Радио России-Хакас Радио 91FM

«Чир-суғҷыларыбыснаң тоғазығ» тіп ӱлӱкӱн иртер 3 августта Чыланнығ аалда. Ол аал ӱлӱкӱні нимес. Аның ӧӧн пӧгіні-- Чыланнығ аалдаң сыххан чонны тоғастырары. Пу аалдаң Тахтобиннер, Тороковтар, Султрековтар паза даа пасха фамилиялығ кізілер сыхханнар. Сағам Чыланнығда 200-че кізі чуртапча. Тастып аймаандағы Пыдырах аал чӧбінің пазы Семен Михайлович Боргояковтың чооғынаң, тоғазығда Чыланнығ аалның тилізіненер сурыг ӱзӱрілер. Таныхтирға кирек, пӱӱл анда парк пӱдірілер. Аны чуртасха киреріне Пыдырах аал чӧбі Хакасияның национальнай паза территориальнай политика министерствозынаң грант утып алған. Аның сині — 2 млн. салковай. Пу ахчаа паркта 2 чайғы тадар ибі ,алай(сцена) паза спорт орыны пӱдірілер. Тӱрчедең Чыланнығда тигірибічек-часовня азылар. Ол сағам прай тимде турча. Пазағы чыл Чыланнығ аалға 325 чыл толар. «Чир-суғҷыларыбыснаң тоғазығ» тіп ӱлӱкӱн 3 августта 10.00 сағатта Чыланнығ аалның культура туразында пасталар. Улӱкӱнге азых-тӱлӱктіг килердеңер искірілче.#ХакасРадио

Пии аймааның Кічіг Нонып аал чуртағҷылары 700 муң азыра ахчалығ грант утып алғаннар. Олар ХР-ның национальнай паза территориальнай политика министерствозынаң сығара олаңай чонға иртірілчеткен грант мариинда араласханнар. Амды пу грант ахчазына Кічіг Нонып аалда Илбек Адалығ чаада араласханнарға Хумартхы тас турғызыл парар. Программаҷа утып алған грант ахчазының 10 проценті пости поларға кирек тіп, кӧріл парған. Амды Кічіг Нонып аалдағылар ол 100 муң салковайны чыыпчалар. Кічіг Нонып аалның депутады Елизавета Васильевна Тюдешеваның таныхтаанынаң, 100 муң салковай чыыл таа парир. Ахчалар чығарында аалдағылар паза пу аалдаң сыххан кізілер ӧткін араласчалар. #ХакасРадио