Аллах Таала Ыйык Куранда айтат:
“Аллах Таала өзүнүн пенделерине кимге кааласа ырыскысын мол кылат жана кимге кааласа ырыскысын аз кылат”.
Аллах Таала айтты:
“Мен жиндерди жана инсандарды өзүмө абадат кылуу үчүн жараттым. Мен алардан, жаралган макулуктарга же мага ырыскы берүүсүн сурабаймын. Аллах Таала баарына ырыскы берүүчү жана күч кубаттуу” (Зарият сүрөсү).
Аллах Таала айтты:
“Биз адамдарды сыноо үчүн (алардын ичинен ким жакшы амал кылат) жер бетиндеги нерселерди кооз жана сулуу кылып жараттык” (Кахф сүрөсү).
Пайгамбарыбыз салаллаху алейхи вассалам айтты:
“Ким тиленүүнүн кордугунан сактануу үчүн, үй-бүлөсүн каржылоо үчүн жана кошунасына жакшылык кылуу ниетинде адал жол менен байлык тапса, ал кыямат күнү жүзү он төртүнчү күнү толгон айдай нурланган абалда Аллахтын алдына барат. Ал эми ким байлыгын көбөйтүү үчүн, сыймыктануу үчүн жана адамдарга көрсөтүү ниетинде адал жол менен байлык топтосо, ал кыямат күнү Аллахтын алдына барганда Аллах ага ачууланып турган болот.”
Бир күнү бир тоолук киши өзүнүн жакырлыгына арызданып, Пайгамбарыбызга салаллаху алейхи вассалам келди. Пайгамбарыбыз салаллаху алейхи вассалам ага: “Ар бир намаздан кийин он жолу “Кадр” сүрөсүн оку жана жума күнү тырмагыңды алып жүр” деп насаат кылды. Андан кийин ал тоолук адам мына ушундай амал кылган себептен байып кетти.
Пайгамбарыбыз салаллаху алейхи вассалам айтты:
“Он нерсенин себебинен ырыскыда береке болот:
1) Ата-энеге жакшы мамиле кылуу;
2) Акиктен (кызыл түстөгү баалу таш) жасалган шакек тагынуу;
3) Сокур адамга жол көрсөтүү;
4) Аллах Таалага көп зикир чалуу;
5) Бутка бут кийим кийүү;
6) Мечитти шыпыруу;
7) Ыймандуулук менен соода кылуу;
8) Адал жол менен дыйканчылык кылуу;
9) Ажыга баруу.”
Пайгамбарыбыз салаллаху алейхи вассалам айткан:
“Ким төрт нерсени бекем тутса, ал жана анын үй-бүлөсү эч качан жакыр болбойт:
1) Эртең менен эрте туруу;
2) Намаздын убактысы келгенден мурда даарат алуу;
3) Витир намазынан кийин дүйнө сөзүн сүйлөбөө;
4) Азандан мурда мечитке баруу.”
Пайгамбарыбыз өзүнүн үй-бүлөсүнө айткан:
“Төмөнкү нерселер адамды бай кылат:
1) Тууганчылык мамилени куруу;
2) Аллах жолунда күрөшүү;
3) Таңкы намаздан кийин уктабоо;
4) Дүйнөдөн акыретти жогору коюу;
5) Эртең менен жана кечинде мечитте болуу (б.а. багымдат жана куптан намаздарын жамаат менен окуу);
6) Үй-бүлөсүн намазга үгүттөй берүү;
7) Өзү да ибадат менен алек болуу;
8) Бейшемби жана жума түндөрү дубаны көбөйтүү;
9) Аманатка бекем болуу;
10) Ырыскыны талап кылууда шашылбастан сабыр кылуу;
11) Толук Аллах Таалага таянуу;
12) Такыба болуу;
13) Үйдүн эшигинин алдында дуба кылуу;
14) Эртең менен эрте туруу;
15) Садака жана ушуга окшогон жакшы амалдарды көбөйтүү;
16) Мейманды сыйлоо;
17) Куранды сыйлоо;
18) Бараат кечесинде (Шаъбан айынын он бешинчи түнү) дуба кылуу;
19) Ашура күнү (мухаррам айынын онунчу күнү) үй-бүлөсүн кенен каржылоо;
20) Үй-бүлөсү менен жумшак мамиледе жолугуу;
21) Ата-энеге жакшы мамиле кылуу;
22) Жүрөккө Аллахтын коркунучун пайда кылуу;
23) Берешендикти адат кылуу;
24) Күнөөдөн сактануу;
25) Жалган сүйлөө жана жалган күбөгө өтүүдөн сактануу;
26) Ар кандай бузукулуктан, өзгөчө зынадан сактануу;
27) Азанга жооп кайтаруу;
28) Чындыкты сүйлөө;
29) Бирөөдөн үмүт кылбоо;
30) Тамак жегенден мурда колду жуу;
31) Тамак жегенден кийин Аллахка шүгү айтуу;
32) Куптан намазын жамаат менен окуу;
33) Үйдө уксус коюу.”
