Предыдущая публикация
ШАҲЗОДА: "13 ЁШИМДАН НОРИН ТАЙЁРЛАШГАЧА ЎРГАНГАНМАН!
"
Интиқлик билан кутиладиган байрамлардан бири бу — Янги йил. Ўтган фурсатлардаги воқеаларни сарҳисоб қилиб, янги йилга янгича орзу-умидлар ила қадам қўйиш онларини оилавий дастурхон атрофида нишонлашга одатланганмиз. Санъаткорлар ҳам бундан мустасно эмас. Меҳмонимиз хонанда ШАҲЗОДАнинг ижод доирасидан ташқари ноодатий суҳбати ва хонанда томонидан тайёрланган, байрам дастурхонингизни тўлдирадиган махсус ширинлик юқоридаги сўзимни тасдиқласа ажабмас…
— Шаҳзода, кўпчилик сизни ошхонага мутлақо кирмайдиган хонанда сифатида қабул қилишади…
— Яширмайман, мени ошхонада фақатгина якшанба куни учратиш мумкин. Авваллари махсус овқат, салат, пишириқлар тайёрлардим. Ҳозир таом пиширишга вақтим бўлмагани боис ноодатий салат билан чекланаман.
— Эркак кишига рафиқаси, фарзандларга эса онасининг қўли билан тайёрланган таомдан яхшиси йўқ…
— Тўғри, бу гапингиз исботини ўз тажрибамдан биламан. Лекин уйимдагилар иш тартибимга ўрганишган. Тонги соат 10:00да ишга отланганимча, кечги соат 18:00да уйга қайтаман. Сўнг либосларимни алмаштириб, тадбир, концертларга йўл оламан. Шу билан тунги 23:00да ҳориган ҳолда уйга келаман.
— Кичик ўғлингиз Холид учун ҳам ўз қўлингиз билан овқат пиширмас экансиз-да?
— Имконим бўлиши билан албатта, Холид яхши кўрадиган котлет, макарон ва ёғсиз салатлар тайёрлаб бераман. Айтмоқчи, ўғлим билан таом борасидаги дидимиз бир хил. Очиғи, сўнгги уч ойдан буён ошхонада «ижод» қилишга имконим бўлмаяпти. Йил охирида байрамлар кўплиги боис фақат тадбирлар билан бандман. Холидни шу қадар соғинганимдан қучоқлаб, ўпаверман. Бу эса унга ёқмайди (кулади). Оиламга кам вақт ажратаётганим ўрнини насиб бўлса январь ойида тўлдираман. Бир ойлик дам олишга жўнаймиз. Ўшанда кун давомида оилам бағрида бўлиб, таомлар тайёрлаб бераман, хуллас вақтимиз мазмунли ўтади, деган умиддаман.
— Турмуш ўртоғингиз яхши кўрадиган, бироқ сиз тайёрлай олмайдиган таомингиз ҳам борми?
— Бор, тухумбарак. Турмуш ўртоғим хоразмлик бўлгани боис мазкур таомни жуда яхши кўради. Егиси келганида келинойиси Ойдин опадан тухумбарак пишириб беришини сўрайди. Фурсатдан фойдаланиб, Ойдин опага миннатдорчилигимни билдирмоқчиман.
— Янги йил дастурхони учун ўзингиз махсус тайёргарлик кўрсангиз керак? Ахир бу оилавий байрам-ку!
— Албатта, шахсан ўзим тайёргарлик кўраман, бусиз илож йўқ. Ҳар йилги байрам дастурхони такрорланмас бўлишига алоҳида эътибор бераман. Лекин анъанавий таомномамиз ўзгармайди, булар гўштли рулет, шўрва, мевали, “шуба”, “оливье” салатлари. Ўтган йили қовоқли шўрва тайёрлагандим, бу йил учун ҳали бир қарорга келмадик. Мевали салатни инстаграмга жойласам, ҳар гал мухлислар рецептини сўрашади. Дарвоқе, байрам дастурхони «сервировка»си ҳар йили турлича безатишни яхши кўраман.
— Газетамиз ва ижодингизни қадрлайдиган мухлислар учун янги йил дастурхонидан муносиб ўрин эгаллайдиган қандай таом ёки ширинлик тайёрлаб бермоқчисиз?
— Биласизми, байрам дастурхони учун барчанинг ўз махсус таоми ва анъанавий салати бор. Шу боис махсус шоколадли пишириқ тайёрлаб бермоқчиман.
— Анчадан буён ошхонага йўлингиз тушмаётган бўлса, пишириғингиз қандай чиқаркин?
— Биласизми, таом тайёрлашни билмайдиган қизларни ҳазм қилолмайман. Онам жуда қаттиққўл бўлгани боис ўн уч ёшимдан 30 банка тузламалар ёпардим, норин, манти каби ҳамир овқатлар, пишириқлар тайёрлашни билардим. Санъатга кирганимдан кейин турмуш тарзим ўзгариб, «business woman»га айландим. Шу боис сиз таъкидлагандек, ошхонага кам кираман. Лекин бу мушак хотирасига ўхшаган нарса. Анча вақтдан буён спорт билан шуғулланмай, яна машқ қилишни бошласангиз мушакларингиз тезда аввалги ҳолатини тиклаб олади. Айтмоқчи бўлганим, ҳозир масаллиқларни қўлимга олишим билан хотирам ишга тушади (кулади). Демак, ишга киришамиз!
