Ат бирделәр.Ат каручы:
“Дулый торган ат!-диде,-
Өченче көн генә әле
Ипподромнан килде.
Яхшы атлар бар да кулда,
Сиңа шушы ат тиде.
Энекәш,син үзең кара,
Ипләберәк йөр инде!
Дәү,биек ат,биеп тора,
Өчәүләп җиктек атны.
Тәртә күргәне юк икән
Бу атның моңа чаклы.
Камыт кидердем,ыңгырчак,
Дугасын элеп куйдым,
Дилбегәсен эләктердем,
Кыскасы-җигеп куйдым!
Ике яктан ике конюх,
Атны тотып торалар!
Мыек астыннан елмаеп,
Күз кысышып куялар:
Янәсе дә шушы малай
Булса да ат күргәне,
Авылда беркем моңарчы
Мондый атны күрмәде!
Дилбегәне кулга тоттым,
Ат ыргылды ычкынып,
Ике яктан ике конюх
Калдылар күк кычкырып:
“Сак йөре инде,балакай!
Атны яндыра күрмә!
Дилбегәгә ныграк тотын,
Атыңны юнәлт үргә!”
Ишеттем дә,ишетмәдем,
Җилләр калды сызгырып!
Ат җилдерә!Атым дулый!
Дөлдөл чаба ажгырып!
Күчәр тиеп чәчрәп калды
Капка баганалары!
Борыны кипмәгән малайга
Атны тапшыралармы!?
...Унбер яшьтән тормышымның
Дилбегәсен нык тотып,
Җилдерәм тормыш буйлатып,
Күз яшен эчкә йотып.
Яшеннәре яшьнәп калды,
Йолдызлар атылдылар!
Барган саен киңәйделәр-
Офыклар яктырдылар!
Җилдерәм!Дилбегәләрне
Һич юк ычкындырганым!
Ишетәм кебек үткәннән
Кемнеңдер кычкырганын:
"Ипләберәк йөре,малай,
Арбаңнан төшеп калма!
Гомер бит ул дулаулы ат,
Калганын үзең аңла!”
...Бүген төнлә төштә күрдем
Балалык вакытымны.
Җиктерергә бирми торган
Ажгыр,дулау атымны!...
14.11.2023 ел
Присоединяйтесь к ОК, чтобы подписаться на группу и комментировать публикации.
Комментарии 3