Предыдущая публикация
Туган нигезеннән чыгып китеп,
Бик-бик күпләр читтә яшиләр.
Сагынсалар да бит туган якны
Сер бирмиләр алар, дәшмиләр.
Хатирәләр белән йөри күпләр,
Тал-тирәкле елга буенда.
Ташлап киткән туган нигезеңне
Сагынып яшәү бигрәк кыен ла.
Чыгып киткән чакта беркем белми
Нинди язмыш алда көтәсен.
Кайтырлар, дип, көтә туган нигез,
Көтә инде, көтә... нишләсен.
Шәһәр, авыл, диләр... аерма аз
Кала белән сала арасы.
Төпчек улга тиеш иде дә бит
Төп нигезне саклап каласы.
Тормыш матур һәм күңелле хәзер,
Шәһәр, авыллар да тигездә.
Туган якны кайтып күрү кирәк -
Кемнәр яши сезнең нигездә!?
Кайта алар, кайта... соң булса да,
Хатын -кызы һәм дә ир-аты.
Төп йортлары була бик күпләрнең
Туган якның авыл зираты.
//Тәбрис Фәхретдинов
Следующая публикация
Нет комментариев