Кайда
– Коеп куйган шагыйрь ул кайда?
– Басып тора Кырлай-Тукайда.
Җөмләләр
Куш җөмләләр, гади җөмләләр;
Буш җөмләләр, гали җөмләләр.
Ясалма
Табигатьне таптый-таптый,
Ясалма атлый түргә.
Ясалманы ясый-ясый,
Ашкынмыйбызмы гүргә?!
Алмаш килде
Гомер тарткан тәмәкесен
Гомәр абзый ташлады.
Ләкин сулый төтен исен –
Кызы тарта башлады.
Кыз карагы
Син алай дип, син болай дип,
Башкаларга сине хурлады.
Айлы төндә акбүз атка менеп,
Син аккошны, беркөн урлады.
Ярлыбай Байсылуга
Яман көчле яратканга
Яндырдың да, көйдердең.
Янып-көеп бетмәс борын
Ярый белеп өлгердем:
Бик бәяле икән бит син –
Биеге дә, бөеге...
Бер көн миннән ясар идең
Берәр адәм көеге.
«Без»ләр белән «Сез»ләр
(Шаяру катыш)
Урыс сүзе булса – «без»,
Татарчасы булыр – «сез».
Руслар әйтсә «без вас», дип,
Безнеңчәдә – «сезсез» бит.
Урысча да бар ул «без»,
Татарда да бар ул «без».
Урысчада – «без шила»дыр,
Безнеңчәдә ул – «безсез».
* * *
Торам карап,
Бер башлыкның башлыгына.
Эшләр харап:
Башлыгы – бар, башы кайда?
* * *
Аш атканга ташлар алып
Атып – атып бәргәннәр,
Андый да бар мәргәннәр.
Аткан ташлар булса иде
Асылташлар, мәрҗәннәр.
* * *
Ашаганда телне йота идек
Киндер орлыгының шәңгәсен.
«Киндер-сюрприз» сорап бала-чага
Бимазалый хәзер әнкәсен.
* * *
И, карчыгым, әллә ниләр уйлап,
Сала күрмә борчу җаныңа,
Тарта икән, тарта инде йөрәк
Ак халатлы кызлар янына.
* * *
Әй син, кордаш, яши-яши аңладыңмы:
Тәҗрибәсез һәм белексез калмадыңмы?
«Мин гыйлемнең түбәсенә менеп бастым», –
Дипме әллә үз-үзеңне алдадыңмы?...
* * *
Алмасак та андый хәбәр «Букварь»дан,
Инжил сөйли: Гайса тумышы Марьядан.
Җырланса да батырларга бетмәс дан,
Гыйбарә бар: батыр үлеме марҗадан.
* * *
Әй, укучы, ялган укып исермәгел,
Шәхесләрнең кылган эшен карап бел.
Кемдер өчен герой, галим, изге булса,
Кемдер өчен ерткыч, явыз йә каратель.
Присоединяйтесь к ОК, чтобы посмотреть больше фото, видео и найти новых друзей.
Комментарии 4