Предыдущая публикация
Ялан аяҡ кисәм тау йылғаһын,
Шаршыларҙың көсө ғәйрәтле.
Йомро таштар табан яра, түҙәм.
Тормош ҡысҡырмаҫҡа өйрәтте.
Яуындарҙан ағымдары көслө
Таш аҡтарып аҡҡан йылғаның.
Ямғыр ҡойған саҡта ғына үҙем
Күҙ йәштәрем менән иланым.
Йығылырҙай ғына саҡтарымда
Тормош бәреп йығыр ағымдан.
Аяғымда торам, мең һынауҙар
Сыныҡтырҙы сабый сағымдан.
Ярһып аҡҡан һалҡын тау йылғаһы
Быуындарҙы минең зеңкетә.
Өмөт менән яңы ярға баҫам,
Юлдарымда тағы ни көтә?
Башҡынамды меңләп уй өтә.
Фәнил Бүләков
Следующая публикация
Комментарии 1
Бик матур шигыр ,иҗадыгызга уныштар телим