Пайгамбарыбыз салаллаху алейхи вассалам айткан:
“Кимде ким дасторконго түшкөн ушактарды жесе, ал ар дайым мол ырыскы менен жашайт”.
Пайгамбарыбыз салаллаху алейхи вассалам айткан:
“Тамактануудан мурда жана тамактангандан кийин колун сүннөт деп (түшүнүп) жууган адам Аллахтын каалоосу менен эч качан кедей болбойт”.
Пайгамбарыбыз салаллаху алейхи вассалам айткан:
“Ким туруп таранса, карызы болсо жана тамакты жыттаса, анын жашоосунан береке кетет”.
Пайгамбарыбыз салаллаху алейхи вассалам айткан:
“Балдарыңарга жаман дуба кылбагыла. Ким балдарына өлүмдүн дубасын кылса, ал жакырдыкка дуушар болот”.
Пайгамбарыбыз салаллаху алейхи вассалам айткан:
“Төмөнкү он нерсе кедей болууга себеп болот:
1) Өлүктүн алдында тамактануу;
2) Шымды туруп кийүү;
3) Селдени отуруп байлоо;
4) Битти кармап, өлтүрбөстөн тирүү коё берүү;
5) Киндиктин астындагы түктөрдү кайчы менен тазалоо;
6) Идиштин сынган жери менен ичүү;
7) Намазга көңүлсүздөнүү;
8) Адамдар менен кабагын салып учурашуу;
9) Жалган сүйлөгөндү адатка айландыруу.”
Пайгамбарыбыз салаллаху алейхи вассалам айткан:
“Кайсы үйдө ичимдик жана музыка аспаптары болсо, ошол үйдөгүлөрдүн дубасы кабыл болбойт. Ал үйгө периштелер кирбейт жана Аллах Таала
ал үйдөн берекени кетирет (Кайсыл үйдө жаныбардын же иттин сүрөтү болсо, анда ал үйгө периштелер кирбейт)”.
Пайгамбарыбыз салаллаху алейхи вассалам айткан:
“Үч түрдүү адамдын дайыма ырыскысы тар болот.
Ал үч түрдүү адам:
1) Ата-энеге баш ийбеген бала;
2) Күйөөсүнө кыянат кылган аял;
3) Кошунасы менен жаман мамиледе болгон адам”.
Төмөнкү нерселер дагы кедейчиликке себеп болот:
1) Зынакордук;
2) Жалган сүйлөө;
3) нандын ушагын жерге таштоо;
4) Колду, жүздү жеңи менен же этеги менен арчуу;
5) Жөргөмүштүн уясы үйдө болуусу;
6) Ата-энеге ыза берүү;
7) Намаз окубоо;
8) Устазга адепсиздик кылуу;
9) Багымдаттан кийин күн чыгаардан мурда уктоо;
10) Үйдө шыпырындынын болуусу;
11) Ачыган тамакты жеш;
12) Бети-колду босогого олтуруп жуу;
13) Идиш-аякты жугунду бойдон калтыруу;
14) Колун жуубастан тамактануу;
15) Балдарын жана конокту сыйлабоо;
16) Алы жетип туруп деле жалган касам ичүү;
17) Даарат алып жаткандай дүнүйө сөзүн сүйлөө;
18) Заара кылып жатканда сүйлөө;
19) Заара кылган жерде даарат алуу;
20) Дааратсыз Куран китепти окуу;
21) Сарымсак жана пияздын кабыгын күйгүзүү;
22) багымдат намазын окугандан кийин мечиттен тез чыгып кетүү;
23) Күчтүүлүгүнө текеберленип башкаларга ыза жеткирүү;
24) Ата-энесинин атын айтып чакыруу;
25) Денеде кийилип турган кийимди тигүү;
26) Тилемчилерден дан сатып алуу;
27) Калемди учтаганда чыккан бөлүкчөлөрдү басуу;
28) Сынык тарак менен чачын тароо;
29) Тиши менен тырмагын алуу;
30) Өзүнүн улуулугун көрсөтүү үчүн башкалардан алдыда жүрү;
31) Тилават сеждесин кечиктирүү;
32) Ысырап кылуу;
33) Түндөсү кийимсиз жатуу;
34) Шам убактысы киргенде, үйдө чыракты күйгүзбөө;
35) Көп уктоо;
36) Жылаңач абалда заара кылуу;
Мына ушул айтылган нерселерден адамдын ырыскысы азаят.
