Табе сказаць няма калі:
Вяндлінку з водарам ядлоўца
Мяцеш --- зараз па два скрылі!
А побач --- зірк! --- як цуд, як казка ---
З каляндрай , з перцам, з часнаком ---
Ляжыць вясковая каўбаска,
Таксама ўвітая дымком!
К таму ж падсохла на гарышчы ---
Дык толькі плёўка шапаціць!
Умэнт кальцо з паўметра знішчыў ---
Адно раз'ятрыў апетыт!
Калі ж дапаў да вантрабянкі ---
Цягаць стамілася рука!
Глядзіш --- а ўжо кіндзюк крывянкі
На блюда выклалі з гаршка!
О, гэны зверху і сысподу
Наскрозь усмажаны каўтух!
За чатырох змалоў --- уходаў!
Хоць сам ты лічыш, што за двух.
Паспеў адчуць, што ўжо не слабка
І ў паясніцы, --- а на стол
Тым часам едзе ў місе бабка
І парай дыхае пад столь:
З бакоў запечаная ў меру,
У бульбе скварачкі тырчаць...---
І так жа ўслед пайшла на змену ---
Хоць замычы --- каб не маўчаць!
"Усё! --- сказаў. --- На гэтым дзякуй!"
А на абрус --- нясуць бліны
І к ім --- мачанку-верашчаку
З наборам рэбрачак свіных!
Хвіліну выстагнаў ты моўчкі:
"Дзе месца ўзяць? Патоўпіць дзе?"
І неўпрыкмет не два-тры вочкі
Паслабіў пас на жываце...
Ужо не здыхацца! Падпёрла ---
Няйначай крушня камянёў!..
А перад носам... ставяць цёрла
Гарачых, тлустых калдуноў!
Калдун!.. Духмяны, сакавіты,
У масле Ўсмяглы, а паўзверх ---
Смятанкай свежаю паліты!..
Ну што? І зноў глядзіш, як звер?
І адчуваеш, адчуваеш:
Няхай хоць згэтуль у труну ---
А не зганьбуеш, не стрываеш ---
Дасі прытул і калдуну!
Дасі і добра зробіш, браце!
І не ўпікай дарма сябе!
Ты за ядой --- як і на працы:
На малацьбе ці на касьбе!
Таму --- дастойна, без эфекту
Прымай падзяку-пахвалу ---
І беларускаму таленту,
І беларускаму сталу!
І цмокні ў ручку гаспадыньку,
Каб сонцам пырснула яна,
І ўскінь яшчэ --- а то астыне! ---
Ускінь на сэрца... калдуна!
Урывак з вершаванага рамана Ніла Гілевіча "Родныя дзеці".
Присоединяйтесь к ОК, чтобы посмотреть больше фото, видео и найти новых друзей.
Нет комментариев