Зиндагӣ, дар хаму печат, бахудо, хаста шудам,
Роҳ ҷустам ба хатову ба хато хаста шудам.
Будаӣ гӯши кару сӯи ту рафтам ба абас,
То ба манзил нарасида чу садо, хаста шудам.
Пеши пои касу нокас дили мо қурбон шуд,
Аз дил - ин мурғи арӯсиву азо хаста шудам.
Будаӣ дидаи кӯру ба дарат гардидам,
Раҳ набурда ба дарун ҳамчу зиё, хаста шудам.
Ба дари дидаи дунё задам ангушти нигоҳ,
Во нагашту нашудам дидадаро, хаста шудам.
Бас давидам зи пасеву нарасидам ба касе,
Бо сару пои равон бесарупо хаста шудам.
Бедаво будаӣ, афсӯс, надонистам ман,
Ҳар тараф дар ту давида чу даво, хаста шудам.
Раҳ набурдам ба саре, кора накардам ба диле,
Дар забони ҳама чун панди ниё хаста шудам.
Ман ба поини ту дидам, ки басо хоин буд,
Бар сарам рехт зи болот бало, хаста шудам.
Роҳ бурдам зи Саро то ба дунео осон,
Аз чонам чу расидам ба Саро, хаста шудам.
Дар ҷаҳони туву ман аз ману ту монд дилам,
Дар ҷаҳони ману мо аз ману мо хаста шудам.
Беҷазо дида шабу рӯз сияҳкоронро,
Рӯзу шаб, мунтазири рӯзи ҷазо, хаста шудам.
Мон аз ин баъд марову зи раҳи хеш намон,
Ки туӣ тундраву ман, бахудо, хаста шудам.
Маргро беҳ зи ту донам, ту махон мурдадилам,
Балки мардона бинеҳ узр маро - хаста шудам
Присоединяйтесь к ОК, чтобы посмотреть больше фото, видео и найти новых друзей.
Нет комментариев