, пурны выставкаяк, косо невтни шокшонь викшнезь оршамопельть. Вана нейгак мартонзо вастовинек «Минь вейсэ!» фестивальсэнть. Нина Налогинань теевксэнзэ аштесть «Тев» выставканть совамо таркасо.
Нина Кузьминична сась Теньгушевань райононь Шокша велестэ. Лангсонзо мазыйдеяк мазый оршамо, конась ютась тензэ сырькаензэ пельде. Кезэрень шкасто весе аватнень ульнесть эсест руцяст-панарост. Паро, бути сынь кадовильть аваст-сырькаест пельде. Нина сонсь кармась стамо-викшнеме. Васня эстензэ, мейле – лияненьгак.
– Мон чачинь покш семиясо, косо вете эйкакшт. Кавто лелян, кавто ялаксон, куншкасо мон – вейкине тейтерне. Тетям пек вечкилимим. Морсилинь-киштилинь эйкакш пингестэ саезь. Рузкс меремс, веселушка. Авань ульнесь «Зингер» стамонь машинказо. Сонсь стыль тенек оршамот, наряжиль эйсэнек. Уш вишкинестэ ванынь авань мельга, кода сон сты: састыне озы машинканть экшс, коцтканть чийни-вачкои салмуксось, вана курок кецявтсамизь од оршамосо. Мерят, аволь важоди, оймси. Истя шождасто лисиль тевезэ. Моньгак покшоль мелем истя стамс, – ледстни Нина Кузьминична.
Школанть прядомадо мейле сон сыргась Московов. Тосо эрясь лелязо, тусь мельганзо. Бажась тонавтнемс стыцякс. Муевсь тонавтнема таркаськак, ансяк вана веледе мейле тейтерентень марявсь пек стака. Перьканзо а содавикс ломанть. Общежитиясо эрямоськак эзь туе мелезэнзэ, тосо эрясть кить понгсь, эрьва кодамо иень. Сон чинь-чоп арсесь веледензэ ды кудодонзо. Ковонь ютазь авазо кучсь телеграмма, косо пачтясь ризксэв куля – тусь эрямосто тетяст. Нина сыргась калмамо. Кудосо сон редизе, кода стака аванстэнь. Ве лелясь уш урьвакстозель, тесэ эзь эря, омбоцесь армиясоль. Кавто меельцетне вишкинельть. Нинань тонавтомс ярмакт а сатыть… Сон кадовсь велес. Лиссь мирденень. Васня тукшность паро эрямо мельга Московов, Владимирэв. Седеест эзь педя. Велявтсть мекев. Колхозонь председателесь кецязевсь, макссь тенст квартира. Нина васня важодсь колхозсо, мейле ладизь почтань прявтокс. Тесэ сон важодсь мельспаросо. Кандтнесь ломантненень газетат-сёрмат, кецявтсь сынст. Ансяк почтась пек якшамоль, лиясто суртнэ ручкантькак эзть маря. Сон экшендсь, стакасто ормалгадсь. Савсь туемс. Тарказонзо зярс-бути мирдезэ важодсь.
Нина Кузьминична вишка шкасто саезь пек вечксь киштеме-морсеме. Школасо тонавтнемстэ морсесь сынст велень хорсо, косо ульнесть 27 ават. Шокшонь оршамопельсэ сынь ардтнесть морамо Саранскоев, Нижней Новгородов ды Нижегородской областев. 90-це иетнестэ хорось ёмась-срадсь. Зярыя иень ютазь велесэст пурнасть «Шокшань ават» фольклорной ансамбля. Самай тосо кармась морсеме Нина. Эрявсть мазый оршамопельть. Косто сынст саемс? Кедьчелькев авась сонсь стась весенень.
– Свал арсилинь шокшонь мазый оршамопельде. Тетянь ёндо бабань ульнесь сорказо ды панарозо. А вана шубейказо арасель. Ёвтнеса, кода ульнесь тевесь. Зярдо ушодовсь Ине Отечественной войнась, покштянь марто сынь эрясть васоло лия ёнкссо. Покштянь саизь фронтов. Васенце эйдентень ульнесть вете иеть, омбоцентень колмо, меельцесь ансяк чачсь. Бабань авазо кучсь тензэ сёрма: «Лука, сак велев, эйкакштнень кодаяк, паряк, модамарьсэ трясынек». Самс ульнесь а мезе лангс, ярмакт арасельть. Ды сон миизе шубейканзо.
Бабань куломадо мейле сорказо ды панарозо сатотсть монень. Стынь эстень шубейка. Кармасть ютавтневеме эрьва кодат кенярксчить – Велень, Райононь чить. Эсень эйкакштненень стынь оршамопельть. Кассть – лият стынь тенст. Кармасть пшкалеме тень лелянь-ялаксонь эйкакштне, сыненсткак стынь. Те тевесь теевсь седеень витемапелекс. А аштеван таркасо. Эрьва чистэ эряви тень мейсэяк котьмамс, мезеяк стамс, викшнемс. Лиясто пелеведе мейлес кирдеван. Удомаяк арась. Панартнэнь стазь-викшнезь, бажан свал совавтомс мезеяк од, лия тешкст, иляст уле вейкетть. Ламо явшиньгак. Кецнян, меельце иетнестэ вельмевтизь покш читнень, ванстыть койтнень-кирдатнень. Велесэ аламо, кинь кадовсть шокшонь оршамопелест, мон макснян аватненень костюмон оршамс кенярксчив. Ды истямо мельспаро ваномс раськень оршамопельсэ ютыцянть лангс, ломанесь полавтови те оршамосонть! – ёвтни Нина Кузьминична.
Соркась – авань пряс путомка. Кой-кона таркатнесэ мерить тензэ сорока. Сонзэ оршнить мирденень лисезь аватне. Пря бокантень понгавтыть ашо шарикть, тенст мерить пухт ды кудрят (пилень мазылгавтомкат). Шубейкась жилеткань кондямо. Сон сюпавсто мазылгавтозь човалясо, лентасо, блёсткасо, викшнезь парсеень суресэ, мехсэ (кезэрень шкане сонзэ лемдясть «сёрмав шубейкакс», «пиже ды якстере шубейкакс»).
Нина Кузьминичнань марто выставкав-концертэв икеле ардтнесть колмо нуцьканзояк. Сцена лангс лиснеме пек вечкиль Юра нуцьказо. Сон тусь тень коряс бабанзо ёнов: моры, пейдевти, кепеди лиятнень ёжост.
Минек героинясь аволь ансяк сты-викшни, истя жо коды спицасо, крючоксо. Меельце шкане кармась тейнеме сюлгамот, човалянь ды панксонь эрьгеть. Натой, Московонь аватнеяк рамсить. Сеедьстэ пшкалить тензэ теемс шокшонь авань эли эйкакштненень оршамопельть. Нина Кузьминична весе тевензэ кадсынзе, ансяк улевель материал. Сеске кунды тевс. Шубейканть теемс ковдо ламо шка эряви. Эрси, кандыть тензэ витнемс-стамс ташто панарт, соркат, шубейкат. Нейгак Саранскоев усксесь колмо костюмт ды ниле шубейкат. Перьканзо чарасть ламо инжеть, весе ванкшность-токшесть кедьсэ теезь мазычинть ды дивсесть. Лембе валтнэ пек кецявтсть те сырнень кедь аванть.
Татьяна Маторкина
Следующая публикация
Нет комментариев