Радио России-Хакас Радио 91FM

Якут паза орыс тілліг дневниктер сығарылчалар Якутияда. Пӱӱл ол 16-ҷа мун саннығ сығарылған. Анзы анда полған на чыл пастағы классха ортымахти ана анҷа пала килчеткеннеңер. Хакасияда, тізең, пӱӱл пастағы классха 7 муң пала парған. Якутияда 2 тілліг дневниктер 2-ҷі чылы сығарылчалар. Анзына «Якутиядағы хазна паза официальнай тіллерні хайраллиры паза тилідері» программа хабасча. Анда хазна тіллер санына орыс паза якут тіллері кірчелер, официальнай тіллерге 5 тіл: эвенскай, чукотскай паза даа пасха тіллер. Хакасияда хакас паза орыс тілліг дневниктер сығарылбинчалар. Итсе-де, «Хакас тілін хайраллиры паза тилідері» программа тоғынча. #ХакасРадио

Таңда тӧлеге хойлар аларға сағынчатханнарның пічіктері халғанҷы кӱн алылар Асхыс аймаанда. Пӱӱл анда 1000 артиинаң тӧлеге ӱлелер. Марығ ирт парыбысханнарға тӧлегелер октябрь айда пирілер тіп, таныхтапча Асхыс аймаандағы аал-хонии пӧлиинің маллар сурығларынҷа тоғынҷы Артем Николаевич Субраков. Сағысха киріп, чонға тӧлегелер пирері тіп, программа Асхыс аймаанда 2005 чылдаң сығара тоғынча. Ол чыл аны 19 кізі алған, 2019 чылда — 18 кізі, 21 чылда — 16, 22 чылда - 17 кізі. Оларға ортымахти 100-зер тӧлеге пиріл парча. Программа хоостыра олар 2 чыл пазынаң алған хойның чарымын нандыр саларға киректер, 3-ҷі чылында - халғанын. Артем Николаевичтің чооғынаң, пӱӱл пу программаа алызығ кирілген. Алындағы чылларда тӧлегелер олаңай кізілерге пирілген ползалар, пӱӱл кресен-фермер хоныхтарына даа аларға чарадылча. Анзы, олар хойлар пір дее тутпаан ползалар.#ХакасРадио

«Хуча-талған» алай ба «Баран-талган» Сибирь синіндегі 2-ҷі гастрономическай фестиваль-форум иртер Ағбанда 25-26 октябрьда. Аны кресен-фермер хоныхтарының, идінҷектернің пірігізі иртірче. Пӱӱл олар «Нацияның ис-пайы» чидіглернің Чоннар аразындағы реестріне кіріп аларға пӧгінчелер. Аның ӱчӱн пӧзік чидіглер кӧзідерге кирек. Пастағы чидіг, «Чафан» салат полар. Андар орындағы чир ас-тамаа паза ит салылар. Аның кӧдірімі 300 кг полар. Тасты-кӧрімінең ол Хакасияның туризм символы, 5 стихияның чирі, чіли тимнелер. 2-ҷі чидіг, торт полар. Аның узуны 2 метр артиинаң иділер, чалбағы — 1 метр чарымға чидер. Кӧдірімі, тізең, 200 кг полар. Торт сливкадаң паза тайға чистектерінең тимнелер. Тасты-кӧрімінең ол Хакасияның картазы осхас полар. Анда тағлар, суғлар, Хуртуйах тас музей паза даа пасха тархын орыннары кӧзіділ парарлар. Аны «Тох пай» алай ба «Сытый бай» этно-кафе паза кондитер Анастасия Токарева тимнирлер. Фестиваль тоозыл парза, прай араласчыларға фестивальға тимнелген чиистерні амзап аларға чарир полар. Паза таныхтирға кирек, фестивальның тӱгенҷізінде фестиваль араласчыларын тадылығ чапсыс сағыпча тіп, искірілче. Сағысха киріп, пылтыр пу фестиваль «Бутерброднай тархыннар» аттығ ирткен. Ол іпекке паза пызылахха чарыдылған. #ХакасРадио

Таштып аймааның пайрамы сомнарда.

Таштып аймааның пайрамы сомнарда.