Бисквит учун керакли масаллиқлар:
7та тухум оқи
1 пиёла шакар
4 та тухум
6 чой қошиқ ун ва какао
37грамм сарёғ
1 та плитка шоколаднинг учдан бир қисми
24 тали махсус қолип.
Тайёрланиши:
— 7та тухумнинг оқи миксерда кўпиртирилади. Ва устига оз-оздан шакар солиниб, кўпиртиришда давом этилади. Сўнг 7 та тухумнинг сариғи ҳамда 4 та тухум солиниб, 3 сония кўпиртирилади. Истаганлар қошиқда аралаштириши ҳам мумкин. Ун ва какао ҳосил бўлган қоришма устига элакдан ўтказилиб, қошиқда аралаштирилади. Сарёғ ва шоколад эритилиб, масаллиқ устига солиб яна аралаштирилади. Сўнгги жараён ҳосил бўлган қоришмани махсус қолипга солиб, 150 даража иссиқликдаги печга қўйилади. Бисквит 8-9 дақиқада пишади. Мухлисларимизда «Нега бунча қисқа фурсатда пишади?» деган савол туғилиши мумкин. Сабаби оддий – қолипимиз кичкина. Агар қолип катта бўлса, 15 дақиқада тайёр бўлади.
Бисквит совигунича эса кремини тайёрлаб оламиз.
Крем учун керакли масаллиқлар:
1 пиёла сут
1 пиёла қаймоқ
6 та тухумнинг сариғи
3,5 та плитка шоколади
35 грамм желатин
Тайёрланиши:
— Битта идишга сут ва қаймоқни солиб, ўрта оловга қўямиз. Бир марта қайнаб олгандан кейин тухумнинг сариғи солинади. У ҳам бир маротаба билқиллаб қайнаб чиқса етарли. Газдан олиб, устига шоколад ва желатин соламиз. Улар кремнинг иссиғида эриши керак. Крем совигунига қадар яна битта крем тайёрлаймиз.
Қўшимча крем учун керакли масаллиқлар:
4 та тухумнинг оқи
1 ош қошиқ асал
7 ош қошиқ глюкоза (исталган дорихонадан олиш мумкин)
Менинг сирим!
Глюкоза ишлатганимизнинг ҳам ўз сири бор. Одатда кремни тухумнинг оқига қўшилган шакар қотириб беради. Бу кремда эса шакарнинг вазифасини асал ва глюкоза бажаради.
Бисквитдан ошиб қолган 7 та тухумнинг сариғини кремга ишлатиб, иқтисод қилишга уринманг. Чунки тухумнинг оқи бисквитни баланд чиқишига хизмат қилади. Сариғи кўпроқ қўшишдан мақсад эса бисквитнинг баландлигини сақлаб қолишни таъминлайди.
Тайёрланиши:
— Тухумнинг оқи миксерда кўпиртирилади. Шу вақтда асал билан глюкозани товага солиб баланд оловда қайнатилади. Ранги қизариб кетмаслигига эътибор беринг, қайнаши учун 3 дақиқа етарли. Сўнг кўпиртирилаётган тухумнинг оқига товадаги қоришмани аста-севинлик билан қуйилади. Масаллиқлар идишнинг таги совигунига қадар кўпиртирилади. Совигач эса биринчи кремга қўшиб, битта масса ҳосил бўлгунга қадар қошиқда аралаштирилади. Ва кўпиртирилган 1 пиёла қаймоқни ҳам кремга қўшилади. Сўнгги жараён кремни ҳам бисквит пиширилган махсус қолипга солинади. Устига исталган нарсадан тайёрланган жем ёки мураббо соласиз. Устига эса пишган бисквитни ўртасидан иккига бўлиб, кремни устига ботириб қўйилади. Ваниҳоят қотиши учун 5 соатга музлатгичга қўйилади. Сўнг исталганча безак билан байрам дастурхонига тортиш мумкин. Тайёрланиши узоқдек туюлиши мумкин, лекин бу ширинликни **** кўргач шунга арзишини тушунасиз.
Ширинликнинг афзал жиҳати!
Тайёрлаган ширинлигимиз шоколаддан иборат. Какао қўшилган бисквитни пишгандан сўнг ушлаб кўрсангиз, пахтадек юмшоқ. Бошқа бисквитлардан шуниси билан ажралиб туради. Ширинликни татиб кўрсангиз, бетакрор шоколад мазасини туясиз. Чунки ичига сифатли шоколад солинади-да.
Садоқат АЛЛАБЕРГАНОВА тайёрлади.
Следующая публикация
Комментарии 40