Предыдущая публикация
КЪУРУЛТАЙНЫНЪ 100-ЙЫЛЛЫГЪЫНА БАГЪЫШЛАНГЪАН
ТЕДБИР ОЛЫП КЕЧТИ
Декабрь 8-де Судакъ шеэри
больгеси МБОТ «Къырымтатар тилинде окъуткъан 3 номералы орта умумтасиль
мектеби»нде биринджи къырымтатар Къурултайынынъ 100-йыллыгъына багъышлангъан тедбир
кечирильди. Оджалар ве талебелернинъ азырлагъан тедбирде меракълы малюматлар
янъгъырады. Къырымтатар зиялылары ве ёлбашчылары акъкъында сёз юрсетильди.
Малюм олгъаны киби, Къурултай – тюркий
халкъларынынъ, бу джумледен халкъымызнынъ энъ алий форумы.
Номан Челебиджихан халкъымызнынъ биринджи миллий Къурултайыны
азырлав ве отькерюв ишлерине етекчилик япкъан.
1917 сенеси ноябрь айынынъ сонълары ве декабрь айынынъ
башларында олып кечкен Къурултайда Номан Челебиджиханны Кърым Миллий
Укюметининъ башы ве адлие мудири оларакъ сайлайлар.
Номан Челебиджихан 1885
сенеси Ор уездининъ Сонакъ коюнде догъды. Ерли мектепте, сонъра Кезлевде
медреседе тасиль алды. 1908-1916 сенелери Истанбул ве С.-Петербург
университетлеринде окъуды. Укъукъ ве тиббият фенлерини мукеммель огренди. 1908
сенеси Джафер Сейдамет ве башкъа генчлеримиз иле тюрк инкъилябында иштирак
этти. Айны заманда «Къырым талебе джемиети»ни тешкиль этти.
Номан Челебиджихан озь
шиирлерини генчлик чагъындан язмагъа башлады. Буюк истидат иле язылгъан
лирикасы фельсефий мизаджы иле айырылып тура. Бир сыра эсерлеринде
ватанперверлик гъаелери гъает теренлик иле бериле. Онынъ «Ант эткенмен» шиири
шимди халкъымызнынъ миллий гимнидир.
«Чобан къызы» (1912),
«Бастырыкъ» (1913), «Татарлар юрду» (1914), «Ёлджу гъарип» (1916), «Сары ляле»
(1917) киби шиирлеринде индже лирика иле юксек миллий пафос ве азаделик
нагъмелери тереннюм этиле.
Номан Челебиджиханнынъ
1913 сенеси язгъан «Къарылгъачлар дуасы» икяеси акъкъында Джафер Сейдамет
Къырымэр бойле деген: «Бу икяе къырым тюрклери эдебиятынынъ ольмез бир парчасы
оларакъ, даима къуветини муафаза этеджектир!».
1917 сенеси Номан
Челебиджихан Къырым муфтиси ве сонъра Къырым мусульман Иджра Комитетининъ реиси
оларакъ сайланды. Укюмет башында олгъанда, миллетимизнинъ вазиетини бус-бутюн
денъиштирмек ве миллий медениетимизни инкишаф эттирмек ичюн буюк гъайрет ве
себат косьтерди.
1918 сенеси 23 февраль
куню Номан Челебиджихан большевиклер тарафынан кийикджесине къатиль этильди.
Урие КАДИРОВА
Фото: Руслан ОСМАНОВ
Следующая публикация
Нет комментариев