Җилгә каршы бардым түзә-түзә...
Мең абынган шул тырмага басып,
Гомер йомгакларын өзә-өзә...
Битләремне өтеп алган чакта,
Кырыс җилләр чеметкәләп , кисеп,
Түзәлмичә тезләнгәндә кайчак,
Арттан җылы җилләр куйды исеп.
Әллә холкым шундый туры инде-
Уйлаганны әйттем гомер буе.
Җилләр шуңа каршы булды микән
Тумас борын өшеттеләр уйны.
Сыпыргалап җил уңае белән
Яши белүчеләр алга барды.
Макталдылар, күкрәк какты алар,
Алар өстен чыкты, алар –данлы!
Баш тыкмаслык чытырманлык көтте
Җилгә каршы түзеп барганнарны.
Үлгәч кенә мактап искә алдылар
Халкым, телем диеп янганнарны.
Күкләрдә дә карга көтүләре
Җилгә каршы бармый гына очты.
Уятырлык тавышлары булган
Сандугачлар , белмим, кая посты?!
Бу дөньяны үзгәртергә теләп
Тамырыннан гел башкача итеп,
Хыялланган уллар егылдылар,
Кайтмас җиргә барды алар китеп.
Ә мин нәрсә? Гади татар кызы
Бу җилләргә каршы чүкмәм микән?
Күңелемдә хисле өермәләр,
Хыялларым гына шигъри җилкән!
//Гөлнур Айзат
Присоединяйтесь к ОК, чтобы подписаться на группу и комментировать публикации.
Нет комментариев