Предыдущая публикация
Ba'rshe qaraqalpaq xalqin milletimizdin' jer ju'zi ko'leminde ta'n aling'anlig'ina ha'm til haqqindag'i nizamimizdin' qabil etilgenine 25 jil tolg'anlig'i menen shin ju'rekten qutliqlayman.
Milletimiz, ma'denyatimiz ha'm adebyatimiz rawajlaniwi jolinda xizmet etiwge shaqiraman.
~
Ibrayim Yusupov.
Ana tilime.
Jiraw seni ba'ygi atinday baplag'an,
Sheshenler dawda shin'lap seni taplag'an.
Alpamislar uran etip urista,
Berdaq seni qural etip saplag'an.
Baytereksen' o'sken go'ne tamirdan,
Dilwarlig'in' qil suwirg'an qamirdan.
Qaraqalpaqtin' kewil qusi sayrasa,
So'z qiysini g'a'ziynen'nen tabilg'an.
Gu'lparshinlar bawiri ottay qamilip,
Qizlar sin'sip mun'in aytqan shag'inip.
Sen arqali xandi jumsap qatinlar,
Ajinyaz jirlag'an elin sag'inip.
Naqillarin', shag'ip ko'rsem, mag'izdan,
Juwabiysan' zeyin suwin ag'izg'an.
Atam sag'an azamatliq jan berip,
Anam sag'an miyrim su'tin' tamizg'an.
Men ten'eymen seni jegen nanima,
Uwiz benen ruwxin' sin'gen qanima.
Es bilgeli til jatirqap ko'rmedim,
Biraq sen dim jaqinsan'-aw janima.
Sazg'a salsam hawalag'an alasar,
Ilme sultan suliwlig'in' jarasar.
Qanday jaqsi ag'ayinnin' ko'pligi,
Jaqinbiz dep sag'an ko'p til talasar.
Ana tilim, sen -basqadan ayirmam,
Sen turg'anda men de a'dewir shayirman,
Sonsha qatal su'rginlerde jog'almay,
Bul ku'nlerge jetkenin'e
qayilman.
#ЮсуповИбрайым
Следующая публикация
Комментарии 7