БОЬРИЛЕР.

-------------------
Биз боьрилер,ийги ерден кувылган,
Куврай оьскен кулама шоьл-юртымыз.
Оьмир йоллар кан ман ювылган,
Кылыш- кырган болган ясы- картымыз.
Биз боьрилер.Ийтлерден аз болсак та,
Ийтке тисти каптырардай куват бар.
Борап явган кар астында калсак та,
Кас душпанга карсы шыгар кайрат бар.
Биз боьрилер.Атылганда туьбеклер -
Эркинлигин йоймаган ян кыйналар.
Бир заманда бизден болган коьбеклер,
Ялган улып,уьй азбарда айланар.
Биз боьрилер.Ийтлер бизим йыныстан.
Ийт аяктан тек биз аслар ишпеймиз.
Йигер йойып,куйрык кысып ,куныскан.
Тайпаларды -биз бир де кешпеймиз.
Биз боьрилер.Ийтлер- бизим канымыз,
Ама коьнил болмай коьнил ийтликке,
Коьн сыдырып,шыкса аьзиз янымыз,
Сатылмаймыз ийттей куры йиликке.
Биз боьрилер.Орды- кырды айланып,
Уьйреншикли болдык тамам кыйынга,
Ама, ийттей,берк шынжырман байланып,
Бойсынмаймыз,мойса илип мойынга.
Биз боьрилер.Биз карланган куьнлерде,
Бир булытсыз яздынъ коьги куьлтирер.
Биз -боьрилер.Биз улыган туьнлерде,
Ийтлик эткен ийттинъ туьги калтырар.
Биз боьрилер...
М.Авезов.
(Владимир Солоухиннен).