Предыдущая публикация
4 сентябрьда хакас тілі кӱні иртірілген Хакасияда.
Ӧӧн ӱлӱкӱн Семен Кадышевтің адынаң чон чайаачызының национальнай кінінде ирткен. Анда хакас тілі тилізіне хозым итчеткен кізілерні чеестееннер. Оларның аразында писатель, драматург Илья Прокопьевич Топоев полған. Ағаа «Хакасияның чон писательі» аарластығ ат пирілген.
Хакас тілі кӱні ідӧк Хакасияның чайаачылар туразында таныхталған. Анда ӧнетін пу кӱнге орта азых сӧбіре хығырығлары иртірілген. Хығырығ писатель Галина Казачинованың «Хайхастығ чурт» нымағынҷа парған.
Азых сӧбіре хығырығларында 14 сӧбіре паза 3 писатель араласхан. Ол санда, филология наукаларының кандидады Марина Алексеевна Медведева пархазы Артем Сагалаковнаң, «Хакас чирі» газетаның тоғынҷызы Лилия Валерьевна Пахтаева Ярослав оолғынаң, ХакНИИЯЛИ-ның литература пӧлиинің ӧӧн наука тоғынҷызы Лариса Викторовна Челтыгмашева 2 палазынаң, писатель Митхас Черпаковтың Аима пархазы Наталья іҷезінең хада паза даа пасхалары.
Алынҷа таныхтирға кирек, улуғ сӧбірелернең килгеннерні. Андағ 2 сӧбіре полған. Пастағызы писатель Илья Топоевтің сӧбірезі полған. Азых сӧбіре хығыриинда ол Светлана хызынаң хада паза Арина пархазынаң хада араласхан. 2 -ҷі сӧбіре Хакасияның чайаачылар туразының тоғынҷызы Ирина Николаевна Юсупованың сӧбірезі полған. Аның 3 пала. Хығырығда Ирина Николаевна паза аның іҷезі Екатерина Семеновна Чистогашева, паза аның пір хызы араласханнар. Пасха палаҷахтары ам даа кічіглер.
Ӱлӱкӱнні Хакасияның писательлер пірігізінің кнезі Наталья Марковна Ахпашева писатель Галина Григорьевна Казачинованың хакас тіліне чарыдылған кибелізінең асхан. «Хайхастығ чурт» нымахты, тізең, Хакасияның чайаачылар туразының устағҷызы Надежда Афанасьевна Бурнакова хызы Кунчари Плужникованаң хада хығырып пастааннар. Пасхалары соон сӱрістіре хығырғаннар. Нымах, пір дее тохтабин, пір час хығырылған. Нымахтың тӱгенҷі чардығын, тізең, нымахтың авторы Галина Григорьевна Казачинова позы хығырған. Соонаң прай араласчыларға кинделер паза сертификаттар сыйлалғаннар.
Таныхтирға кирек, азых сӧбіре хығыриина кірері хакас кип-азаа алай ба хакас чазанҷыхтары пастыра полған. Аннаңар араласхан чон прай чазанып килген. Одырчатхан сӧбірелерні кӧргенде, кізі хараа айтчатхан.
Хығырығ тоозыл парғанда, араласчылар аразында сурастырығ иртірілген. Оларға пір ле сурығ пирілген: «Сірер хакас тілінең пазылған хоос литературазын халғанҷызын хаҷан хығырғазар?» Ана пу сурыға ХГУ-дағы студенттернің хакас тілі ӱгретчізі Марина Алексеевна Медведева паза даа пасхалары піди нандырғаннар. #хакасрадио
Следующая публикация
Комментарии 1