Предыдущая публикация
Етдими видо они —
Севги йуқолди қай кун?
Ўтди соғинч даврони:
Хотири — жам, беқайғу.
Ҳатто тақдир беталаб —
Гўё йўқдай кемтиги.
На ўзин осар, ё раб,
На йиғлади знтикиб.
Кетиб борар муҳаббат,
Қўлларидан кетиб эрк.
Ёзсам етмагайдир хат,
Излай десам йўли берк.
Шомга қўшиб тонгимни,
Тўлғонмайди баланд-паст.
Берай десам жонимни,
Муҳаббатга керакмас.
Сургалайди фақат Вақт
Эгасиз қолган ойни.
Кетиб борар муҳаббат —
Дунёлардан чиройли.
Нимани этдим бекор,
Қандай даврон қурибман?..
Сенга нима бўлди, ёр?
Мен ўлгандай турибман.
Усмон Азим
Следующая публикация
Комментарии 1
Aslo mening gʻamimni yemang,
Oʻz kunimni oʻzim koʻraman.
Oʻz yogʻimda qovrilib oʻzim,
Jim, alamim ichga yutaman.
Kimlargadir shartmas yoqishim,
Mayli meni suymasa suymas.
Men kerakman oʻzimga oʻzim,
Kim ne deydi, aslo qiziqmas.
Joningiz ham achimasin hech,
Rahmingizga emasman muhtoj.
Menga hali qilasiz havas,
Omad qushi gar kiydirsa toj.
Koʻrolmayin, qilsa-da hasad,
Tobora men gullayveraman.
Alamlarni ortda qoldirib,
Baxtni quchib yashayveraman.
06.09.2024-yil