Азирети Али р.а. айткан:
“Кайсы үйдө кыянатчылык, уруулук жана зынакордук болсо, ал үйдө береке болбойт”.
Азирети Али р.а. өзүнүн жакын адамдарына айткан:
“Төмөнкү тогуз нерсе аркылуу жакырчылык келет:
1) Үйдө жөргөмүштүштүн уясынын болуусу;
2) Жалган касам ичүү;
3) Зынакордук;
4) Бирөөдөн үмүт кылуу;
5) Шам жана Куптандын ортосунда уктоо;
6) Музыка угуу;
7) Тилемчинин куру кол кайтаруу (өзгөчө түн ичинде келсе);
8) Тагдырга ишенбөө;
9) Туугандар менен жаман мамиледе болуу.”
Азирети Али р.а. айткан:
“Кимге гусул алуу ваажип болгон болсо, ал оозун чайкабастан туруп, эч нерсе жебесин, болбосо анын жакыр болуп калуу коркунучу бар”.
Улуу аалым Абу Лайс “Бустан” деген китепте жазган:
“Ким кийим менен бир нерсени шыпырса, натыйжада ал жакыр болуп калат”.
Пайгамбарыбыз салаллаху алейхи вассалам айткан:
“Ким күнүнө кечинде “Вакиъа” сүрөсүн окуса, анда Аллах ана кененчилик берет жана “Фатиха” сүрөсүн түндүн акырында 41 жолу окуган адамга мээнетсиз ырыскы берилет”.
Азирети Жаъфар Садик р.а. айткан:
“Ким “Тахрим” сүрөсүн окуп жүрсө, мойнунда тоодой карызы болсо да, Аллахтын каалоосу менен андан кутулат. Ал эми ким “Аадият” сүрөсүн окуп жүрсө, эгер анын карызы эсепсиз болсо да, андан кутултат”.
Бир киши Пайгамбарыбыз салаллаху алейхи вассаламдын алдына келип:
- “Оо Аллахтын элчиси! Мени кайгы жана карыз кыжалат кылып жатат, эмне кылсам болот?” деп сураганда.
Пайгамбарыбыз салаллаху алейхи вассалам:
“Мен сага бир дуба үйрөтөйүнбү? Эгер аны окусаң, Аллах Таала сенин кайгыңды кетирип, карызңдан кутултат” - деп жооп берди.
Анда ал:
- “Үйрөтүңүз! Оо Аллахтын элчиси” - деди.
Пайгамбарыбыз салаллаху алейхи вассалам:
- “Таң атканда жана кеч киргенде бул дубаны окуп жүр” - деп айтты:
Окулушу: “Аллоохумма иннии а-ъуузу бика минал хамми уал хузни, уа а-ъуузу бика минал ъжзи уал касал, уа а-ъуузу бика минал жубни уал бухли, уа а-ъуузу бика мин голабатид, уа кохрир рижаал”.
Мааниси: “Оо Аллах! Мен Сенден кам саноо жана кайгыдан, алсыздык жана жалкоолуктан, сараңдык жана коркоктуктан, карызга батып калуудан жана адамдардын зулум кылуусунан паана тилеймин”.
Жамиъ Тирмизиде келген: Пайгамбарыбыздын башына оор иш түшкөндө мындай деп айтат эле:
Окулушу: “Йаа хаййу йаа коййууму бирохматика астагиис”.
