Предыдущая публикация
Ишқе ки дар он шояду аммост, ҳаром аст.
Ё бо сабаби зевару симост, ҳаром аст.
Дар ишқи ҳақиқӣ кӣ пайи зар бувад охир?
Он дил, ки ба зар моилу шайдост, ҳаром аст.
Бар шаҳвати худ ном намонед муҳаббат!
Чашме ки ҷуз аз маъшуқа биност, ҳаром аст.
Фармони Худо ғайри вафо нест, азизон!
Аҳде, ки дар он арзишу савдост, ҳаром аст.
Покӣ чу фарогири забону дилу дин аст,
З-ин се ба яке куфр муҳайёст? Ҳаром аст.
Дил пок намо, то ки шавад ишқ мубарро,
Ҳар ишқу диле ғайри мубаррост, ҳаром аст.
Фатвои Ҷунун, Ҳотамӣ, дар ишқ чунин аст,
Ишқе ки пур аз шояду аммост, ҳаром аст.
Ғайратҷон Ҳотамӣ
Следующая публикация
Комментарии 1