Касиетин ойдун бекем каткым бар,
Кадыр-баркын ырдын ала жаткым бар.
Бир жаңылык өзгөрткөндөй дүйнөнү,
Бир жаңы жол тапкым келет, тапкым бар!..
Ал жол мени алып учат асманга,
Түртөт жанды адам бойдон калганга.
Тирүүлүктө тең кароого үйрөтөт,
Тегеренген чындык менен жалганга.
Ой менде күч: -- Каталыкты жой!..-- деген,
Өжөрлүгүм барда ой жок: -- Кой!..-- деген.
Албууттанган айланамын агымга,
Алгач изим түшсө деген ой менен.
Жан дүйнөмдө бороон-чапкын, бурганак,
Кыял турат шамал өңдүү жулмалап.
Качан гана ыр жазылса тынч алам,
Көздөн оолак, сөздөн алыс куржалак.
Агарткан дил, агарткан ой таңы бар,
Эңсеген ал жолго жааса жаңы кар,
Басса деймин оюна кир жукпаган,
Эл деп күйгөн намысы бар, ары бар!
Андай жолго сүйүү гүлү себилет,
Андай жолдо баскан толот, семирет.
Бугуп жаткан сезим ичте бук болбой,
Аламанга түшкөн аттай теминет.
Касиетин ойдун нурдай чачкым бар,
Кара ойлуу жандан ыраак качкым бар.
Бир жакшылык өзгөрткөндөй ааламды,
Бир жаңы жол ачкым келет, ачкым бар!
Автор: Бакытбек Мукарамов (Илегилек),
Кыргыз Республикасы,
23.09.2023-жыл.
Присоединяйтесь к ОК, чтобы посмотреть больше фото, видео и найти новых друзей.
Комментарии 2