Мааниси: “Оо Тирүү жана Түбөлүктүү Зат! Сенин ырайым аркылуу Сенден жардам сураймын”.
Зуннун (Юнус) Пайгамбардын убасы ар түрдүү кайгыны жана кыйынчылыкты жок кылат:
Окулушу: “Лаа илааха илаа аңта субхаанака иннии куңту миназ зоолимиин”.
Мааниси: “Сенден башка ибадатка татыктуу зат жок. Сен бардык айыптардан тазасың. Чындыгында мен зулум кылуучуларданмын”.
Эскертме: Бул дуба күнүнө куптан намазынан кийин жүз жолу окулат.
Ким бирөөдөн карыз болуп карызын төлө албай жүрсө, анда ал ар бир фарз намаздан кийин төмөнкү дубаны окусун. Дубанын башында жана аягында он бир жолудан (каалаган) салаватты окуп, ортосунда он бир жолу ушул дубаны окусун:
Окулушу: “Аллоохуммак финии бихалаалика ъан хароомика
уа агнинии бифазлика ъаммаң сиваак”.
Мааниси: “Оо Аллах! Мага адал ырыскы берип, арамдан сакта жана жардамың менен мени Өзүңдөн башкага муктаж кылба!”
Пайгамбарыбыз салаллаху алейхи вассалам айткан:
“Ким байлыгынын азайбоосун жана ырыскысы берекелүү болуусун кааласа, анда ал бул салаватты окуп жүрсүн:
Окулушу: “Аллоохумма солли ъалаа Мухаммадин ъабдика уа росуулика уа ъалал му,миниина, уал му,минаат, уал муслимиини уал муслимаат”.
Мааниси: “Оо Аллах! Өзүңдүн пендең жана Элчиң Мухаммад алайхис саламга жана момун мусулман эркектер жана аялдарга ырайым кыл!”
Пайгамбарыбыз салаллаху алейхи вассалам айткан:
“Ким күнүнө жүз жолу төмөнкү дубаны окуса, Аллах Таала аны бай кылат жана ал муктаждыктан, кабыр азабынан кутулат:
Окулушу: “Лаа илааха иллаллоохул маликул хаккул мубиин”.
Пайгамбарыбыз салаллаху алейхи вассалам айткан:
“Ким күнүнө жүз жолу төмөнкү келмени окуса, ал эч качан кедей болбойт жана жетимиш түрдүү балээден сакталат, анын эң кичинеси жакырчылык. Ал эми ким бул келмени күнүнө миң жолу окуса, Аллах Таала аны бай кылат:
Окулушу: “Лаа хаула уа лаа куввата иллаа биллаахил ъалиййил ъазиим”.
Пайгамбарыбыз салаллаху алейхи вассалам айткан:
“Ким жума намазынан кийин жүз жолу “Ихлас” сүрөсүн жүз жолу, салават жана жетимиш жолу төмөнкү дубаны окуса, ал бай болот (көп болсо жети жумага чейин):
Окулушу: “Аллоохумакфинии бихалаалика ъан хароомика уа агнинии бифазлика ъам маң сиваак”.
Пайгамбарыбыз салаллаху алейхи вассалам айткан:
“Ким дайыма даарат менен жүрүүнү адат кылса, анда анын ырыскысы кең болот”.
Дубанын пайдалары.
Пайгамбарыбыз салаллаху алейхи вассалам айткан:
1. “Аллах Таала өтө мээримдүү жана Ызаттуу Зат. Пенде анын алдында колун жайса, Ал пендесин куру кол кайтаргандан уялат”. (Жамъул фаваид)
2. “Ким Аллахтан дуба кылып суранбаса, анда Аллах андан нааразы болот”. (Жамъул фаваид)
3. “Кимге дуба кылуунун эшиги ачылса, ага ырайым эшиктери ачылат”. (Жамъул фаваид)
4. “Силер Аллах Тааладан дурус нерсени сурасаңар, (жүрөгүңөрдөн) анын кабыл болгонуна толук ишенгиле”.
5. “Кимдин дуба кылып жаткан учурда жүрөгү Аллахтан капилетте болуп, башка нерсе менен алек болсо, Аллах анын дубасын кабыл кылбайт”.
6. “Дуба - бул ибадат” (Бир риваятта айтылган: Дуба ибадаттын жаны жана өзөгү).
