ХӘЗЕР БЕЛДЕК
Балачакта һәрнәрсәгә
Риза булып шатланганбыз,
Кара «Волга» кирәкмәгән,
Талчыбыкка атланганбыз.
Бәп-бәләкәй йөрәкләргә
Сыеп беткән бөтен галәм.
Су төшәргә, тау менәргә
Блат-фәлән кирәкмәгән.
Кирәкмәгән алтын-көмеш,
Таш җыйганбыз күл буенда,
Тик берәү дә дусларына
Таш йөртмәгән куенында.
Белмәгәнбез кара көеп,
Көнләшүдән кан йотарга;
Буш куыклар очыртып та
Мөмкин икән дан тотарга.
Белмәгәнбез Мин Минечнең
Табан астын ялап кына
Мөмкин икән орден алып
Тагарга да җайлап кына.
Белмәгәнбез ничек була
Бер-береңнең башын ашау,
Башкаларның хәсрәтеннән
Үзең өчен бәхет ясау.
Хәзер белдек – без өлгердек!
Дус еласа – шатланабыз,
Ярдәм сорап башын исә,
Җилкәсенә атланабыз…
Ә үзебез гөнаһ кылсак,
Ришвәт биреп акланабыз…
Балачакта эре идек,
Үсә-үсә вакланабыз.
1987 ел
Присоединяйтесь к ОК, чтобы посмотреть больше фото, видео и найти новых друзей.
Комментарии 4