7. “Дуба гана Аллахтын чечимин өзгөртө алат жана кечиктире алат”.
8. “Дуба гана адамдын башына келген жана келе турган балээлерге калкан боло алат”. (Жамъул фаваид).
9. Адам кээде “Мен дуба кылсам кабыл болбоду” деп айтат. Чындыгында анын жегени, ичкени, кийген кийими жана тапкан акчасы арам болсо, дубасы кайдан кабыл болсун?!” (Б.а. ким арамдан жеп-ичсе, же кийинсе, анын дубасы кабыл болбойт).
10. “Инсан дуба кылганда колун ийнине чейин көтөрсүн (б.а. колун ийнинен бийик көкүрөгүнөн ылдый кылбасын). Дубада алаканын толук ачуу кичи пейилдиктин белгиси”. (Жамъул фаваид)
11. Ата-эненин баласына кылган дубасы, жамааттын дубасы, жамгыр жаагандагы кылынган дуба, азан менен кооматтын ортосундагы дубалар кабыл болот.
КАЖЕТ НАМАЗЫ.
Пайгамбарыбыз салаллаху алейхи вассалам айткан:
“Кимдин башына кажет келсе, ал сүннөт жолдо даарат алып, эки рекет кажет ниетинде намаз окусун. Намаздан кийин Аллах Таалага мактоо айтсын.
Мисалы:
Окулушу: “Субхааналлоохи валхамду лиллоохи уа лаа илааха иллаллооху акбар уа лаа хаула уа лаа куввата иллаа биллаахил ъалиййил ъазиим”.
Андан кийин салават окуп, анан төмөнкү дубаны окусун:
Окулушу: “Лаа илааха иллаллохул халиимул кариим. Субхааналлоохи роббул ъаршил ъазиим. Валхамду лиллаахи роббил ъааламиин. Ас,алука муужибаати рохматика ва ъазаа,има магфиротика вал гониимата миң кулли биррин. Вас салаамата миң кулли исмин. Лаа тадаъ лии замбан илаа гофартахуу уа лаа хамман иллаа фаррожтахуу уа лаа хаажатан хийа лака ризон иллаа козойтахаа йаа архамар роохимиин”.
Андан кийин өзүнүн кажетин Аллах Тааладан сурасын.
КУН-ФАЯКУН НАМАЗЫ.
Кимдин башына (жокчулук же башка себептен) кайгы түшсө же бирөөдөн корксо, же бир орчундуу иш чыкса, анда ал ушул намазды (шектенбестен толук ишеним менен) окусун. Аллахтын каалоосу менен бир түн өтпөстөн ал Аллахтын кудуретин көрүп, кайгыдан кутулат.
Намаз окуунун жолу: Бейшембинин түнү гусул алып таза кийимин кийсин. Андан кийин төрт реке нафил ниетинде намаз окуйт. Биринчи рекетинде “Фатиха” сүрөсүн окугандан кийин жүз жолу бул дубаны окусун:
Окулушу: “Уа уфаввизу амрии илаллоох”.
Ал эми экинчи рекетте “Фатиха” сүрөсүнөн кийин төмөнкү дубаны жүз жолу окусун:
Окулушу: “Алаа илаллоохи тасиирул умуур”.
Үчүнчү рекетте
“Фатиха” сүрөсүнөн кийин жүз жолу төмөнкү дуба окулат:
Окулушу: “Насрум миналлоохи уа фатхуң корииб”.
Төртүнчү рекетте
“Фатиха” сүрөсүнөн кийин жүз жолу бул дубаны окуйт:
Окулушу: “Иннаа фатахнаа лака фатхам мубиинаа”.
Төрт рекет окуп бүткөн соң салам берип жүз жолу бул дубаны окусун:
Окулушу: “Гуфроонака роббанаа уа илайкал масиир”.
Аллахтын каалоосу менен башын сеждеден көтөргөнчө Аллах Таала кажетин бүтүрөт. (Бул амал тажрыйбадан өткөн).
Эскертме: Жогоруда айтылган дубаларды манжаларды бүгүп, же теспени колго алып эсептесе да болот, бирок мындай кылбаган жакшыраак, анткени мындай кылуу макрух болот. Эң жакшы ыкма - бул манжаларды өз ордуна коюп дубаны окуган сайын манжаны ошол эле ордуна бир аз басып коюу. Бул тууралу билген илимдүүлөрдөн тактап алса жакшы болот.
“ЙАСИН” сүрөсү.
Пайгамбарыбыз салаллаху алейхи вассалам айткан:
“Ким “Йасин” сүрөсүн таңга жуук окуса, анын ошол күндүк баардык кажеттери ишке ашат. Ал эми ким кеч киргенде окуса, анын түнкү баардык кажеттери орундалат”.
“Ким “Йасин” сүрөсүн таңга маал окуса, ошол күнү кеч киргенге чейин анын иши жеңил жана ырыскысы мол болот. Ал эми кечинде окуса, таң атканга чейин иши жеңил жана ырыскысы берекелүү болот”.
ИСТИХАРА НАМАЗЫ.
Ар бир инсан бир ишти баштаардан мурда Аллах Таала менен кеңешүүсү зарыл. Мын аушуну “Истихара” намазы деп айтабыз. Хадисте бул амалдын өтө көп пайдалары айтылган.
Пайгамбарыбыз салаллаху алейхи вассалам айткан:
“Аллах Тааладан кеңеш сурабай коюу - бул бактысыздык жана жакшылыктан куру калуу. Ким нике, сапарга чыгуу жана башка иштерин “Истихара” менен кылса, Аллахтын каалоосу менен ал эч качан өкүнбөйт”
“Истихара” намазын окуунун жолу:
Эки рекет ниетинде нафил намазын окуп, толук көңүл буруп, төмөнкү дуба окулат:
Окулушу: “Аллохумма иннии астахиирука би ъилмика, уа астакдирука бикудратика, уа ас,салука миң фазликал ъазиим. Фа иннака такдиру уа лаа акдир, уа таъ-ламу уа лаа аъ-лам, уа аңта ъаллаамул гуйууб. Аллоохумма иң куңта таъ-ламу анна хаа-зал амро хойрул лии фии диинии, уа ма-ъаашии, уа ъаакибати амрии, факдирху лии, уа яссирху лии, сумма баарик лии фиихи, уа иң куңта таъ-лам анна хаазал амро шаррул лии фии диинии, уа ма-ъаашии, уа аъаакибати амрии, фасрифху ъаннии, васрифнии ъанху, вакдир лийал хойро хайсу каана сумма арзинии бихи”.
Андан кийин жүзүн кыбылага буруп, даарат менен төшөккө датсын. Уктап тургандан кийин көкүрөгүнө кайсы нерсеге бекем ой пайда болсо, ошол ал адам үчүн пайдалуу болот. Анан ошол ойго келген пайдалуу терең ишенип, ал ишти аткаруу керек. Эгер бир күндө анын ою бир нерсеге токтобостон эки ойлуу болуп тура берсе, анда экинчи күнү дагы бул амалды аткарсын. Ушинтип жети күнгө чейин бул амалды аткарса, буюрса ишинин пайдалуу же пайдасыз экендигин түшүнөт.
Эгерде инсандын ажылыкка барууга ниети болуп турса, анда “Ажылыкка барсамбы, же барбасамбы..” деп истихара кылбастан, балким “Баланча күнү сапарга чыксам пайдалуубу, же зыянбы...” деп истихара кылуу керек. (Бехишти Зевар)
Истихара.
Кимдин башына түйшүк келип кыжалат болгондо жана ал ошол түйшүктөн кутулуунун жолун түшүндө көргүсү келсе, анда ал даарат алсын, андан соң таза кийим кийип, атыр себинсин.
Андан кийин таза төшөккө кыбылага жүздөнүп жатып, “Аш-Шамс” сүрөсүн жети жолу, “Вал-Лайл” сүрөсүн жети жолу, жана “Ихлас” сүрөсүн жети жолу окуп, кол көтөрүп: “Оо Жараткан! Менин түшүмө ушул түйшүктөн кутула турган жолду көрсөтүүчү нур пайда кыл жана менин дубамдын кабыл болгонун билдир!” деп дуба кылсын.
“Канткенде ырыскыбыз мол болот” китебинен алынды. 2015ж
Присоединяйтесь к ОК, чтобы посмотреть больше фото, видео и найти новых друзей.
Нет комментариев